Mogall Padri – Bhavamno,

Maye-mogan Jezuchi xanti tumkam ek-ekleak otrektam.

Hea Gonvllik Vorsa, Goychea dhormprantant Juze Vazacho tisro mornnacho xekddo monoitastanam, hea vorsa Goychea Saibachea Festacho mukhel vixoy zaun asa:

FRANSISK XAVIER ANI JUZE VAZACHI DEKH GHEUM-YA

KRISTI TOTVANK SAKXI DIUM-YA.

Fransisk Xavieran Jezuchem ‘kenosis” (Phil. 2:6-11) Loyola-Insachea utramnim aikun: “Sogllo sonvsar zoddit ani aplo jiv ibaddit zalear, mon’xak koslo adav?” aplem jivit Jezuchea totvancher adharun (Lk 4:18-19) moro porian tem somorpilem. Jezuchem Nanv ani Soddvonn’nichi bori khobor porgottunk, Povitr Atmeachea preronnan Fransisk Xavier, desam-desamnim ghelo ani aplo jiv, dha vorsamnim zhoroun melo. Sollavea xekddeant, to Goyant kazaram Kristi totvank dhorun tim sarkim manachim ani respetachim korunk vavurlo. Mhohotvache nirnnoy to khot-khotit rat bhor magnnean dukam ghollovn’ Devachea zannvaye ani hukuma pormonnem ghetalo. 

Bhurgeank toxench voddilank kampinn vazoun ektthaim kortalo ani Devachi Bori Khobor “acting” korun sangtalo ani tankam besaum ditalo. Devak kaddun to konnakuch bienaslolo ani khoimsor-ui kottin poristhitin ani kosleai lokam borabor vavrunk sodanch toyar astalo. To Nuncio yezman asun-ui goribayen  goribanchim ani koslei-i lokanchi seva kortalo. Zoxo Jezun aplo vavr fuddem vorunk xis nemle, toxench Francis Xavieran tea-tea gavamnim vochun Jezuchi bori khobor porgottli ani zannim ti somzoun potkorli tankam tannem Xristi dhorm samballnar mhonnun nemle. Zori Francis Xavier ekttoch tore-torecheam lokam borabor vavurtalo tori to aplea vangddeanchim nanvam apleaxim dovorun tanchea soghti Devacho vavr fuddem vortalo. Hea passot Devan taka sorgar mhoimen bhorlo ani sonvsarant tachi kudd legun kusunk dili nam. Juze Vazan-ui aplea jivitan Goyeam-sun Shri-Lankent vochun tore-torecheam bhesamni Jezucho onnbhov team lokam modem ghoddun haddlo ani tankam Jezucheam totvank dhorun tanchem Xristi jivit jieunk kottin poristhitinim tenko dilo. Az porian he amche sorgest bhav sonvsarant amche passot Bapa, Puta ani Povitr Atmea koddem modeosti kortat.

Bhavamno!

Dis danvtat ani amchea Goychea Saibachem Noven-Fest lagim pavot ieta. Tea Festak amchi ani amchea lokachi toyari korchea monan sodanche baxen novenacheam 9 disancho foll kaddunk ami padri ani loukik borabor vaurum-ya mhunn tumkam vinoti kortam.

Novenache up-vixoi oxe manddlole asat:

Budvar: 24vi Novembr 2010

Vixoi: Promannikponnan ani Sotan Jieun, Kristi Totvank Sakxi Dium-ia!

Vachpam: Prok 15: 1-4; Str 97: 1. 2-3ab. 7-8.9; Lk 21: 12-19

Focus: Social ills, Social Apostolate, Face the Challenges with Courage.

Brestar: 25vi Novembr 2010

Vixoi: Bhavartant thirponn sambhallun, Kristi Totvank Sakxi Dium-ia!

Vachpam: Prok 18: 1-2. 21-23; 19: 1-3. 9a; Str 99: 2.3.4.5; Lk 21: 10-28

Focus: Threats to Faith, Perseverance in faith, Ecumenical Concerns

Sukrar: 26vi Novembr 2010

Vixoi: Devachea Utrak Visvaxi Ravun, Kristi Totvank Sakxi Dium-ia!

Vachpam: Prok 20: 1-4. 11-15; 21: 2; Str 83:3. 4. 5-6a. 8a; Lk 21: 29-33

Focus: Importance of the Word of God, Personal Study and Growth in the Word

Sonvar: 27vi Novembr 2010 (Povitr Khursachem Somoronn)

 

Vixoi: Niz Mogan Jivit Bhorun, Kristi Totvank Sakxi Dium-ia!

Vachpam: Fil 2: 6-11; Str 77: 1-2. 34-38; Ju 3: 13-17

Focus: Sacrificial Love, Living for the Other, Fidelity to the marriage covenant.

Aitar: 28vi Novembr 2010

Vixoi: Zagrutai sambhallun, Xanti Vistarun, Kristi Totvank Sakxi Dium-ia!

Vachpam: Iz 2: 1-5; Str 121: 1-2. 3-4a. 8-9; Rm13: 11-14; Mt 24: 37 -44

Focus: Communal harmony, Vigilance at all levels.

Somar: 29vi Novembr 2010

 

Vixoi: Khaltikaien Devacho Alaxiro Bhogun, Kristi Totvank Sakxi Dium-ia!

Vachpam: Iz 4: 2-6; Str 121: 1-2. 3-4a. 8-9; Mt 8: 5-11

Focus: Materialism, Trust in God and not in one’s own Strengths, all I have is God’s Gift.

Mungllar: 30vi Novembr 2010 (Bhagevont Andrechi Porob)

Vixoi: Bore Khobreche Porgottnnar zaun, Kristi Totvank Sakxi Dium-ia!

Vachpam: Rm 10: 9-18; Str 18: 2-3. 4-5; Mt 4: 18-22

Focus: Life Witness, Missionary Dimension, Catechetical Ministry

Budvar: 1li Dezembr 2010

Vixoi: Ekcharan Jieun, Udarponnan vanttun, Kristi Totvank Sakxi Dium-ia!

Vachpam: Iz 25: 6-10a; Str 22: 1-3. 4. 5. 6; Mt 15: 29-37

Focus: Service to Humanity without discrimination, Four Actions in the Eucharist.

Brestar: 2ri Dezembr 2010

Vixoi: Devache Khuxek Aitim Ravun, Kristi Totvank Sakxi Dium-ia!

Vachpam: Iz 26: 1-6; Str 117: 1. 8-9. 19-21. 25-27a; Mt 7: 21. 24-27

Focus: Discernment of God’s will in times of sufferings and other life situations.

Sukrar: 3ri Dezembr 2010 (Porbecho Dis)

Vixoi: Bhagevont Fransisk Xavierache Dekhin, Kristi Totvank Sakxi Dium-ia!

Vachpam: Iz 61: 1-3a; 1 Kor 9: 16-19. 22-23; Str 116: 1.2; Mk 16: 15-20

He up-vixoi monant gheun amcheo toddeo suchnam ani lokak kollovnneo korunk tumche lagim magtanv.

Je konn padri-bhav ami nemtoleanv tea pormannem hanga loka sangatim bhettoil’lea misache yezman astole ani provochon kortole, tannim tea disak dil’lea up-vixoya ani vachpam pormannem provochon ani ier soglem toiar korchem. Lokak Devachea utrachi ruch haddtat, Jezuchea xikovnne pormonnem, ek-ekleachem ani amchea sogleam lokanchem jivit bodlun haddunk faideachim zatolim, toslim zaum-di amchim provochonam.

Soglleank tumkam hea novenacheam misamnim vantto gheunk amchea amontronachi gorozuch nam. Ietat tednam, zata zalear, nemlolea zagear sondhanachea sonvskarak adhar dixat tor ami chodd dinvaxi.

8.15 voranchem (Novenachem Mis) ek-eke firgojent manddavoll korunk hea-ui vorsa anik 9 firgozo vichun kaddleat. Tankam ami kuxin ek kherit chitt daddtanv. 3.45 mis sodanche baxen jinsavar kendrank dil’lem asa.

Amche Arch-diocesint hem voros Bhoktivont Pri Jose Vaz-ak bhettoilam dekun hea vorsa kherit baxen tachech mozotin amchea padrim pasot ani iadniki apounnea katir Novembrache 30ver 3.45 mis Goycho mha-Gonvlli-bap aplea padrim borabor yezman astole. Hea disacho somorombh vodda atmik dobajean ani khotkhotean zauncho; misa uprant amchea vosreant il’li chav-panni gheunk visronakat. Ap-aplim gorjechim vostram haddunk upkar magtam. Toxench Dezembrache 3rer festachea dobajik misant vantto gheunk ap-aplim gorjechim vostram haddchim.

Novembrache 30ver mungllara dis, 10.30 vorancher Ontor Dharmik Mellavo (Inter-Religious meet) astolo, hem-ui tumi chukoinastanam ganvchea lokak kollounchem mhunn magtam.

Dezembrache 2rer, brestara dis, Piddevontancho Dis. Tea sanjechea 3.45 misachi manddavoll Kuttumbik Seva Kendr (Family Service Centre) korteli ani piddevontank pekounni ani ilaz mellcheak kerit magnnem kortoleanv. Hem tumi lokak adlea aitara misancher kollounni korat.

Misam- voir anikui toddi chotrai:

Brestara-dis, Novembrache 25ver, 10.30 Mis aschemnam, kiteak tea disa Cathedralachi Askarin, St. Catharinachem,  festachem mis 10 vorancher, thoimsor astolem.

Sonvara-dis, 27ver, 11.30 vorancher Marathi baxen Mis.

Aitara-dis, 28ver, poilem mis sokallchea 5 vorancher astolem. Magir, 9.30 vorancher, Krista-khatir zoddeo (Couples for Christ) tanchem Mis, ani 11.30 vorancher Tamil baxen mis, 12.30 vorancher Malayalam baxen, ani 2.30 vorancher Hindi baxen.

Budvara-dis, Dezembrache 1ler, 11.30 vorancher Portuguese baxen mis

Brestara-dis, Dezembrache 2rer, 9.30 vorancher Goa Service Team (Charismatic Renewal) hanchem Mis zatolem.

**********

Kristi dhormachim totvam amchea kallzant ani jivitant odik khol rigunk Misachi Bhett – Devachea utracho sevadhorm ani Jezuchea kuddi-rogtacho sevadhorm – zaum-di amkam ek nett ditolo soeg hea povitr bolidanant ami manan ani respetan vantto gheuncheak, ani bhoktiponnan ani bore xant-manddavollin Krist-Prosad xevcheak.

Bhagevont Fransisk Xavierache vinotin, hea Bhoktivont Juze Vazak bhettoil’lea vorsa, ami Iadnik-bhav eka-mekachea mogan, Devachea utrache hurbevont porgottnar zaunk pavum.

Jezu sovem tumcho Iadnik-bhav,

Savio Barreto SJ

Rector

(Borea-Jezuchea Basilikecho Voddil)