Hea vorsacho orthabhorit vixoi Poland desant axil’leam Katolk toxench ier Kristi Sobhanchea protinidhimni vinchun kaddla. Poland desak ghodd ani koddu onbhovan vinnlolo zaito itihas asa. Dusream bollixtt raxttramni hea desacher torekvar zulumxaiechim kupam udeum-xim kel’lim asat. Oslea onbhovan jiel’le he Sobhek ZOIT khub mhotvachem. Tea fuddem, Poland des football khellachi avodd axil’lo des. Europi toxench ontor-raxttrik mollar tannim hea khellacher zaito boro probhav ghala. 2012 - hea vorsachi Europi Football Championship, Poland ani Ukraine - heam desamni zaunchi asa. Khella-mollarui zoitacho onbhov axil’lean hea vorsachea vixoiant, ZOIT – hem utor hea desak khub orthabhorit mhonn disun ieta.

Adlo toxench Novo Korar amkam zoita vixim zaiti xikovnn dita. Sorvespor Dev zoitacho Dhoni mhonn sobar pautt ruzu kel’lem polleunk mellta. Stotramni ami oxem vachtanv: “Sorvespora… Tunch mhozo ddhal! Tum mhojea Zoitacho prokas!’ (3: 3). Deva nanvan zhuzak vetoleam zhuzareank ut’tejon diun Dusre Somurtichea pustokant oxem boroilolem ami nialltanv: “Tumcho Sorvespor Dev tumchea sangatak asa, ani tumkam zoit mello-xem kortolo” (20: 4). Sorvespor Dev, Aplea sevoka Joshuek oxem mhonnta: ‘hea lokak bhieum naka; Hanvem tankam tujea hatant ghaleat’ (Josh 10: 8). Monis bollacher patieun ravona zaunk ani ‘apnnachech xokten zoit melloilam’ – ho somoz porje modlo pois dovrunk, Sorvesporan Gideonachea fuddariponna khal, tin’xim mon’xank gheun, Midianachea, hozaramni axil’leam, loskorancho bhosm kelo ani oxem porjek zoit melloil’lem ani hea zoitacho zapsaldar Apunn ani Aplea hatanchea bavllean zoit vhorun soddvonn mellta mhonn dakhoilem (polle Fudd 7: 2). 

Novea Korarant sobar pautt Jezu Kristachem zoit amkam niallunk mellta: devchari podvecher zoit (Mk 3: 20-30), soimik tollmolleancher zoit (Mk 4: 35-41), patkacher zoit (Mk 2: 5) ani sorv xevttim Mornnacher zoit (Mk 16: 6). Jezu Krist nhoich Apunn zoit melloita, punn torekvar vaittacher zoitivont zaunk xisank bollvont korta (polle Lk 10: 19).  Jezu Kristache xis devchar kaddtat (Lk 10: 17), Piddevontank borim kortat (D. I. 3: 1-10), toxench Bore Khobreche dhiradik porgottnne vorvim Kristachea Punorjivontponnacho bavtto uklun dhortat (Mk 16: 20).

Kristak lagun ami sogllea jin’sachea hal-upodreamni zoit zhoddlolim mon’xam kiteak amcho mog kela Taka lagun heam sorv ghodditamni ami zoitivont (Rm 8:37); Krist amchea zoitachem karonn kiteak ‘Amchea Somia Jezu Krista vorvim Dev amkam zoit ditach’  (1 Kor 15: 57); Amchea zoitachi tenkxi mhollear Jezu Kristachea punorjivotnponnant vantto: ‘Devan Somia Jezuk punorjivont kela mhonn ami zannonv; toxench To amkam-i Jezu borabor punorjivont kortolo ani amkam tumche sangatim Apnna mukhar vhortolo mhonn ami zannonv’  (2 Kor 2: 14).

Jezu Kristachea zoitachea onbhovan Novsornnechem panvl martolean kitem korchem? Toch Povitr Pustokant torekvar upai suchoita. Toxench Kristi Ekvotta voir Povitr Sobhen dil’lo dakhlo Unitatis Redintegratio, ank 7 amkam ekdom borem margdorxonn dita. Jezu Kristachem jivit, Povitr Pustok ani ul’lekh kel’lo dakhlo dolleam mukhar dovrun thoddi sfurti hea atthvoddeant jivitak gheum-ia:

Jezu Kristachem soim, Devachem soim! Punn hi goth tannem axen sambhallunk nam bhogor To ek khalto vinomr chakor zalo (Fil 2: 6. 8) ani Lhanvikaie vorvim zoitacho marog dakhoilo. Konn poilo zaunk sodta tannem nimanno zauncho (Mk 9: 35) - ho adesh Tannem Apleam xisank dilo. Kristi bhavarteam modem ekchar vaddunk ani thir zaunk vhoddponn vo gorv ek vhodd addkholl zata. ‘Hanv vhodd, to lhan; mhoji Sobha niz, tanchi khotti’ – oslem chintop novsornnek addambo ghalta mhonn volkhun gheum-ia. 

Jezu Krist eka chakrachem rup gheta. Xisanche paim dhuta ani seve-chakrechem mol ani mhotv ugddapem korta (Ju 13: 3ff). Sonvsar, podvi axil’lea mon’xak vo dhoniponn choloitoleak chepem kaddta ani to ki zoitivont oxem somzota (polle Mt 20: 25-26). Kristi Sobhamni az dhoniponn naka seva-chakri zai; podvi naka punn nisvarthiponnan apnnakuch ritim kortolim, ani dusreanchi zat-kat pollenastana chakri kortolim udar monam zai. Osli novsornni anvddeum-ia

Jezu Krist sonvsari vostunk patt vollta ani zoit osleam vostuncher nam mhonn dakhoun dita (Mt 8: 20). Devchar sonvsari girestkaient zoit polleta punn Krist Devachea Utrachea bollan zoitivont zata (Mt 4: 4. 6-7. 10). Sasnnik jivitachem zoit axetalea tornnea-dakhtteak Jezu ‘sogllem soddunk apoita’(Mt 19: 21). Sonvsari bhul Kristachea zoitache vantteli zaunk sobar pautt oddchonn zaum ieta (Mt 19: 24). Zo monis sonvsar zhoddta ani aplo otmo ibaddta to nisonntonnacho gulam zata. Kristachem zoit amchem daiz zatolem zalear sonvsari bhulovnneantlean, ap-domavnne vorvim, ami novsornni zhoddunk goroz.

Monis nodren khursachi vatt mhollear khastichi vatt! Punn Jezuchi dixa veglli: oxir  darvonntto sukhi jinn apnnaunk soeg dita (Mt 7: 13-14). Zo monis khuris gheun Jezucheo pattlav korta ani Tache pasot aplo jiv ogddaita taka sasnnik jivitachea zoitachem bhag favo zata (Mt 16: 24-28). Heach pasot sompeponna sodche tallnnentlean ani susti jivitantlean mekllik melloun ami novsornni korunk chodd gorjechem.

Khursachea zoita vorvim Jezu sogllea moniskullak apnna-xim oddun vhorta (Ju 12: 32); moniskullacho ekchar thiraita. Zhoim futti asat thoim Kristachea zoitacho rupkar nam (1 Kor 1: 13); zhoim vegllochar asa thoim Kristachea rupkar nam (1 Kor 12: 27). Dusmankaiecher ani vegllocharacher zoit vhorun ami novsornnechem panvl marunk khub mhotvachem.

Akar naxil’le prithumek ani kallokant buddlolea somdirak (polle Ut 1: 2) Rochnnar Devan Aplea podvedar Utran novem rup dilem. Rochnne voir moniskullak odhikar diun, soglleancher zoitivont zaunk tache bhitor Aple rup, Aplem sarkem ani dievik Boll ghalem. Jezu rochnne thaim korar sambhallta ani Xristintlea khunnacho vapudd korun Bori Khobor porgott’ta ani oso torekvar sanklleamlim bandhun uril’lea mon’xak zoitacho marog dakhoita. Xristi vixim amkam asloli zobabdari vollkhun gheun tichi rakhonn korum-ia ani zulumxai choloun poriavoronn boxttaitolea apsvartheam add zoit melloum-ia.

Kristi Ekvotta Khatir Magnnem korunk dil’lea hea atthvoddeant jivitachea veg-veglleam mollancher zoit onbhovlolim mon’xam koxim jieum-ia. Novsornnechem avoronn pangrun Kristak govai dium-ia. Xekim. borim mul’leam ballgun dovrun Kristi Sobhamni ekchar vaddunk ani oxi ekuch Sobha ani ek hindd ghoddun ieunk magum-ia.