Halinch amchea Manuel Gomes padri bhavan ek bhov nazuk ani zannvik pustok uzvaddailam. Hea pustokachem nanv “Jezuchim Jivim Kirnnam” Kirnnam suryantlim zhogzhokit bhair sorun thoddich suvat nhoi ponn ak’kho sonvsar uzvaddan lôklokaitat, sogllench uzvaddan bhortat. Kallokh konnak zai ani uzvaddaitolim kirnnam konnak nakat? Jezu amcho surya, hea suryachea kirnnamni jivitacho uzvadd mellta. Pri. Manuel Gomes-an toyar kelam tem pustok amkam gorjechench.

Surya bhonvtim lakhamni lhan-vhodd nokhetram asat tim tea suryachim kirnnam apnnaitat ani kaiborim motyam koxim porzolltat. Tim amchech porim sadem jivit jiyetalim, xegunnamni ani ogunnamni bhorlolim. Punn tannim aplea jivitant Ankvar Mariek aplo nomunno kelo ani tichi dekh gheunk vavurlim Jezuk apnnailo. Ogunni jivit soddun xegunn apnnaile ani borea jivita vorvim tannim sorginchem sukh zoddun ghetlem. Sonvsarant hozaramni santam-bhoktam asat; tanchim jivitam borounk ekech pavttin konnuch xokona. Fattlea vorsamni Pri. Manuel Rottiecher mhoineacho sant mathallean ek-eka santachem jivit toddkean ditalo. Tachem tannem atam pustok kelam. Xabaski amchea pat’tivak.

Hea pustokar fokot 80 jivitam melltat, tanche modem choddxe sant ani bhoktivont ani Maneavont Agnel de Souza ani Juanv Paulu Dusro asat. Tankam Povitr Sobhen azun Sant vo Bhoktivont korunk nant; punn fuddarak kortoli. Dekhun tankam-i hea pustokantlea santam-bhokta modem ghaleat. Pustok vachtam-vachtam Kalljidar Klementin madr madrichem jivit asa, ti santui nhoi bhoktivontui nhoi ani maneavontui nhoi; punn tichem mordivont ani kalljidarponnachem jivit amkam faideachem mhonn sangchi gorozuch na. Hea-i pasot Pri. Gomesak xabaski favoch. Kednam-i tori tankam santacho vo bhoktivontacho man melltoch. Hem tachem ani amchem soponn xat’ti pavchem mhonn soglleancho anvddo.
Dor ek sant ani bhagevont aple dekhintlean amkam kitem tori sangunk sôdta, oso amchea jivitak tancho khas sondêx asta, mhonntoch dor ekleachea jivita sokol ‘Mhojea jivitak’ niyall diiunk Pri. Gomes-an proytn kela. Dor ekleak lagu zatolea disa ek-ekachem jivit dilam. Bhoktivont Juze Vazachem songit nattkulem hea pustokar ghalun bhes borem kelam. Tachea adaran onek songit nattkulim rochum yetat.
Jezuchea jivea kirnnamni visvaxiponnan jiyeun Triek Deva thaim ravun amkam tannim prerna ani sfurti diunchi. Tanchea jivitachi vollokh gheunk hem pustok soglleamni gheunchem, tachem mol fokot 100 rupia.
E. V. Miranda