Home

Titak Chapter 1 - Povitr Pustok Revised - 2010

1
Hanv Paulu, Devacho sevôk ani Jezu Kristacho Dhormdut, amchea ekach bhavarthant mhojea khorea puta Titak Deva Bapachi ani amchea Soddvonnara Jezu Kristachi doiallai ani xanti magtam. (1b)Apnnem vinchun kaddloleank bhavarthak oddun haddunk Devan mhaka nemla. Tankam hanvem khorê bhoktik pavoita tea sotachi vollokh diunchi mhonn Tannem mhaka dhaddla.
2
Sasnnik Jivitacho bhorvanso tanchea kallzamnim upzounchem kam’ Devan mhojê adhin kelam. Dev kednanch konnak fottoina; tôr Tannem kallachê survek thaun hem Jivit bhasail’lem.
3
Punn tacho iukt vêll pavtôch, Devan, amchea Tarokan, Aplo sondêx fankoilo; ani Tannem mhaka dil’lea hukuma pormannem hanv to porgôtt kortam.
5
Tuka Kretant pattim dovrunk karonn hem: thoim jem kitem opurtem urlam, tem tunvem purtem korchem ani dôr-eka nogrant tunvem zannte nemche. Hanvem tuka sanglam tem monant dhôr:
6
dôr-êk zannto guneanv-naslolo zauncho ani taka êkuch potinn aschi; tachim bhurgim zaunk zai bhavarthi, ani tim pamprel vô avoi-bapaichem aikonant mhonn konnench tancher dad diunk zaina toslim.
7
Zo konn dhormadheokx, to, Devacho karbhari mhonnttôch, guneanva mekllo zaunk zai; to gorvi vô ragixtt zauncho nhoi, nhoi mhonn bebdo, markôr vô girestkaiechê axecho.
8
Portench, to porkeancho poramôs korta toslo zauncho ani bholeponnan bhòrlolo; to moriadik zaunk zai, Devak man’ta toslea jivitacho ani Tachê bhokticho, ani apnnakuch domaunk zanno aslolo.
9
Xastra pormannem bhavarthacho nirôp ghôtt samballta toslo to zaunk zai; oxem to oputt sarki xikovnn diun herank updêsunk xoktolo ani ticher add uloitoleam kodde vivadunk zanno zatolo.
10
Kiteak attaponant toslim, suki boddai uloitat toslim ani bhulovnnim zaitim zannam asat, bhov-korun sunôtichea pongddachim.
11
Tankam ogim korunk zai: holkea faideachê axek lagun, xikounk favona toslem xikoun, ak’khea ghorabeancho bhavarth tim gondhollak ghaltat.
12
Tanchê bhitorlea eklean, tanchêch modlea eka vortea zannaran oxem mhonnlolem asa: Kretkaram sodanch fottkirim, noxtteô mon’zati, samkinch allxi pottiim.
13
Ani hem mhonnop sarkem. Dekhun khoraien tankam bobatt kôr ani bhavarthant tankam ghott kôr.
14
Toxem tim Judevanchea kanniank ani sotachea marga velim koddsorleant toslea mon’xank kan diunk pavchim nant.
15
Jim konn apunnuch xud’dh-nirmoll, tankam sogllem xud’dh-nirmoll; punn bhoxttol’leank ani bhavarth nasloleank kitench xud’dh-nirmoll na, kiteak tanchem mon ani ontoskornn bhoxttoleant.
16
Apunn Devak vollkhotat mhonn sangtat, punn aplea kortubamnim Taka vollkhonant mhonn dakhoitat; khorinch ollxikonnim, Devacher kolpotat ani kosleach borea kamak upkaronant toslim mon’xam tim.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.