BHUKÊ ANI PIDDÊ ADD MOHIM
Korezmantlo Panchvo Aitar – 29vi Mars, 2009

SONDÊX

XANTI  ANI  SUMÊLL

    Aichea somazant soglleakuch hinvsa (violence) dixtti poddta: krimi, monis-hok’kancho goir vapor, fottovop, toxench hea ani tea karonnak lagun zhogddim. Sumêll (harmony) pois bhonvta-so dista. Ani rajki monis hacho chodd faido kaddta: il’lo-so pasun vegllochar asa thoim, taka dhormancho, zatim-katincho ani her osleam somajik bedhancho rong laun, mon’xam modem duspott upzoita ani hatuntlean aploch adav zoddta. Moniskullak chintpachi xokti asa. Borem vaitt hachê modem forok somzopachi tika kapxi asa. Jen’na moniszat xanti soddun hinvsechê vatten poinn korta, ten’na ti aplea soimbacher add veta. Hinvsê udexim monis aplem ievzopachem boll visorta. Khorem mhollear, hinvsa ani zhuz xanti nhoi, punn moronn ani nisonnton viktem ghetat.

    Xanti mhollear ek zhuza  viret sthiti, oxem nhoi; xanti zaun asa nitichem foll. Ami niti khatir vavurtanv ten’na --- magir tem amchea khasgi vo somajik vo sonvsthik jivitant zaum --- amkam xanticho onnbhov mellta. Xantichi vatt hinvsechim sogllim rupam sompoita. Xanti mhollear ek boreponnachi poristhiti, zhoim apleach thaim toxench dusream thaim zoddlolo sumêll vosta.
    Amchê modem sumêll utpon zaunk, amchim toxim dusreanchim-i motam asat mhonn ami sodanch mandun gheupachi goroz asa. Dusream sombondim ami khoinchea panvddear urtanv tem topasunk sodanch faideachem. Dusreanchê nodrentlean gozali polleunk khubxe pavtti adarachem zata. Dhormik gozalincher vo rajki sombondancher apleach motak chittkun ravlear xanti ani sumellachi kolpona chalik lavpachi mon’xachi tank unni zata. Amchim veg-vegllim motam ugtim korunuch sot kitem tem ami zanna zaunk xoktanv.
    Anikui mhollear, dusrean kelolo okman thodde pavtti visronk kotthin zata. Sumêll zoddpacho anik ek mhotvacho bhag mhollear bhogsonnem. 
    Upas ani magnneachea adaran lok ekttaim ieta. Tanchê udexim zoitachi ek nodor mellta ani xanti nirmann zata. Hi xanti, upas ani magnnem korpi monak poili favo zata ani xevttim  ghorabeank, somudaiank ani purai raxttrak gavta.
    Amcheam firgozamnim, xallamnim ani her dhormik sonvsthanim xanti ani sumêll ghoddon ieunk khup vavr zaunk zai. Amcheam gonvllik bhettam somoiar protêk firgojent hea vixoia sombondim ami sodanch tumkam ugddas kela. Hea vavrant ieram dhormancheam mon’xam sangata vavrunk ami kheritponnim ulo martanv. Ekamekacho adar gheun xanti ani sumêll rochun haddunk ami vavrum-ia!
     Prachit Kallachea Panchvea Aitarachem ‘collection’ xanti ani sumêll sthapchê khatir ami vapuddtoleanv. He poixe ‘Caritas-Goa’ – hankam hea vorsachê Maiachê 6ver  porian patthoun dinvche. Jezu Xanticho Kunvor. Povitr Tritvê modem ut’tom torecho sumêll vosta. Amchea somazant xanti-sumêll ghoddun haddchê khatir sogllea bollan vavrunk amkam Povitr Tritvecho sangat asach.

 Arsebispachem Ghor, Ponnjê, Gõy, Marsachi 20vi, 2009.

                   ( + Filipe Neri Ferrão)                                     
                Gõy-Damanvcho Arsebisp