‘Devachea Mogacho Somarombh’ --- hea Mission Congress-achea Xevotta Misar

Bhov Manêst Filipe Neri Ferrão Arsebispan kel’lem

Provochon

(Pilar, Febrerachi 8vi, 2009)

VIXOI:  Devachea mogachi khobor hanv ximpddaina zalear, mhojem kotta! (1 Kor 9:16)

Mhojeam mogacheam bhoinnim-bhavamnô,
Don hozar ani sat vorsa, Janerachea mhoineant, Bharatacheam zaiteam potrancher ek sobit, kalliz-movallaitoli khobor chhapun aili --- hea mathallea khal: “Sr. Rani Maria-cho khun korpi bhogsonnem ani sondhan sodta” - “The killer of Sr. Rani Maria seeks forgiveness and reconciliation.”

Hi Sr. Rani Maria konn asli kai? Ani tika konnem ani kiteak jivexim marloli kai?  Sr. Rani Maria Keralachi ek Franciscan Clarist madr asli ani ti Madhya Pradesh-ant gorib loka modem Jezuchem sevê-chakrechem karia fuddem vhortali. Team cheploleam mon’xank voir kaddunk ti bharim vavurtali. Eka disa, 1995 vorsa, Febrerachê 25 tarkhêr,  hi madr ekê bosint provas kortali. Têch bosint poinn kortolea eka pasinjeran, bos thamboun ani Sisterik bosintli zobordostên bhair kaddun, soglleam hujir suri topun-topun tika jivexim marloli. Tachem nanv Samandar Singh aslem. Jen’na lokan tachê lagim vicharlem ho itlo nixttur khun tannem kiteak kelo kai mhonn, tannem oxem mhollem khoim: “gorib loka modem ti misionari vavr korta dekhun mhojea kallzant ticho rag-krodh xiztalo. Tea bhair, eka mhojea ixttan ho khun korunk mhaka uskailo.”

Hea khunak lagun, Samandar Singh-ak akhea jivitachi bondkhonn favo zali. Bondkhonnint astana, ken’na-ken’na taka ek padri bhett korunk vetalo: padrichem nanv aslem Swami Sadanand. Sat vorsam uprant, 2002 vorsa, hea krimidorachea jivitant ek mullavik bodlop zalem (there was a radical conversion in his life). Hê madrichi khaxa bhoinn, Sister Selmi Paul, aplê bhoinnicho jiv kaddlolea krimidorak tachê bondkhonninit bhett korunk geli, tachê lagim mogan uloili, taka bhogsonnem dilem ani, tachea hatak rakhi bandun, aplo bhav koso taka manun ghetlo. Eka vorsa uprant, Sr. Rani Maria-chi avoi ani bhav, têch porim, hea krimidorak bhett korun, taka bhogxilo ani aplo put ani bhav koso taka ghetlo. Thoddeam mhoineam uprant, Sr. Rani Maria-cheam soglleam ghorcheamnim ani, tea bhair, tichê Vhoddilinin ani tichea Bispan ek kherit vinovnni-potr (petition) korun, Madhya Pradesh-achea Rajpalak dhaddlem. Hea potrant tannim sanglem ki  Samandar Singh-an apli chuk ollkhun ghetlea, aplem jivit tannem bodol’lam ani tannim soglleamnim taka bhogxila mhonn; heach khatir Rajpal-anui taka suttka diun ek nem’ bhair kaddcho mhonn tannim magnnem kelem. Rajpalan tanchê vinovnnêk kan diunkuch na tem polleun, thoddeam vorsam uprant, Kerala thaun Madhya Pradesh porian provas korun, Sr. Rani Maria-cho avoi-bapui, bhav-bhoinni ani tanchê borobor tichi Vhoddilin tea Rajpalakodde  porxim ulounk gelim ani portun aplem magnnem tachê mukhar ghatlem. Ten’na tea Rajpalan tankam kitem sanglem zannant tumi? Tannem oxem mhollem khoim: “Oslem bhogsonnem fokot tumchean, Jezucheam xisanchean diunk zata! Tea mon’xak bhogsonnem favoch nhoi. Punn tumchê vinovnnêk lagun hanv taka suttka ditam!”

Samandar Singh-an bondkhonnintlo bhair sortokuch aplem jivit khoreanich bodol’lem, aplem nanv pasun bodol’lem. To Bautism gheunk sodtalo ani tannem Paulu mhonn novem nanv ghetlem. Atam to fokot dusreank borem korunk sodtalo. Eka disa to tea padrik mellunk gelo ani taka sanglem ki apnnak gom’lam tê Sistericho zantto bapui chodd boro na mhonn ani hea khatir apunn Kerala vochunk sodta taka bhett korunk; ani apnna borobor ie mhonn tannem tea padri lagim maglem. Madhya Pradesh thaun Kerala vochunk tannim train dhorli. Gaddiên provas kortana, tea padrin, Swami Sadanandan, Samandar Singh ek sobit kornni adarta ti polleli. Ratchea vellar, ek bhikari-oslo monis sokla nhidlolo ani hinvan ankuddtalo to polleun, Samandar Singhan khoim aplem khomis ani aplem pangurchem kaddun tea mon’xak dilem ani apunn rat bhor ang pangrinastana ravlo. Itlem khôl tachea jivitachem bodlop (conversion) zalem!
Bhavam-bhoinnimnô, heam tin disamnim ami hea Mission Congress-ant Devacho mog onnbhovla ani somarombhla. Amchea-i jivitant koslem na koslem bodlop zalam. Amchem jivan’karia (life mission) odik hurbên vengounk amkam nêtt mell’la. Samandar Singh-achi kotha aikun, amchea monant goddie zaite vichar ietole:

Sr. Rani Maria, aplo ganv ani famil soddun, moro porian, goribanchi seva korunk kiteak geli kai? Tea krimidoran tika jivexim marloli astana, tea padrin, Swami Sadanandan, oslea nixttur mon’xak  kiteak bhett keli kai? Sr. Selmi Paul, Sr. Ranichê bhoinnin, aplê bhoinnicho khun kel’lea khaxa mon’xak bondkhonnint bhett korun, taka bhogsonnem diun, taka kiteak rakhi bandli kai? Eka vorsa uprant, te Sisterichê avoin ani bhavan, têch porim tea khunik bondkhonnint bhett korun, aplo put ani bhav koso taka kiteak manun ghetlo kai? Ticheam ghorcheamnim ani tanchê borobor, tichê Vhoddilinin ani Bispan Madhya Pradesh-achea Rajpalak kiteak mhonn vinonti-potr pattoilem kai?

Hem sogllem tannim kelem ekach karonnak lagun:  Devacho mog tannim onnbhovlolo taka govaiki diunk, Devachea mogachi goddsann tea mon’xak pavounk, apnnem ghetlolo Devachea mogacho onnbhov tea krimidorachea jivitant otounk. Ani hea tanchea mogachea onnbhovacho porinnam koso, Samandar Singh aplem jivit bodlunk pavlo ani hoch mog dusreankui vanttunk tannem atam suru kelam.

Bhoinnim-bhavamnô, heam tinui disamnim, ami heach Devachea Mogachi khobor kelea, heach Devacho mog ami onnbhovla, somarombhla ani hea mogache khasgi onnbhov ami ekamekak vanttleat.  Amcho Dev sorv mogachi zhôr ani bhorti. Ani ho Dev aplo mog  orombhak thaun zaiteam bhasamnim akhê xrixttichêr otoit aila; kherit bhaxên mon’xank ho aplo mog to diit aila.

Oslench kitem ami aichea poilea vachpant aikolam. Jobachea jivitant zaiteô avgoddaieô ailoleô. To Deva lagim oxem uloita: “Mon’xachem jivit hea sonvsarant ek bharadik ojem nhoi? Ani tache dis eka koxttovtolea vavraddiache koxe nhoi?” Torui astana, teach avesvorant, apleam avgoddaiam ani koxttam modem Devak ulo korun, Job udgarta: “Monis konn ga? Kiteak mhonn tum tachi itli porva kortai ani tuje dolle tacher unch kiteak dovortai?” Ho zaun aslo Jobacho khasgi onnbhov Devachea moga-vixim.

Khorench, mogall bhavam-bhoinnimno, Devan orombhak thaun aplo mog zaiteam bhasamnim xrixtticher ani bhov korun mon’xancher otoilo ani, kall bhorlo ten’na, aplea Puta Jezu udexim ho mog tannem subhamponnim dakhoilo. Hoch Devacho mog Jezu vanttit ani otoit gelo mhonn aichem Xubhvortoman  amkam ugddas korta.

Aichea Xubhvortomanant Jezu devsthanant xikoita to amkam dista. Devacho, aplea Bapacho, mog to porgott’ta --- nhoi fokt utramnim punn kornneamnim-i bi. Tea devsthanant aslolea, mello atmo boslolea eka mon’xak to boro korta: hê toren, ekê kornnê udexim to Devacho mog tea mon’xak vanttun dita. Devsthanantlo bhair sorlea uprant, Jezu Pedruger veta, tachê sasuk bori korta ani uprant zaiteam piddestank ani devchar bosloleank to borim korta. Bapacho mog, zo aplê sovem khotkhot’talo, ghosghostalo, to dusreank vanttit bhonvta.

Ani dusrea disa, bhov sokallim, ekê eksurê suater vochun, Jezu magnnem korta, aplea Bapakodde aplea mogacho sombondh to kholaita --- zo Bapacho mog to mon’xank vanttunk ailolo to apunnuch odik kholaiên onnbhovta ani apnnaita. To magnnem korta astana, tache  xis taka ieun sangtat: “sogllo lok tuka sodta!” Ani Jezu tankam sangta: “Ami dusream ganvamnim-i bi vochunk zai, Bapacho mog ami dusream gramamnim-i bhonvun porgottit, ximpddait vochunk zai.” Hê toren, ganv-ganvamnim bhonvun, Jezu provochon korit ani devchar kaddit veta: udarponnan, utramnim ani kornneamnim Bapacho mog to otoit, vanttit veta!

Bhavam-bhoinnimnô, aichea Xubhvortomanant, Jezuchea jivitacheô don mullaveô  bazu amkam disun ietat: poili bazu mhollear, Bapa lagim tacho khôl mogacho sombond (profound intimacy with and deep-rootedness in his Father). Ani to Bapachea khôl ekcharan jietalo dekhun, tachea jivitachi dusri bazu mhollear,  dusream pasot apnnem kel’lem mogachem ap-dan (self-gift of love).

Hench korunk, mhonngê, aplem mogachem jivan’karia mon’xam modem chalu dovrunk, Jezu apleam xisank apoita, tumkam ani mhaka  to vinchun kaddta. Hea sonvsarant aplea Bapachea mogacho onnbhov vanttunk ail’lo ten’na, Jezun amcheam osleam mon’xank vinchun kaddle. Poilê suater, “ieat ani polleiat” mhonnun, to tankam apnna borobor jieunk ani apnna lagim xikunk apoita. Aplo ani aplea Bapacho onnbhov korunk to tankam apoita. Ani uprant, “vochat ani porgottat” mhonnun, to tankam hea onnbhovache vanttpi, hea Bapachea mogache govai zaunk pattoita.

Oslo ek khoddegantt ani porzollit govai zaun gelo Bhagevont Paulu, zachi khobor ami aichea dusrea vachpant aikolea. Tachi kotha ami zannanv.  Saulu Jezucho ek famad dusman also. Jezuchem nanv porian tachean aikunk zainaslem. Tachi ekuch itsa mhollear Jezucheam xisank piddapidd divop. Ani osleach kamant to buddlolo astana, Damaskusachê vatter to astana, khud Jezu tachea jivitant bhitor sorta. Saulu avchituch ek vichitr tallo aikota, ek kherit uzvadd to dekhta ani tea uzvaddan to kudd’do zata. Hoi, kudd’do zata, kiteak atam Jezu taka ek novi dixa diupacho asa. Khorench, Sauluk tea disa ek novi nodor mellta, to ek novo monis zata, Jezu taka ek novi hanvki (identity) dita. Saulu asa to Paulu zata. Tea disak thaun, tachea jivitacho husko dusroch zata: “hanv atam jietam to hanv nhoi; tor Krist mhojê thaim jieta” (Gal. 2:20); Krista virêt mhojea jivitak orth na; “mhaka jivit mhollear Krist” (Fil. 1: 21), tor  Jezuk odik kholaiên ollkhunk, tacheam koxttamnim vantto gheunk, tachea punorjivontponnachem boll onnbhovunk ani oxem odik ani odik Jezu sarkho zaunk, itlench hanv otrektam (polle Fil. 3:10).

Khorench, jea mapan Paulu Jezucho mog onnbhovta, teach mapan tachem kalliz Jezuchi Bori Khobor porgottunk xizta, ulpota! Aichea disacho vixoi hachoch amkam ugddas korta. Paulu mhonntta: “Xubhvortoman porgottchem kam’ mhaka vhoddvik nhoi, to mhaka ek kaido! Tem hanv porgott korina zalear, mhojem kotta!”(1 Kor 9:16). Ani tem porgottunk hanv soglleank sogott zatam; svadin zaun-ui, gulamank zhoddun gheunchê khatir, hanv soglleancho ghulam zatam; osoktam borobor hanv osokt zatam, roddtoleam borobor hanv roddtam; hanstoleam borobor hanv hanstam --- mhozo anvddo ekuch: soglleank Jezu diunk!

Hench Bhagevont Fransisk Xavieran kelem. Hench Bhoktivont Juze Vazan kelem. Hench Maneavont Padr Agnelan kelem. Hench Gõycheam itleam misionari putam-dhuvamnim kelem. Jezun diloli Bapachea mogachi khobor aikolea ani manun ghetlea uprant, veta thoinsor hi khobor porgottunk tim gelim.

Bhoinnim-bhavamnô, hench amchê sovem, tumchê sovem ani mhojê sovem ghoddonk zai mhonn heam tin disamnim ami onnbhovlam. Ami Devachea mogachea onnbhovant odik kholaiên rigunk ani vaddunk chodd gorjechem. Hem ami konn bhaxen kortoleanv tem ami kherit bhaxen pollelam. Paulu, Fransisk Xavier, Juze Vaz ani Agnel de Sousa – hanchê bhaxen ami Devachea mogachea onnbhovan vaddun vetoleanv zalear, amchea jivitant thodde-xe otmik upai ami gheunk zai. Poilo upai mhollear magnnem: zaum khasgi, zaum kuttumbik, zaum somudaik magnnem. Dusrê suater, ami visvaxiponnim Devachem Utor aikun, tacher niall korun, Devachea mogacho onnbhov kholaunk chodd gorjechem. Tisrê suater, Jezucho Gutth sonvskaramnim – kherit bhaxen Misachea Bolidanant – bhoktin  somarombhun, Devachea mogacho onnbhov ami kholaunk chodd gorjechem. Ani chovtê suater, amchea dispott’tea jivitant ami onnbhovlolo Devacho mog dusreankui vanttun diunchê khatir, amchea Bhavartachi akarnni chalu dovrunk chodd gorjechem.

Jea mapan ho Devachea mogacho onnbhov ami kholaitanv, jea mapan Jezuchea mogacho uzo ami peroitanv, titlê odik hurbên ami Jezuchem misanv, tachem  jivan’karia amchea jivitant chalu dovortoleanv. Konn bhaxen tem amchean chalu dovrum-iet? Zaiteam bhasamnim (in ever new and creative ways)!  Poilê suater, amchea jivitachê govaikê udexim, amchea dispott’tea jivitant hea Devachea mogachim hurbebhorit sakxidaram koxim jieun. Dusrê suater, amchê sevê-chakrechea jivita udexim; hi seva-chakri zaiteam bhasamnim amchean korum-ieta: xikxonna udexim, piddestanchi seva korun, niti-sota khatir vavrun, xantichem vatavronn rochun haddun ani tem mozbut korun, oxem jin’sam bhasamnim hi seva amchean chalu dhorum-ieta. Tisrê suater, su-sonvad (dialogue) amchê modem vaddoun – soglleam mon’xam lagim, dusream-i dhormancheam pattlavdaramkodde bhav-bhoinnponnache ani pritimogache sombondh ghôtt korun, hi Bori Khobor amchean porgottum-ieta. Amcheam utramnim osli porgottnni korunk amkam kitle-xech soeg melltat. Bhavartachi akarnni amcheam bhurgeancheam-tornnatteancheam kallzamnim visvaxiponnim korunk: hench Jezuchi Bori Khobor porgottpachem kam’.  Hê toren Devachea mogacho onnbhov dusreank porgottpachem kam’ amchean chalu dovrum-ieta.

Oslem kam’, bhavam-bhoinnimnô, ami khoim-khoim  korpachem?
Poilê suater, amcheam ghorabeamnim tem suru korunk favo. Dusrê suater, amchea xezarea, Lhan Kristi Somudaiamnim tem korunk zai.  Tisrê suater, amchea somazant, amchea vavra udexim -- zaum somajik, arthik,  rajkornnik ani sonvskrutik mollanr -- hem Jezuchem kam’ amchean chalu dovrum-ieta.  Ho Mission Congress  sompoitana, amchi nodor amcheam fuddleam panvlancher asa. Him panvlam Bhagevont Ankvar Mariechea, amchê Sorginchê Avoichea hatant ghalum-ia. Aplea Putak aplem misanv pallunk hê tachê ani amchê Avoin lagxilo adar-sohokar dilo. Tachea bhovxik jivitant (public life) Bapachea Mogachi Bori Khobor porgottunk Jezuk otmik tenko diunchê-diun, apleach jivitant tinnem ho Devacho Mog chaklo, apnnailo ani ho aplo onnbhov ti dusreank vanttit ravli. Kana ganvant eka ghorabeant tinnem to vanttlo.Aplê mauxê-bhoinnik bhett korun tinnem xeza-samara to vanttlo. Aplo Put khursar mortôch, poilêch Povitr Sobhêk gheun tea Apostlanchea lhan somudaiant to vanttlo. Ankvar  Mariêk amchea sangata gheun, Bhagevont Paulu bhaxên, Bhag. Fransisk Xaviera bhaxên, Bhoktivont Juze Vaza bhaxên,  Maneavont Padr Agnela bhaxên ami-i  hurbebhorit Devachea Mogache  govai ani sakxidar zaunche mhonn hea Misant khotkhotean Bapa lagim magum-ia.