Home

Novena of St. Francis Xavier - 1st Day

Vixoi: Promannikponnan ano Sotan jieun, Kristi Totvank Sakxi Dium-ia !

Jivitacho Onbhov

Amche sorbhonvtim ek dhanvti nodor ami marit zalear zaitem borem disachea-disa ghoddlolem ani ghoddun haddlolem ami polletanv vo aikotanv. Devan dillem ginean vapddun, thoddim vorsam pattim jem kitem amche lagim naslem, tern aiz mon'xan sodun kaddlam; dekhik bizii, grinder, washing machine, computer, internet, mobile ani adi. Heam vostum vorvim dubhaviret amchem jivit sompem zalam; amchea avoi-bapai bhaxen vo amchea adleam bhaxen amchem jivit titlem koxtti ani zhodd nam. Hea pasot mon'xak xabaski ani Dhonia Devak vakhann'nni! Punn hi amchea jivitachi fokot ek bhazu!!!

Jivitachi dusri bhazu dukachi!!! Vetea-panvlak choreo, fottingponn ani nagovop: vepar dhondo kortolo aple tagddecho kantto haloita, dusro konn follam bavonam zauncheak tantum syringe gheun vokhod topta, konn movant anti-biotic misoll korun vikhta, anik eklo koslea-koslea chemical-ant boddoun follam pikoita. Amche modem, konn dusreachem bhatt aplea nanvar korta, konn dusreachem xet apunn choriam lunvta, dusreachea bhattachi vatt laita; Sorkari kocherint konn lonch magta, konn axil'li file ani kagtam nanch korta, dufy-ik vochonastannam hajiri ghalta. Ho amcho somaz! Promannikponnak ani sotak zago naxil'lo kail ho aicho! Oslea somazant jietolo monis chint'ta, 'sogllinch chortat nhoi, hanvem-i chorlear kitem zata? Sogllinch lonch ghetat nhoi, zalear mhojean gheunk zainam? Pozddem jivit kitlim zannam jietat, mhojench bemoriadichem jivit vaitt zate/em?' Osleam chintnam ani vagnnuke vorvim adhunik kail, kallokacho ani patkacho zaun gela. Hea kallokacho ani patki kallacho zobabdar piso monis nhoi, nennar monisui nhoi, bhogor ginean ani zannvai asloloch monis!! Kristi Totvank aichea kallar sakxi diunk khorench kottin zata!

Utor

Osli vagnnuk gheun hea somazant choltolea mon'xak Devachem Utor provadianchea tonddi sangta: "Nhaun ieiat, nitoll zaiat; anink vaitt korum nakat, borem korunk xikat...." (Iz 1: 16-17); "Borem sodat ani vaitt soddun diat; vaittacho dves dhorat, boreacho mog korat..." ( Am 5:14. 15); "Tumchea khoincheach kortubancher hanv visor ghalchonam" (Am 8:7 ). Dev heam osleam kortubancho thav ghetolo ani heam kornniancho ami zhoddttechea vellar ixob diunk poddtolo mhonn amkam xiddkaita:

'ieiat, Bapacho axirvad ghetoleamno  toiar kelolem Raj bhogat( Mt 25:34); x/rap poddleleamno, Mhoje sorxile koddsorat   sasnnachea ujeant vochat (Mt 25:41). Dusrea utramnim, osle khotte chalintlim koddsorunk Dev amkam soglleank apoita kiteak Tachi chal tosli nhoi bhogor Promannikponnachi ani Sotachi (Poilem Vachop); Promannikponn ani Nit Tache sodreche Khambe" (Sir 97:2). Deva sovem fottingponn, onit ani broxttachar nam, bhogor promannikponn ani sorv sopurnnai asa ani ami-i Tache bhaxen promannik ani sorv sopurnn vo povitr zaunk Tachi khuxi (Mt5:48). "Soglleanchich vagnnuk khotti, hanvui toxench kortolom" mhonn'teleak , Jezu sangta " turn vegllo za; kalloki zogant, tum-i kallok zainaka". Kristi Totvancho sakxi zaunk To ulo korta: "Sotachi govai diunk ho tumkam soeg" (Xubhvortoman). 

Bhagevont Fransisk Xavier, aplea tornnattponnar sonvsari axa ani vidyaprtent huxearkai vorvim apnnak nanv zhoddchem mon soddun, Kristi Totvam jieun aplea ani peleachea otmeachi rakhonn korunk ieujita (Mt 16:26). Amchea Goyant astanam, Fransisk Xavieran, tea kallar bemoriad ani lognik ovisvaxiponn poisaunk, logn-sonvskar gheunk tornatteank ulo kelo. Aplea muniarponnant, lhan bhurgeank ek ghanttichea avazan ektthai korun, doton'ni vorvim Kristi Totvam xikoilim ani tancheruch aplem jivit manddun haddunk, bhurgeank ani tanchea avoi- bapaink zagoilim. Bhoktivont Juze Vazan, ek tornnatto koso, Goyche Sant Pauluche kolejint aplem xikop kortanam, promannikponnan ani sotan cholun, aplea boraborcheam tornatteank girastolea khottea vondavnniancho kantallo dhorlo ani nirmoll jivitacho nomunno zalo ( G.C. 2.3). Ek iadnik koso, kalljidarponnan ani sotan somajik avhanak tannem fuddo kelo. Bebdikayek lagun ghorabeachem nisontton zaunchem aslem thoim Juze Vazan borea jivitacho marog dakhoilo; vaitt jivit jietolea ghorabeank, Kristi totvanchi zagrutai diunk zaito bhar tannem ghetlo. Kristi totvank patt vollun, bemoriadiche moujen dis sartoleanchem dar bogor-bogor boddoun tankam Kristak zhoddun ghetlim. Logn zainastana bhurgeank zolmank haddleant tankam Logn Sonvskarant ekttailim. Durbollkayek lagun aplea bhurgeank avoy- bapayn gulumam kel'lim tankam soddoun haddlim (G.C 2.4). Sri Lankent Kalvinist sorkaran Katolkank piddapidd diunk kaide kaddlele; dekhik Katolkamnim aplo dhorm Kalvinist sorkari fuddarea mukhar vochun ugtteponnim nakarunk zai also... nam zalear kazar zaunk mello naslem vo her sovloti nasleo; Katolkamnim Kalvinist mondiramnim vochun tanchea dhormik ritimnim vantto gheunk zai aslem; Katolkamnim apnna khuxe add, aplea bhurgeank tanchea iskolamnim ghalunk zai aslem    Bhok. Juze Vazan sogllea Katolkank eK prosidh chitt boroili ani  hea vaittancher nixedh marunk tankam zagrut kele. Toxench dhorm pallunk ontoskornnachi svotontrotai asa mhonn ho'kk porgottun Kalvinist sorkarak ek ukti chitt bhoroili (G.C. 4.4).

Amcho Zobab

Kristi jivit Devak mand'ta toslem ami kortoleanv zalear, Jezun amkam dekh dovorlea ti ami gheunk goroz. Jea Totvank Tannem mol dilem ani tea Totvam pormonnem To chol'lo , tech bhaxen ami-i Kristi Totvancher amchem jivit manddun haddum-ia. Kherit bhaxen promannikponnan ani sotan jieum-ia.

'Tumi sonvsaracho uzvadd' (Mt 5:14) - heam Jezuchea utrancho ugddas korun amche sorbhonvtim axil'lo fottingpo-nnacho, bemoriadicho, nagovnnecho ani choriecho, ekach utran, patkacho kallok kaddun uddounk vavrum-ia. Amcho Kristi uzvadd pa/7e pondak dhampun dovorche bodiek, to peddar dovrum-ia, ani soglleank tacho uzvadd diunk vaurum-ia.

'Sot tumkam svotontr kortolem' (Ju 8:32) - hea utram-nim, Jezun Aplea xisank gulamponnantle meklle ravunk apoile Hi svotontrtai zhoddunk Aplea Utra pormonnem cholunk To Aples xisank apoita; Tachea Utra pormonnem cholta toch, Tacho khorc xis ani govai (Ju 8:31); Toch khori svotontrai zhoddil'lo monis!

Promannikponnan ani Sotan cholun, vaittant ani kallokan axil'leak hat diun suttka diunk vaurum-ia. Amchea lognik jivitar visvaxiponn samballum-ia ani kalloki bemoriadichem jivi sompoum-ia; bebdikaie add zhuzum-ia; lonch magtoleanche nixedh marun goroz zalear thoddo anink tras gheun amcho vai sotan korunk vaurum-ia. Ogi raunche bodiek, amcho tallo ubhc rum-ia. Kallokak xinn'che poros, ek uzvaddachi divli pettoum-ia.

Jezuchea vo Kristi Totvank sakxi diun, aichea somazai ami Kristak hajir korum-ia vo Amich KRIST zaum-ia.  

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.