‘NOKETRAM VORI SONVSARANT ZHOGZHOGAT’

   Pattlim khaim vorsam zalim, Gonvlli Bap Arsebisp Filipe Neri Ferrao, eka-eka Gonvllik vorsak vixoi kaddun apli gonvllik chitt pattoita. Ieta tem voros  kherit bhaxen amchea Goieant tornatteam pasot bhettoilam ani vixoi kaddla to zaun assa-“Noketram vori Sonvsarant zhogzhogat” (Fil 2:15b) Inglez bhaxen “Shine like Stars in the World” (Phil.2:15b)

   Eka Noketrak apunn zhogzhogpachi xokti asa. Toxench ek noketr aple sorv bhonvtonicheank aploch uzvadd ximpddaita. Eka tornattean apleach bhitor Devan dil’li xhokti ollkun gheunk goroz. Noketra bhaxen apleach gunnancho porzoll somazant ximpddaunk goroz.
    Jezu, tornatto koso, zannvaien, piraien ani kurpen vaddlo. Aplea avoi-bapui sangata Noketr zaun, dubavavinn to zhogzhoglo. Toch zaun assa aichea tornatteank Tarancho tara. Aizui Bapacho mog Jezu tornatteank ani ama soglleank ugtto korta. Povitr Snan, Porom Sonvskar, Sondhanacho vo Thiravnnecho Sonskaram vorvim amchech bhitorli zhogzhogpachi xokti zagoita. Jezu puranatlo ek nanvpurtoch (figure-head) urona punn to ani tacho sondex aizui tornatteanchea nirnoiank avahan divpi zata. Ek tornnato/tornattem apunn tara mhunn vhollkun dusream taram,(mhollear dusrim bhava-bhoinna) modem jieta mhunn ollkhunk goroz. Eka tornattean kuddichi, kallzamonachi bhavna bodlopachi vollokh gheun, sot’techer niallun ani sobhavachi akarnni gheun aplech bhitorli girestkai ollkhun ieta.
    Zannvai ami zolma thaun gheun iena punn ti apnnaunk zai. Tornatteani aplea avoi bapai, iadnik fuddari, guru mistri ani adi, hanche khoddchean gheunk zai. Fuddarachi dixa monan dhorun aplo bhes vinchun kaddunk zai ani he bhaxen aplech bhitor asleli zhogzhogpachi xokti zagounk zai.
   Tornatto/ vo tornattem eklim jiena. Tim ghorabeant vangddeam sovem jieta. Munisponnachea natean mulleam ani boreo sonvoio xinkunk ghoroz. Khore ponnim sompork sadhnancho upeog korop, vavrachem mol xinkop, bhavartachea totvamni vaddop ani dhormik sonvoiom paddop  hacher tanche khuxali (welfare) asa.
    Pillgeam modem sombondh toxench vegvegllea lingachea mon’xam modem sombondh hea voxoiancherui lokx galunk ghoroz. Gorjevontank pavop, zannteam ani osoktam sovem doia dakhovop, strilingachea mon’xam sovem man, mog ani moipas dakhovop hem tornatteank sobta. 
    Firgojent, umedin  sevadhormik jivitant vantto gheunk favo. Tornatteanchea zommeani bhitor sorun firgoz jivall korunk vavrunk favo.
    Firgoz ek bhavartacho somudai ghoddun haddunk hat bott ghalop, dhormporgottnechi zababdari vollkun ghevop. Firgojentle proxnn suttave korunk bhasabhas korop. Lhan Kristi somudaiani misoll zaunn eka-mekak urba divop, osli seva Povitr sobha tornatteam koddchean axeta.
    Xiktana ani vaur kortana somajik usko dhorun jievop, favo toslim lok sompork sadhnam hancho upeog korun somajik kalyanne pasot vavrop osli tornatteanchi vagnnunk zaunk zai.
Xantiponnan ekvott haddunk, dhormachea mon’xea modem somvad korunk, hatak hat melloun udorgot korunk tornatteani vavrunk goroz.
    Rajkaronna vixim usko dakhovop, bekarponnachem avhanank fuddo korop, poixeam sovem moriad samballop hem-i tornnattiponnak ghorjechem mhunn manun gheun goroz.
    Maria- Tornatteancho nomunno, Deva mukhar apunn chakornn mhunn apli osoktai ollkhun gheta, dusream thaim adhar dhiun raji zata ani khoxttantlean porian Devak visvaxi rauta- hem Marieche chittr ami amchea tornatteanchea kallzanni konchounk zai.
     Povitr Sobha tornatteanchem mol ollkhun gheta mhunntoch, ami soglleani tornatteanche sokte ani akarnne pasot, ixttagotichea sombondha pasot ani seve-chakrechem mon rochun haddunk, veg-veglleo kariavolli ghoddun haddunk atanch amchea ‘planner-acher’ ghalcheo.  Torrnateam sovem vavrunk soglleank amkam novi umed zaum.

Fr. Olavo Caiado.
(Director, DYC)