Orissa Prantant Hinvsa
CP-Cir/202/2008
Prosidh Potr
Yadnikank, Dharmikank, Loukik Bhavarteank ani borea monacheam mon’xank
Vixoi: Orissa Prantant Hinvsa
Priticheamnô,
Heam disamni, Orissa Prantant, husko ani bhirant haddpa sarkeô ghoddneô ghoddleat ani ghoddot asat. Aplea Ashram-ant ravtolea Swami Lakshananda Saraswati - hea VHP fuddareacho ani anik panch zannancho konnem tori khun kelo. Tê meren, thoim Kristanv lokacher ani bhandavollincher hinvsa zait asa.
Swami-cho zo khun zalo ani tachea uprant zo hinvsecho lôtt nirmann zalo tacher Bharati Katolk Bisp Saibamni apli khônt porgottaili, nixedh marlo ani xanti pasot magunk lailem; hêch dixen, ami-i amchim bhavnnam porgott kelim: hachi khobor tumim vortmanpotrancher vachlea astelich.
Punn bhirant ani akant sompta - hachi khatri zaina; dhormik sondorban uchamboll zal’lem vattavoronn xant zait xem nam. Swamicho khun zala to Kristanvamni kela mhonn thoddeô sonvstha khobrô posraitat ani Kristanvam virudh odik uchambollai ghoddun haddtat. Eka onathghorant vavurtolê ostorêk ulpavn marli, arên poddlolea eka dadleak apleach ghorant ulpailo, dog padri ani thoddeô motthvaxi bhoinni dukhouleat ani tanchi poristhiti ozun gombhir asa. Zanv padri zanv motthvaxi bhoinnim pollon bhonvtat.
Oslê poristhitint amchean hat pangrun bhosunk zaina. Khontoulolea amchea bhavam-bhoinnam sovem amcho sangat porgottop chodd gorjechem. Hea pasot, amchea Dhormprantant sokol dil’leô kariavolli ami addavunk ieujileat:
-
Hea mhoinneachê 29ver, sogllim Katolik xikxonnik ghoram bond astolim.
-
Setembrachê 7ver, Aitara disa, amchea Dhormprantant ami Magnneacho ani Upasacho dis mhonn palltoleanv.
-
Nixêdh porgott dakhounk nixannianchi chollvôll zateli.
-
Don suatancher punn nixêdh zomati zatoleô. Hachê-voir fuddli mahiti tumkam melltoli.
Orissa prantantli poristhiti polleun, amchea yadnikank, motthvaxeank ani bhavarteank, toxench borea monachea mon’xank kallzant thavn hanv ulo martam: Koxttoutolea amchea bhav-bhoinnam sovem amcho sangat dakhoum-ia ani teach borobor xanti ani ekchara pasot magun heam kariavollink iês ievum-xem korum-ia.
Arsebispachem Ghor, Ponnjê, Gõy, Agostachi 27vi, 2008.
( + Filipe Neri Ferrão)
Gõy-Damanvcho Arsebisp