Home

Suttka Chapter 14 - Povitr Pustok Revised - 2010

1
Tedna Sorvesporan Moizesak mhollem,
2
‘Atam Israel-porjek sang: Tumi patthim portun ieat, ani Pi-Hahirot hachea fuddeant, Migdol ani Doria modem, Baal Zefona-xim tumche tombu ubarat.
3
Hê svatê samkareak doriachê degek tumi tumche tombu ubarat. Israel-porza atam oronneant xirkon urli ani ievtten-tevtten ganvant bhonvaddeô marta oxem Faraoh som-zotolo.
4
Hanv Faraohk dharunn korto-lom, ani to tumchê patthik lagtoloch, ani Faraoh ani ak’khê tachê foujê virudh mhojea zoitan man-onod bhôgtolom. Tedna, Ejiptkarank hanv Sorvespor mhonn kollon ietolem.’ Ani Israel-porjen oxem kelem.
5
Israel lôk pollun gelo mhonn Ejipta-chea razak kolloitôch, tachem ani tachea sevokanchem mon Israel porjê vixim bodòl’lem; tãnnim mhollem: ‘Amchi seva kortali tê Israel porjek vochunk diun ami kitem kelem?’
6
Mhonnttôch Faraohn aplo ron’gaddo toiar kelo ani aplea soinikank ektthaim kele,
7
soixim boreantle bore roth ani Ejiptache her soglle roth ghetle ani ek-ekacher sordar ghale.
8
Ani Sorvesporan Faraohchem, Ejiptachea razachem, kalliz nibor kelem ani, Israelacheô put-dhuvô zoitivont zaun bhair vetaleô tednanch, to Israe-lachea putam-dhuvanchê pattik laglo.
9
Mhonnttôch Ejiptkar mhonngê Fa-raohche soglle ghodde, ani ron’gadde, tache ghoddekar ani tachi fouz Israelachea putam-dhuvanchê pattik lagle. Baal-Zefona mukhar, Pi-hahirota lagim, doria-xim tãnnim pennem kel’lem thoim tim tankam mell’lim.
10
Faraoh lagim sorlo tedna Israelachea putam-dhuvamnim aple dolle voir ubarle ani Ejiptkar apnnam pattlean ietat tem tãnnim pollelem. Israelacheô put-dhuvô ekdom’ bhieleô ani tãnnim Sorvesporak ulo marlo.
11
Tãnnim Moizesak mho-llem, ‘Hea oronneant tunvem amkam morunk haddleãi; Ejiptant amkam fondd nasle? Ejiptantlim bhair kaddun tunvem amkam kitem borem kelãi? Amchi vatt sôdd,
12
ami Ejiptkaranchich seva korunk sôdtanv, oxem ami tuka Ejiptant astana sangunk na? Hea oronneant morchê svater Ejiptkaranchi seva kel’li zalear odik borem aslem!’
13
Moizesan porjek zobab dilo, ‘Bhieum nakat! Ghott ravat, aiz tumkam soddounk Sorvespor kitem kortolo tem tumi dekhtoleat. Aiz tumi polletat tea Ejiptkarank tumi anink kednanch polleunchim nant.
14
14 Khud Sorvespor tumchê khatir zhuztolo; tumi xant ravat.’
15
Sorvesporan Moizesak mhollem, ‘Tum kiteak mhonn Mhaka ulo martai? Israelachea putam-dhuvank fuddli vatt dhôrat mhonn sang.
16
Tuzo danddo ubar, doriar tuzo hat patllai ani to doxim kôr, ani oxem Israelacheô put-dhuvô pãi bhizoinastana doriantlean vetoleô.
17
Hanv Mhojê vatten Ejiptka-ranchim kallzam darunn kortolom ani te tumchê pattik lagtole. Ani Faraohcher ani tachea loskoracher zoit vhorun ani tachea ron’gaddeanchem ani ghoddes-varanchem nisontton korun, Hanv Mhaka mhoima zôddun ghetolom.
18
Ani Faraohcher ani tachea ron’ga-ddeancher ani zhuzariancher Hanvem zoit vhortôch, Hanv khorench Sorves-por mhonn Ejiptkaram manun ghetolim.’
19
Israelachea loskora fuddem choltalo to Sorvesporacho dut tanchê pattlean ieun ravlo, ani têch bhaxen kupacho khambo fuddean aslo to tanchê pattlean ieun ravlo.
20
Hê porim to Ejiptkaran-chea ani Israelachea foujê-moidanam modem ravlo; kallôkh zatôch, tea kupan ratik uzvadd dilo, ani oxem soglli rat don-ui foujê-mannddam modem koslich loddai zali na.
21
Moizesan aplo hat doriacher patllailo ani Sorvesporan rat-bhôr udentik thaun êk koddok vadoll dhaddun doria sukoilo, ani udkam doxim zalim.
22
Tedna Israelacheô put-dhuvô sukê zomnivelean doriant bhitôr sorleô ani, udkanchim durgam zaun, tim tanchea davean ani uzvean ravlim.
23
Ejiptkar tanchê pattik lagle; Faraoh-che soglle ghodde, tache ron’gadde ani tache ghoddesvar tanchê pattlean doriant bhitôr sorle.
24
Fantea-pahrar ujeachea ani kupachea khambear thaun Sorvesporan Ejiptkaranchea foujê-manddar barik nodor marli ani tanchê foujechi duspôtt keli.
25
25 Tanchea ron’-gaddeanchim chakam cholona zalim; hê porim fuddem tanch marunk kotthin zatalem; tea pasot Ejiptkaramnim mhollem, ‘Israelachea fuddeantle ami pollun vochum-ia; Sorvespor Ejiptka-ram virudh tanchê vatten zhuzta!’
26
Sorvesporan Moizesak mhollem, ‘Tuzo hat doriar pattlai, ani Ejipt-karancher, tanchea ron’gaddeancher ani tanchea ghoddesvarancher udkam xevttun poddum-di.
27
Moizesan aplo hat doriacher ubarun patllailo ani fantem futt’tana doria aplea sodanchea zagear portolo. Pollun vetale te Ejipt-kar sarke udkant rigle ani Sorvesporan tankam doria modench bhongoun uddoile.
28
Udkam novean ektthaim zaun Israela pattlean doriant bhitôr sor-lolea Faraohchea ron’gaddeank, gho-ddesvarank ani akhê foujek buddoilim; eklo porian vattovlo na.
29
29 Punn Israe-lacheô put-dhuvô pãi bhizoinastana doriantlean poltoddi geleô; tanchea uzveak ani daveak durgam vori udkam ravlim ubim!
30
Tea disa Sorvesporan Ejiptkaranchea hatantlo Israelak va-ttailo ani Israelan doriachê deger Ejiptkaranchim moddim pollelim.
31
Hê porim Israelan Ejiptkarancher add Sorvesporan kel’lem vhoddlem kortutv dekhlem ani porjen Sorvesporachem bhem dhôrlem; ani Tachea sevoka Moizesacher tãnnim visvas tthevlo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.