Home

Vilap Chapter 1 - Povitr Pustok Revised - 2010

1
Kottakotta! Koxem eksurem tem boslam, ekdam lokan chikar bhorlolem xar! Adim raxttram modem vhodd aslem tem atam vidva koxem zalam! Magam prantam modlem prodhan, aiz dusreank dôndd farik korunk pavlam!
2
Roddnnem korun tem ak’khi rat sarta, tachea poleancher vhanvtat dukancheô zhori. Taka bhuzvonn diunk tachea mogiam modem konnuch na. Sogllea tachea ixttamnim tacho ghat ghetla ani te tache dusman zaleat.
3
Bhorpur koxtt-dogd sôslea uprant Judas pordesant pavlo. Atam raxttram modem dis kaddta, punn thoinsor visôv taka mellona. Zoim taka fuddem vochunk vatt na, thoim dhumallo diupi taka dhôrtat.
4
Sionacheô vattô rudon kortat; atam tichea utsovank konn iena. Tichea darvontteantlean ietim-vetim konn na; tiche iadnik haskar-suskar sôddtat; tichim tornnattim cheddvam khontibhorit zaleant; khonti-dukhint ti sarkich buddlea.
5
Tiche dusman atam tiche dhoni zaleat, tichea xotrunk ies mell’llam; tichea hixôb-naslolea opradam pasot Sorvesporan ticher koxtt-dogd dhaddleat. Dusmanam mukhar tichim bhurgim nirvasant pavlim.
6
Jerusaleachi mhoima soglli atam ubun geli. Chorôv mellonastana osokt zal’lea mervam sarke zaleat atam tiche fuddari. Xikarekara mukhavele par kaddun vetana, dhanvtam dhanvtam te vatter sarkech thokleat.
7
Aplea konixttaiechea ani odruxttachea disancho Jerusalem ugddas korta. Dusmananchea chopkeant porza poddtôch, tika adar diunk konnuch na zalo. Ticher nodor ghalun tiche dusman tichea nisonttona pasot hansunk lagle.
8
Jerusalean vhodd patok kelem, itlem ki ti bhoxttovl’li zali. Jim konn tika man-adôr ditalim, tichem vinglleponn polleun tinch atam tichi beporva kortat. Ti apunnuch vhoddlean pinrgota ani aplem tondd dusrê vatten vôllta.
9
Tichim burxeponnam tichim vostram mhelloitat: aplo xevôtt oslo zait mhonn tinnem chintunkuch naslem. Itli sokol ti xevttun poddlea, punn tika buzvônn diunk konnuch na. ‘Mhojê konixttaiecher dixtt ghal, Sorvespora! mhozo dusman zoitivont zala!’
10
Tichi soglli dovlôt dusmanan aplea tabeant keli. Tujea bhavarthianchê Sobhent porian bhitôr sorunk Tunvem raxttrank addvarloleim, tori tim tichea Mondirant bhitôr sorlolim ani thoinsôr riglolim tinnem dolle-bhôr pollelim.
11
Khann-jevonn sôdun tichi soglli porza haskar-suskar sôddta; Aplem pott bhôrun jivim urunk on’na bodlek dilim tãnnim aplim bhanddaram. ‘Polle, Sorvespora, mhojer nodor mar: kitli dolldiri zaleam hanv!
12
‘Hê vatten ietat-vetat tim sogllim tumi, tumkam hem buzonam zaum dolle ubarun polleiat: mhojê dukhi sarki anink dukh asa? Aplea zolltea ragachea disa Sorvesporan mhaka he dogdog dileat!
13
‘Voir thaun Tannem uzo dhaddlo, mhojea haddam bhitôr to rigoilo; mhoje pãi faraunk Tannem zall manddlem, ani mhaka ôddun pattim kaddli; ani ak’kho dis mhaka vollvollaun dovorli.
14
‘Mhoje soglle oprad Tannem gunthun dovorleat; Aplea hatamnim to mhaka bandun dovorta. Tachem zum mhojê manir ghal’lem asa, mhojem bolluch na korta. Sorvesporan mhaka dusreanchea chopkeant ghalea, tantli suttonk mhaka xokti na.
15
‘Mhojea kottam bhitôr sogllea mhojea zhuzariank Sorvesporan sôddun dile. Mhojea tornnatteank nattak korunk Tannem êk vorixtt fouz apoun haddli; Judachê porjek Sorvesporan Aplea ghanneant mostun môll’lli.
16
‘Heach pasot hanv roddtam; mhoje dolle zaleat dukancheô zhori, kiteak mhaka buzvônn diunk konnuch na, mhaka dhir diunk xoktalo To Apunn pois ravla. Mhoji porza sarkich niraxi zalea, kiteak dusmanan mhaka jikhun ghetli.’
17
Sion aple hat vistarta, tika buzvônn diunk konnuch na. Jakoba vixim Sorvesporan bhonvtonnchea lokank tache dusman zaunk hukum’ ghala. Tankam Jerusalem atam zalam mhêll, ollxik, bhoxttol’li vôst.
18
‘Sorvespor korta tem sarkem asa, kiteak Tachea nivaddeancher hanv kolpolim. Tumi sogllim, raxttramnô, aikat ani mhojem dukh polleiat. Mhoje tornnatte ani mhojim tornnattim sogllim koidi zaun pordesant geleant.
19
‘Mhojea adarak hanvem mhojea mogiank ulo marlo, punn tãnnim mhaka sarkich sôddli. Aplo jiv samballunk jevonn-khann sôdun-sôdun, mhojea iadnikamnim ani zannteamnim Xarant prann sôddlo.
20
‘Polle, Sorvespora, kede mhoje tollmolle! Ak’khem soimb mhojem kollvollta! Mhojem kalliz mhojêch bhitôr fafsolam. Hanv Tujer bharim kolpolim! Bhair rosteancher torvar jiv kaddit asa, ani ghorant bhitôr moronn raj korta.
21
‘Mhojê pinrgovnnek kan di, mhaka buzvonn diunk konnuch na. Mhojea odruxttachi khobor aikun Tunvem oxem keleim mhonn mhoje dusman sontostat. Tunvem bhasail’lo dis pavo-so kôr, mhojê gotir tankam-i pavoi!
22
‘Sogllem tanchem khotteponn Tujê mukhar pavum-di, ani zoxem Tunvem mhojea opradham pasot mhaka lekhleai toxench tankam-i lêkh. Thar nastana hanv pinrgotam, mhojem kalliz dukhovlam, khontovlam.’

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.