Ek Ulo
Ek Ulo
Hê babtint hanv mhozo-i usko ani ulo porgott korunk sodtam. Heô dukhest ghoddnukô, soglleô nhoi zalear mottea promannan tori, vattaum-ietat ani vattaunk amkam zobabdari asa. Hi zobabdari chodd korun mottorsaikol choloitoleamnim ani tech porim fattlea sittar bosun poinn kortoleamnim pallunk nibhel gorjechem. Ani ti mhollear mathear helmet ghalpachi zobabdari. Rostear opghat zaun jiv vochpak mottorsaikol ekuch karann mhonn nhoi; hantunt dusream-i gaddiancho aspav asach. Cholovpi gaddi rostên choloita vo soro pieun ti choloita vo gaddi sarki cholounk nokllo ten’na osleô ghoddnukô ghoddonk xoktat.
Hea sondorbant, rosteachê ieradarê vo traffic-a sombondim thoddeam-xeam mud’deancher ami lokx ghalchi goroz asa.
Poili vost mhollear amchem toxem dusreanchem jivit molachem mhonn ugddas dhorcho. Devan dil’lem dennem tem ani gorjê bhair tem konnacheanuch sonkoxttant ghalunk zaina. Hea pasot ieradarêk bhavartachê nodren pollevpachi goroz. Ami rostear choltana vo choloitana, amkam dusrim mon’xam – amchim bhav-bhoinnam -- bhett’tat: zaum cholun vochpi, zaum dusream gaddiamnim poinn korpi.
Hea vixim, Automobile Club of Italy –hancheam vangddeam lagim uloitana, sorgest Paulu VI Pap Saiban sangloleam utrancho hanga ul’lekh kortam: “Bhav ozunui aplea bhavacho jiv kaddta: zhuzamoidanaruch nhoi, punn rosteancherui, ieradareche kaide to puraien pallina ten’na. Thiraien hanv mhozo avaz kaddtam ani anik ekdam borea monacheam mon’xank ulo kortam: monis-jivitachea dusream vibhagam porim, ho-i (ieradarecho) vibhag Devachea nemam khal ani noitik ontoskornna khal asunk zai; hea khatir nogrik ani Kristi vagnnuk hea-i (ieradarechea) vibhagant odik rigunk zai ani odik disunk zai; hê vagnnukek Xubhvortomanacheam totvanchi -- bhavponnachi, boreponnachi, ekamekak man ani adar divpachi -- sfurti mellum-di. Hea vavrak khand marun asloleam sonsthank hanv nett-hurba ditam: niraxi zaum nakat! Mon’xachem bhitorlem xrextponn xallentuch nhoi punn rostea-xikxonnentui (road education) odik thir zata mhonn zanno zaiat.”
Hêch nodren, amcheam Pri Vigarank, Pri Kurank, Pri Kopelanvank, xikxonn-odhikareank ani kosli-i, kheritponnim tornatteanchê akarnent zobabdari choloitoleank mhozo uskeabhorit ulo: ho mhozo sondêx lokak, kheritponnim tornnatteank pavoiat. Hea sondexant jim totvam ucharleant tim tankam som’zun diat ani hea vorvim Jezuchea nanvan ami vevharant ghaltanv tea gonvllikponnacho labh hea-i ieradarechea vibhagant amcheam xelliamnim ani dusream borea monachea mon’xamnim onnbhovun gheuncho.
Arsebispachem Ghor, Ponnjê, Gõy, Junachi 6vi, 2009.
( + Filipe Neri Ferrão)
Gõy-Damanvcho Arsebisp