Mha-dhormprantachea Iadnikank, Dhormikank ani Kristi Loukikank
Iadnikachea Vorsa Somoim
(Inglezintlean boroilolea CP-Cir/184/2009 – hea Prosidh Potracho odhikrut onnkar)

Mogacheamnô,
 Benedit XVI amchea Pap Saiban halinch Iadnikachem Voros porgott kelam; tem to hea mhoineachê 19ver, Jezuchea Bhou Povitr Kallzachea Dobajik porbê disa suru korun, 2010 vorsa Junachê 19ver, Roma xharant, Iadnikancho Vixv Dis monoun sompoitolo. Bhag. Juanv Marie Vianney – hea Pri. Vigaranchea Askareachea mornnachem 150vem voros somarombhun, hem Padrichem Voros tharailam. Heach vorsa, Pap Saib Bhag. Vianney-k soglleam Iadnikancho askari mhonn porgott korcho asa.
       Iadnikam khatir Vatikanant Khatem asa tacheam vangddeanchê ekê zomatint uloitana, hem Padrichem Voros porgott korpachem aplem mon Benedit Sollavean spoxtt kelem; noitik promanikponna khatir “dor eka iadniki niz kallzant” usko asa ani zhuz cholta mhonn tea vellar tannem ugddas kelo. Hem motint dhorun, “Iadnikanchea muniarponnachem ies, soglleam vostum poros, tanchea otmik promanikponnacher dhorlolem asa: hem promannikponn zhoddunk nett diupa khatir” hem kherit voros porgott kelam mhonn Pap Saiban sanglem. Tech porim, Iadnikam ani tanchê suadhin kel’leam somudaiam modem ekvott ani ixtagotiche bandpas asat te odik thir korunk ani oxem hea adhunik somazant Iadnikachem karia ani misanv vollkhunk ani somzunk Povitr Sobhek adhar zaunk hem voros tharailolem asa. Tor hem voros kheritponnim iadnikanchem, iadnikam khatir ani iadnikam sangata prarthon korpachem voros ani Katolik Povitr Sobhechea Iadniki Vorgachea toxench ek-eklea iadnikachem otmik novsornnechem voros tem zatolem. 
 Pap Saibacheam bhavnnank protisad diun ani ak’khê Povitr Sobhechea ekvottan, amchea-i Mhadhormprantant sobo sarkem Padrichem Voros ami somarombhunk sodtanv. Ars-achea bhagevont Gonvlleachea Utsovik Vorsa nim’tan hi ghoddnuk tharailea tem monant dhorun, amchea Mhadhormprantant he somarombh ieta tea Agost mhoineant, to sasnnik jivitak zolmolo tea 150vea vorsa somoim (Agostachê 4 tarkher vo khoinchea-i lagxilea disa) ami monoitoleanv. Hem Iadnikachem Voros bhor ek follvont kariavoll ieuzopachem ani vevharant ghalpachem karia ami Diocesan Committee for the Ongoing Formation of Priests - hichê suadhin kelam. Padrichea hea Vorsa, Gõychê Povitr Sobhechea jivitant upott follam utpon zanvchim mhonn soglleamnim – ek-eklean zaum ektthaim zaum – monapasun magchem mhonn Iadnikank, Dhormikank ani Kristi Loukikank hanv ulo kortam.
 Hem kherit Utsovik Voros somarombhunk toiar zatana, Jezuchea Iadnikponnant vantto gheunk bhag mell’loleam bhagevontanchi, kheritponnim, Bhag. Juanv Vianney ani amcheanch Bhoktivont Juze Vaz ani Maneavont Agnelo de Souza – hanchi mozot magum-ia. Heam bhagevontamnim kherit bhaxen amchea Mha-dhormprantachê Povitr Sobhek margdorxonn diunchem, tinnem sonvskarlolea muniarponnak umedin tenko ani dhir diunk ani apleam iadnikank, tannim kallzan ani otmean ani novea nettan, Povitr Sobhek ani Somazak lagtolea aplea misanvak  veng marchê khatir tinnem adar diunk.

       Arsebispachem Ghor, Ponnjê, Gõy, Junachi 6vi, 2009.

                                                                                         Soi/-
                                                                            ( + Filipe Neri Ferrão)  
                                                                       Gõy ani Damanvcho Arsebisp