Home

Message from the Archbishop

CP/3206/2010  

Lok Sompork Sadhnanchea Muniarponnachea Disa Nim’tan

Gõy_Damanv Mha-Dhormprantachea Iadnikank, Mottvaxeank,

Lovkikank ani Borea Monachea Mon’xank

SONDÊX

‘Digital’ Jogant Padrichem Muniarponn:

Sobdachê Sevê Pasot Novim Sadhnam

Mogachea Bhavamnô ani Bhoinnimnô,

Mayemogacho noman tumkam

Amchê modem ek novem yug nirmann zalam: lok-sompork sadhnanchem yug tem. Heam sadhnam vorvim ek novi sonskrutay rochon yeta ani ti ek novi vagnnuk magta. Hê sonskrutayê adim anik ek pustokanchench yug ghoddon ailolem; pustokam vorvim ek novi sonskrutay utpon zal’li, amchê dixechem rupantor zal’lem ani amchi vagnnuk bodol’loli.

Atanchea kalllar ghoddon yeta ti sonskrutay tosloch ek zobab magta. Amchea hatamnim, ani kheritponnim amchea tornnatteanchea hatamnim, somporkachim veg-vegllim sadhnam khelltat. Tim bexttim hatiaram nhoi, az vapuddpachim ani faleam kam’ zalea uprant bhair uddoupa sarkhim. Heam sadhnam vorvim kam’ kortanv tem ami chaluch dovorpachem. Tanchê vorvim ami nove-nove sompork sadoitanv, sonvad ghoddun haddtanv, jin’savar sombond ghoddtanv ani vaddoitanv. Hem ek gunnest ani unch dorjeachem karya, jem sompona ani sompunk-ui diunk favona.

Heach sondorbhan ami Devachea Utrachê porgottnnechi ani sonskar som’rombhanchi khobor korchi goroz asa. Him donui karyam Povitr Sobhêk kitlea molachim ani gorjechim tim ami zannanv. Tanchê vorvim Povitr Sobha disan disa ghoddot yeta; tanchê vorvim Povitr Sobha Jezun dil’lem karya vevharant ghalit asa: soglleam porzank ektthaim korpachem ani hea ekvottachi khunna zaupachem karya tem.

Hem karya vevharant ghalchi zobabdari kherit toren padricher poddta. “Kristant ani Krista sangatim ho sombond bandun haddunk dor eka padrik nem’la,” oxem Pap Saiban hea vorsachea aplea Lok Sompork Sadhnanchea Muniarponnachea Disa nim’tan boroilolea Sondexant sanglam. Anik ekê kodden oxem-i tannem boroilam: “Devacho onnbhov aichea kallachea sonvsarak mellunk zai ani adlea kallachi dhormik zannvay ek molachem daiz koxem disunk zai; hem daiz aichea kallant obhimanan jieun odik boro fuddar ghoddunk ek sfurti zaunk zai: sadhnam-tontrachi khôl vollôkh gheun, padri - Devachea mon’xa -

bogor anik konnachean hi gonvllik seva yeuzun vevharant ghalunk zait?”  Ani uprant toch Pap Saib Bhagevont Pauluchea ut’tareantlean tea apounneachi tust korta: “Kiteak ‘Tacher bhavarth dovortat tim sogllim kodinch lojêk sampoddchim nant’: oxem Povitr Pustok sangta (Rom. 10: 11).”

Hea pasot, hea vattharak lagu zata titli akarnni tor korunkuch zai. Hê toyarêk zaiteô bazu asat. Poilê suater, tontranchi ani hanchê velean nirmann zata tê poristhitichi vollôkh; padrinchê novê pillgêk hi odik vhodd zobabdari; ani hi zobabdari pallunk adlê pillgechê padrinchea sohokarachi-i bi goroz asa; heach khatir amchê igorjecheam kocherimni osleô sovloti, mhonnge, sompork tontram asop chodduch mhotvachem.

Hi vollôkh asa tachê itli padriponnachê otmiktaiechi goroz; Pap Saib boroita: “Aplê akarnnechea kallant (padri zaunk sodtolean) heam tontrancho vapor korunk nizponnim ani tontrik gineanan xiklear ho hetu xarthi pautolo; hea xikpa udexim Devakodde ek nirontor sonvad zauncho ani niz devgineani kholayechem ani padrichê thir otmiktaiechem poddbimb zaunchem.”

Oslêch sfurtentlean dusrea dhormanchea pattlavdaram lagim, sotmaninant tanchê lagim, niraxi zaleant tanchê lagim ani sorona toslea sotak otrektat tanchê lagim somjikayên cholunk zatolem. Jeruzaleachea Templant ‘onbhavarteancho zago’ also -- têch porim Web-ant oslo zago asa mhonn manun ghevop chodd gorjechem mhonn Pap Saib amkam ugddas korta.

Hê dixên padrichea muniarponnacher nodor ghalin zalear, ak’khê Povitr Sobhêk chodd mhotvacho zago asa mhonn kollon yeta. Ak’khê Povitr Sobhên hê zobabdarê voir niyall korun ti vevharant ghalunk sodun kaddpachi goroz asa. Hea pasot ak’khê Povitr Sobhên heam sadhnanchi vollôkh ghevunk poilem mullavem panvl gheunk zai. Heam sadhnancho vapor korun Jezuk koso porgott korcho to Povitr Sobhecho proytn zauncho. Zaite amche Gonvlli ap-apleam firgozamni firgoz-potram neamit chhapun haddtat: tust korpa sarkhem panvl tem; hea vavrant zaitea lovkikancho sohokar tankam mellta. Hea panvlant tannim Povitr Sobhechem mon apnnailam ani ek rito zago tannim bhorun ghetla.

Ho vavr odhik girest zaunk amchea Dhormprantik Lok Sompork Kendran hea firgoz- potranchea sompadpeam pasot thoddim xibiram ghoddun haddleant ani tumim zaiteamni tantum vantto ghetla mhonn mhaka khobor mell’lea. Hunhunit xabaski tumkam! Fuddarakui osloch tumcho sohokar astlolo mhonn ami as ballgitanv.

Lok Somporkanchea mollar amchea padrimni, mottvaxeamni ani tech porim loukik bhav-bhoinnimnim odik misoll zaun, hinch sadhnam Jezuchem mukhamoll porzollaupachim yontram koxim tannim vapddunk amche khôl-khôl otrek.  Maria, Jezuchi ani amchi Maim hea sonvsarant aplo Jezu porgott zauncho mhonn otrekun otrekta; oslêch umediche amche-i otrek zaunche. Bhoktivont Juze Vazan tea kallachim sompork-sadhnam vapddun Jezuchem Xubhvortoman porgott kel’lem; aichea kallachea hea ‘digital’ jogant to amkam khorê sfurticho zaum.

Hea vorsa, Lok Sompork Muniarponnacho Dis ami Novembrachê 14ver monoitanv. Hea nim’tan, hea chodd molachea vattharant vavurtoleank ani tanchea sohokariank borem yes magun, soglleancher Devacho upôtt’ axirvad  poddcho mhonn anvddetam.

Arsebispachem Ghor, Ponnjê, Otumbrachi 5vi, 2010.    

                                                                                                     (+ Filipe Neri Ferrão)

 

 

 

 

                                                                                         Gõy-Damanvcho Arsebisp

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.