Home

Zefania Chapter 1 - Povitr Pustok Revised - 2010

1
Judacho raza, Amon, hachea Josia putachea kallar Sorvespora-chem utor Zefaniak kollit zalem, Hezekiacho put Amaria, tacho put Gedalia, tacho put Kushi ani hacho put Zefania.
2
Prithumecher asa titlem-i Hanv sarkoch zhaddun uddoitolom uloita to Sorvespor!
3
Mon’xank toxench mon’zatink, varea voilea suknneank ani doriantlea maslliank Hanv zhaddun uddoitolom, khotteank khala uddoitolom ani prithumecher jietolea sogllea lokank zhaddun nanch kortolom - uloita to Sorvespor!
4
Judacher add ani Jerusaleant jietolea soglleancher add Hanv Mhozo hat ubartolom, ani hea zagea velim Baalachea urloleank Hanv zhaddun uddoitolom; tachea iadnikanchem nanv porian,
5
ani jim konn mollba velea noketrank nomoskar korunk pattosancher sorpôtt poddtat, ani jim konn Sorvespora somôr saxttangim poddtat khorem punn Milkomachea nanvan soput ghetat,
6
jea konnem Sorvesporak patt kelea, jim konn Sorvesporak sôdinant ani Tachi budh ghenant, tankam soglleank Hanv zhaddun uddoitolom.
7
Dhonia Sorvespora mukhar gopchip ravat, karonn Sorvesporacho Dis lagim pavla! Sorvesporan êk iôdn toiar kela; hea iodnak Tannem Aplea pavnneank kuxin kaddun dovorleant.
8
Sorvesporachea iodnachea Disa, odhikariank, razkunvrank ani videxi koxe nhestolea soglleank Hanv khast laitolom.
9
Tea Disa, voir Panvddear choddtat ani aplea dhonianchem Mondir zuluman ani fosovnnen bhôrtat, tankam soglleank Hanv khast laitolom.
10
Tea Disa uloita to Sorvespor! Masllechea Darvonttea thaun boball aikum ietolo, Novea Vaddeant sottiam vilap ani dongram thaun motto ghoddghoddatt.
11
Xarachea sokoilea vaddeant ravtoleamnô, rudon korat, karonn sogllea vepariancho nas zalo, ani rupeacho dhondo kortat tea sorvancho vinas zalo.
12
To vêll ietôch, divliô pettoun Hanv Jerusaleachi vaspus kortolom ani jim konn soreachê murint santthun asat, jim konn Sorvesporachean kãich korunk zaina, borem vô vaitt, oxem aplea kallzamnim mhonnttat, tankam soglleank Hanv khast laitolom.
13
Hea pasot, tanchê dhon-girestkaiechi lutt laitole ani tanchim ghoram-daram padd kortole. Te ghoram bandtole, punn tantunt jieunk pavche nant; te dakanche molle roitole, punn tancho soro pieunk pavche nant.
14
Sorvesporacho Vhoddlo Dis lagim pavla, sarko lagim asa, begobêg ieta. Sorvesporachea Disacho avaz kitlo mhonn koddu-koddu! tea Disa êk zhuzari porian kampun killônch martolo.
15
To Dis mhollear Dis krodhacho, Dis sonkoxttancho ani hal-upodreancho, Dis ghorttanacho ani desvattecho, Dis kallokhacho ani nirxevnnecho, Dis mollbhotticho ani datt mhureacho,
16
kottam-kil’leanchea xarancher add ani unch konnxea-gopurancher add tuturechea tthonnthonnit avazacho ani zhuzachê haletticho.
17
Mon’xakullacher Hanv osle hal-upodre dhaddtolom ki kudd’ddeam vori tim kallokhant sanspun vatt sôdtolim, karonn tãnnim Sorvesporacher add patok kelam. Dhul’li vori tanchem rogot vhanvtolem, ani xenna porim zatolim tanchim moddim;
18
Tanchea rupeak nhoi mhonn bhangarak tankam vattavunk tank aschi na. Sorvesporachea krodhachea Disa, soglli prithum’ Tachea premaxechea ujean zollon vetoli. Karonn prithumer jietolea soglleancho To nas kortolo, Tanchem sarkem nisonttonn korun uddoitolo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.