DEVACHEA   MOGACHO  SOMAROMBH

                                                                                                       Joaquim Vaz

Devachea Mogacho  Somarombh  Merseche  Firgojent  ghoddun  haddlo   Abrilache 9ver  ani  10ver,  2011.  Somarombhacho vixoi zaun  aslo, “Jezuchea mogachea ujean, Devacho mog ximpddaum-ia”.  Hea Devachea  Mogachea  somarombhak  tin ( 3 )  bhag  asle,  te  mhollear  Bhavart  Onbhoulolo, Bhavart  Jiel’lo  ani  Bhavart    Vanttlolo. Ho don disancho somarombh Fr. Saturnino Dias hachea fuddariponna khal chol’lo. Fr Dias-ak ganvchea panch bhav-bhoinnimnim ani  Oidonnche ek bhoinnin sangat kelo.
Abrilache  9ver sanjechea 5.30 vaztam Devachea  Mogacho  Somarombh  suru  zalo. Fr. Clifford Castelino hannem altaranim liplolo kalakaracho bhavarth spoxtt kelo, zaitea zannank hi dakhounn manouli. Ganvchea Padrvigaran Fr. Jose C. Fernandes hannem  hajir aslolea bhav–bhoinnink hea kherit mellaveak vell diun, Devacho mog somarombunk ailim dekhun vakhannlim ani mayemogacho yeukar dilo.

Fr. Mario Saturnino Dias hannem sov vorancher, Bhavart Onnbhovlolo – hea poilea bhagak Khursachi Kuru korun ani soglleam sangata Vixoi Git gavun survat dili.   Bhavarth  onnbhoulolo mhollear  kitem ani  koxe  baxen onbhovunk zata tem  Povitr  Pustokantleo volli gheun, toxench jivitacheo govaiki diun somzonni dili. Devacho mog ami veg-vegllea mon’xam vorvim, tanchea asnneantlean, utrantlean ani kornneam vorvim toxench amche sorv-bhonvtim goddtoleam sobar godditam vorvim onnbhovunk zata tem sid’dh kelem. Fr Dias-achea uloupak Dr Rupa Colaço-n ani Robert Marcelo-n tenko dilo tanche govaike vorvim.
Dr. Colaço-n aplea jivitachi govaiki ditana, Hindu dhorma pormonnem jietalem tedna Jezuk xevunk koxe bhaxen tanetalem ani hi tan bhagounk zaite tras kaddle mhonn sanglem punn xekim Kristanv zaunchem bhag mell’lem tedna ti itle khuxalkaien bhorli ki uddkio marun soglleank porghottunk xem tika distalem. Tea uprant Kristi kuttumbant zolmol’lo, nanvacho Kristanv, vagnnuken komunist punn iadnikanchea ani borea monanchea mon’xanchea adaran Kristak onnbhovunk pavlo ani atam Krista khatir aplem jivit khuxalkaien bhettoita mhonn Robert Marcelo uloilo.
Aikol’le govaikechea adaran dor ekleak mell’llolo Deivik onnbhov vanttcho vell pavlo. Zomil’leank tera zomeanim vanttun ghalim, dor zomeant sumar tis zannam aslim. Ojap mhollear sogllea bhav-bhoinnimnim apleak mell’llolo Deivik onnbhov urben vanttlo. Dor sonchalokan ani chitnisan aplo vavr bore bhaxen samball’lo. Chitnisanim vako vachun zomeannim sanglam tem sobhemazar dovrun bhavarth jivo korunk adar dilo. Fuddem Fr Dias-an vakeancher adarun ek dahtto niall kelo ani axirvad diun 9:30 vaztam poili boska sompoili. Hea disachi manddavoll Mr. Thomas Monteiro-n choloili.
Abrilache 10ver dusrea disa donparcheam 3.30 vaztam Fr. Castellino-n urlelea Altaranchi barik somzonni dili. Hea altaranchi somzonni Fadaran tegam sondexkaram borobor toyar kel’li. Uprant Fr. Dias-an Khursachi Kuru korun ani  soglleam borobor Vixoi  Git gavun dusro bhag, Bhavart  Jielolo, ho suru kelo. “Atam hanv nhoi, punn Krist mhoje thaim jieta” hem Bhag. Pauluchem mon ghevun iadnik bhavan  aplo niyall fuddem vhelo. Fr. Dias-achea uloupak Mrs. Clara Fernandes ani Rosita Sequeira hannim aplea jivitache govaiken tenko dilo.
Mrs.Clara Fernandes, apunn somudayant ani vorgonnik zomeant khas bhaxen misoll zaun aplo bhavarth vanntt’ta. Dusrea pasot vell korun, sosnnikai samballun, piddestank ani gorjevontank adar diun bhavarth jieta mhunn kollit kelem. Uprant Rosita  Sequeira-n apli govaiki diun,  Dotorn xinkoun ani sogllea vellar sot uloun apunn aplo bhavarth jieta mhonn sanglem. Hi govaiki somptoch zomil’lim bhav bhoinnim kalche bhaxen ap-aplea zomeanim gelim ani apunn aplo bhavarth koso jieta to dor eklean vanttlo. Magir chitnisanim  zomeanim sanglam  tacho attap korun sobhemazar dovorlo. Fuddem Fr Dias-an vakeancher adarun ek dahtto niall kelo ani tisrea bhagak 6:15 vaztam survat dili.

Bhavarth vanttop amchem karia mhonn Fr. Dias-an amkam sanglem. Lukachea xubhvortomanachea chovtea avesvorachea adaran  “Sorvesporache mozotichem voros kollit korunk Tannem mhaka dhaddla “(Lk 4:18-19), hea utrancher amchem lokx voddun ghetlem ani aplo niall fuddem vhelo. Hea bhagant Tina Mendis ani Milagrina Gonsalves hannim sangat kelo.
Tina Mendis,  apli  bori  naukri soddun diun, ti Devacho mog  kodd zal’lea bhav-bhoinninche sevent onnbovta. Kodd futtleleam sovem Devacho rupkar polleta ani kodd futtleleank ti novem jivit ditana koxttovtolim tiche udexim Devak polletat.
Tea uprant Milagrina Gonsalves-an apli govaiki manddun apunn Devachea utracher patieun gorjevontank ani konn nasloleank adar dita mhonn sanglem. Ani tanche gorje/pidde velar adar ditanam aplo bhavarth vannt’ta mhonn don jivitacheo goddnneo diun khatri keli. Ani hea uloupa uprant anik ek pauvtt  bhav – bhoinni zomeanim  gelim ani aplo bhavart koso dusreank vanntt’tat tem porgottlem. Hache uprant chitnisanim  soglleanim kelelem vanttop, atap korun  sobhemazar  dovorlo. Hea attapancher addarun Fr Dias-an xevottacho niall kelo. Ani Fr. Castelino-n soglleank dinvastana tornatteanchea vavrachi opurbai keli. Panch tornatteanim chitrantlean aplo bhavarth porgottlo zalear kaim thiravnnechea sonvskarachea bhurgeanim dogam sondexkaram bhorobor vostu vaprun bhavarth porgottlo, toxench  arborics-achi hachi manddavoll korun stotr 8-achem prodoxonn kelem. Toxench dusrea tornatteanim kaim vaddloleam borobor Vixoi Git ani hat chaichem git korun somarombak rong haddlo. Eka Hindu bhavan chitrantlean aplem mon Kristanvam sovem kitem tem spoxt kelem mhonn sangun soglleanche upkar attoile.

Dev borem  korun  mhonnche adim Fr. Dias-a borobor missionari vavrak  bhasanvanni keli ani Parish Mission Team vinchun kaddli. Hea dusrea disachi manddavoll Mr Joaquim  Vaz-an samball’lli.