CP-Cir/215/2008

Hea Mha-Dhormprantacheam Iadnikank, Dharmikank ani Loukikank

Prosidh Potr

Vixoi: Otubrachea mhoineant Magnneachem
ani Prachitachem Abhyan

Priticheamnô,

Halincheam sumanamnim Soimban toxench mon’xamnim kel’leam sonkoxttank lagun, lakhamnim amche sangati nagrik vornnunk zaina toslea kolkoleak ani koxttank sampoddleat. Ekê vatten, Biharant ani Orisant buddteô yeun choddan chôdd lok trasant poddla ani khub zannam meleant. Dusrê vatten, kaim rajeamnim dhormachea nanvan kel’leam hal-upodreank lagun, hozaramnim xant ani kaide pallpi nagrik ucharabhaile tras bhogtat; ani nimannê suater, amchea desantleam kaim xaramnim inosent samania nagrikancher akantvadeamnim (terrorists) kel’lo hol’lo.

Mon’xancher ani vostuncher kel’leam heam soglleam sonkoxttank ani nitibhailea hol’leak lagun amchea mogachea desak ani amam tichea nagrikank vhodd dukh ani loz bhoglea. Heam ghoddnneank lagun sosunk poddlam team amcheam sangati Bharoteam sovem amchim kallzam dubhavaviret oddtat, toripunn ami amchea Maim-desa pasot dukh porgott’tanv, kiteak akhea sonvsara mhoreant ek boreantlem lokxai-raxttr mhonn amchea desachem chitr aslem tem atam, thoddeam punn sokti asloleam ani somaza virudh vavurtoleam tollacheam pongddank (fundamentalist outfits) lagun, bigddon bigoddlam.

Akho sonvsar bhor, Katolk bhav-bhoinnam Otubrachea mhoineant, Jezuchê Avoi, Ruzai Saibinnichea otreka pormannem, magnnem ani prachit kortat. Hea mhoineant, amchim Gõychim Katolkam, zaum aplea kuttumbant, zaum xezarcheam khursam lagim vô aplea firgozamnim ekttaim zaun, vhoddê bhoktin ters rozar korun, Povitr Sobhecheam, desacheam ani akhea sonvsaracheam gorzam pasot magnnem kortat.

Ho mhoino amchea desa ani kherit bhaxen heam sokol dil’leam sonkolpam pasot odik khotkhotean magnnem ani teag korun bhettounk, hanv mhojeam mogacheam Padri bhavank, Dharmikank ani hea Mha-Dhormprantacheam Loukikank kallzant thavn ulo kortam:

• mezunk zaina titleam amcheam bhav-bhoinnink ghor-dar na zalam ani tim babddim piddapidd soschê bhirantin lipun bhonvtat: tankam sorkarakoddlean favo ani goroz titlo adar mellun, aplem jivit novean suru korchê khatir tankam surokxit zago mellcho;
   
• sorkari odhikareamnim osvost zaloleam suatamnim portun xist-xantatai haddun, nopoit zal’lim khasgi ani sonvsthik ghoram tech porim igorzô novean bandun haddunk adar diuncho;
   
• nagri toxench dhormik fuddareamnim ani borea monacheam mon’xamnim amchea desant nit, xanti ani ekchar haddunk thokôs gheun vavurchem;
   
• Dhormik hinvxêk fattboll ditat ani akantvad kortat tanchim monam uzvaddonk ani tannim oslem karya – jem fokt amchea desachem mukh vidrup korta – soddun diun, amcho mhan des bandun haddpachea kamant odik faideacho adar te diunk pavche.

Magnneanchem ani teaganchem hem abhyan Somiachea ani Tachea Povitr Sobhechea sombondhant amkam vaddoum, toxench bogsonneachim ani mogachim mon’xam amkam korum: ami sotmantanv tea Xubhvortomanache khaxele gunn te. Dukhik-khontik sampoddloleam ixôb nasloleanchem jivit sadharann korpa khatir poixeanchea adarachi goroz asa: ti udarponnan ami korunk he teag follvont zaum; khorem mhollear, kitlo-i ami adar dium, to favo titlo zaunchoch nam. Orisant zal’lea dhongleantlean niradari zal’leam khatir “Caritas-Goa” – hê sonsthen ulo marlolo asa ani tumchê koddlean humêd haddpa sarko zobab mellot asa. Atam Biharant ani Orisant bhuddteô ailolean, zaiti dukhapôtt zalea; tanchê pasot tumchi denngi diat mhonn ho anik ek ulo. Somdirant ek thembo to zait, tori varear poddlolê hê urponjik Gõychê Povitr Sobhen aplo hat diunkuch zai. “Flood Victims” – him utram ghalun, “Caritas-Goa, S. B. Acc. No. 18046” -- hea nanvan Cheque vo Demand Draft korun tumchi denngi pattoum ieta. Tumche duddu porxim-i haddun, Caritas-Goa kocherint, Ponnjê, Hotel Mandovi lagsar, Institute Piedade – hantum vochun dium-ieta.

Amcheam firgoz vo kopel-gonvlliamnim apleam firgozamnim asloleam dhormik ghoram ani sonsthamnim ravtoleank ani apnnank lagu zatoleam bhavarteank hea Prosidh Potrant dil’lem asa tem kollounchem mhonn magtam ani somestancher, Maria - Jezuchê ani Povitr Sobhechê Avoichê vinovnnen, Devacho bhorpur axirvad poddum mhonn magtam.

Arsebispachem Ghor, Ponnjê, Gõy, Setembrachi 29vi, 2008.

( + Filipe Neri Ferrão)

Gõy-Damanvcho Arsebisp