‘TUM MHAKA SANGXI’- PRESS NOTE

Maiache 31ver Povitr Atmeachea dobajik porbe disa, Pri. George Aguiar, Padr Vigarachea hatantlean, ‘TUM MHAKA SANGXI’-hea pustokachi ugtavnni, Bhorvanxeachê Mayeche Firgojent, Kandolè, 8.15-chea Misa uprant vhodda ghonngonnan zali. Tea disa tanchea Iadnikancho Pri. George Aguiar ani Pri. Jesus Rodrigues hanchi bodli zal’lean, tanchea hea firgojent nimanea disa, tanchea dennea khatir Bapak dhin’vasunk, Misa bolidan bhettoilem.

  Konknni bhaxentlean Povitr Pustok amkam favo zalem tedna soglleanchim kallzam khuxalkaien murgot’lim. Devachea Utrak bhettoilolea Gonvllik vorsan (2007-08), Povitr Pustok dor eklean vach’chem mhonn amchea Bispacho ulo zalo. Tor bextench vach mhollear kitlo lok vachtolo? -ho proxnn soglleanchea monan kheltalo. Heach proxnacher Kandolechea Gonvllik Firgoz Sobhen mon lailem ani oso tharav ghetlo: Loukikank Povtir Pustokacher ek ‘quiz’ kelo zalear zaito lok, tea ‘quiz’-ak lagon tori Devachem Utor vachunk pavtolo. Hem korunk tannim mhoineachea mhoinea, akhea Povitr Pustokacher, Konknni bhaxentlean poilech paut proxnavollichea rupan ek-ek bhag aplea firgoz potracher chchapun hadlo. Vorsachea xevotak, jedna kelolea vauracho thav ghetlo, khorench borem dislem. Zaitea loukikanim, bhov korun Povitr Pustok kednanch ugddunk naslolenim, tem zata te bhaxen vachlem ani zaitim zannam Povitr Pustok xikunk pasun pavlim.

Ho mell’lolo ies polleun, Bhavartak bhettoilolea vorsan (2008-09), ‘Compendium of The Catechism of the Catholic Church’, hem Povitr Sobhechem dotornichem pustok (Motvea akaran) vach’chea monan, tacher-ui ek ‘quiz’ addailo. Hea ‘quiz’-ak lagon, panchxim ghorabeantlea chearxim ghorabeanim hem pustok ghetlem ani zaiteanim tem vachun ani xikun, hea ‘quiz’-ant vantto ghetlo.

Hea don-ui ‘quiz’-anchem boreponn mhollear, zaitea bhurgeanim ani tornatteanim vantto ghetlo.

Ho ‘quiz’ soglleank somzota te bhaxen (simple language) kela. Goroz thoisor Inglez-ui vapurloli mellta. Haka lagon hem pustok Konknni toxench Inglez bhaxen asa.

Hea don-ui ‘quiz’-ancho hetu: Povitr Pustok ani Povitr Sobhechem dotornichem pustok patt korop nhoi aslo. Hea don-ui pustokamnim Kristi bhavarth kitem to odhik kholaien zanno zaunk ani aplea dispott’tea jivitant to lavun tem odhik orthabhorit korunk – hea ‘quiz’-acho hetu aslo.

Hench monan dovrun, Kandolechea Firgozkaranim kelolo vaur hea pustokachea rupan soglleank dovorla. Hem pustok amchea bhavarthacho sonkxep dina bogor teach pustokanim vochonk ek dixa, ek ut’tejon! “TUM MHAKA SANGXI ?” vaprun, avoi-bapainim aplea ghorabeant, Gonvllik Firgoz Sobhechea vangddeanim ani ‘Animator’-anim aplea somudayant ani Dev-sondexkaranim aplea dotornichea vorgant, aplo ani dusreancho bhavarth vaddounk, Povitr Pustok ani Povitr Sobhechem Kristi dhorm xikounechem pustok niyallunk soglleanim panvlam marchim mhonn ami as ballgitam.

Sogllea Kandolechea Gonvllik Firgoz Sobhechea ani Parish Animation Team-ichea vangddeanim (2006-2009) bhar gheun ho vaur kela dekhun hem pustok toiyar zalam. Tankam amche kallzan thaun dhin’vas ani xebaski!

“Zaka Devachea Utrachi vollokh na taka Jezu Kristachi vollokh na”, oxem Bhagevont Jerom’ mhonnta. “Tum Mhaka Sangxi?” hantum Povitr Pustok ani Dotorn xikunk ani kholaunk soeg mellta. Proxnavollichea rupan aslolem hem pustok nhoinch bhurgeank ani tornatteank sfurthi ditolem, punn ghorabeachea, somudayachea ani Firgojechea mollar soglleanchim kallzam Devachea mogan pettoitolem.

Hem pustok don bhagamni vanttlolem asa. Poilo bhag Povitr Pustokacher zalear dusro bhag Povitr Sobhechea Dotornichea Pustokacher (Compendium of the Catechism of the Catholic Church). Dôr eka bhagant sadea proxna vorvim hea dhormik pustokamni liplolem bhanddar sompeponnim sôdun kaddunk zata. “Tum mhaka sangxi?” vaprun amchea dhormachim mull pustokam odhik kholayen vachunk ani niyallunk jerul ruch lagtoli.

Hem pustok Bhorvanxeachê Mayechi Firgoz, Kandolê, Povitr Atmeachea dobajik porbe disa, uzvaddak haddta. Padr George Aguiar (Pd. Vigar) ani Padr Jesus Nazareth Rodrigues (Padr Kur)- hannim firgozkarancho ho vaur ektthaim korun hem pustok toiar kelam. Fatlea don vorsanim kelolea vauracho foll to! Aplea firgojent tacho boro faido mell’lea uprant dusrea-i lokanim tacho faido kaddunk- ho tancho hetu.

Hem pustok Kandolechea Firgozkaranim Pri. George Aguiarachea ponch’vis vorsanchea  folladik vaurak bhettoila. Toxench tanche firgojechea sadde chearxim vorsanchea utsova somoiar (1560-2010), he poili avrut’ticheo thoddeo prot’teo ‘complementary’ asteleo. Kôichea-i firgojek hacheo anik prot’teo zai zalear tannim Bhorvanxeachê Mayeche Firgojent, Kandolèchea kocherint, phone marun (2489084) vo thoim vochun gheunche.

Zaiteanim hem pustok aplea ghorabeant, somudayant, dotornichea vorgamni ani firgojent vapuddchem ani faido kaddcho.