Home

Stotranchem Pustok Chapter 119 - Povitr Pustok Revised - 2010

1
Nitoll nirmoll jivitachim, Sorvesporachi Somurt samballtat tim, khorench sukhest!
2
Tachi khuxi palltat tim, sogllea kallzan Taka sôdtat tim, khorench sukhest!
3
Koslench vaitt tim korinant, punn Tachea margan choltat.
4
Zotnaien ami Tuje kaide samballunk Tunvench te porgôtt keleai.
5
Tujê khuxek sodam pallo diunk mhoje pãi, mhoji chal thir asum.
6
Tujea sogllea adniank hanvem chit dilear, konn mhaka lojek ghalcho na.
7
Tuje promannikponnache nem’ xikun, khorea kallzan Tuka dhin’vastolom.
8
Tujeô adnia pallunk mhoji khuxi: mhaka kodinch sanddum naka.
9
Tornnattim patkavinn koxim ravtolim? Tujea utrak pallo diun.
10
Sogllea mhojea kallzan Tukach hanv sôdit asam, Tujea adniam-velo mhaka koddsorunk dium naka.
11
Tujer patok korina zaunk Tujem utor hanv kallzant ballgun dovortam.
12
Tum soglleam poros vondovont, Sorvespora! Tujeô adnia mhaka xikoi
13
Tujea tonddantle nivadde mhojea vonttamnim hanv ucharit asam.
14
Soglli dhon-grestkai mell’llolê porim Tujea kaideanchea margar hanv sontoxi zalam.
15
Tujeô adnia hanv monant gholloitolom, Tunvem dakhoiloli vatt hanv nialltolom.
16
Tujea kaideancher mhozo sontôs, Tujem utor hanv kodinch visorcho na!
17
Tujea chakrak bholeponn dakhoi: mhojem jivit bhagi zaun, Tujem utor samballtolom.
18
Tuji vichitr Somurt nihallunk mhojea dolleank uzvadd di.
19
Hea sonvsarant hanv pordexi dekhun Tujea adnianchi mhaka vollokh di.
20
Tuje nivadde vollkhun gheunk mhozo otmo otrekamnim lasta.
21
Tujea adniank patt kortat dekhun gorvi, xirap-poddlolea mon’xank Tum dhomkaitai. (b)
22
Punn hanv Tuji khuxi mandun ghetam dekhun, tancheô kenddnniô ani khebaddam mhojê-velim pois kôr.
23
Razkunvor mhojê virudh ievzunk boslear porian, hanv Tujeô adnia niallit ravtolom.
24
Tuje nivadde mhozo sontôs, Tuje kaide mhaka budh ditat.
25
Mhozo otmo dhullint lollta; Tujea utra pormannem mhaka ubar.
26
Mhoji chal Tujê mukhar vollkholom ani Tunvem zap dilii: atam Tujeô adnia mhaka xikoi.
27
Tuje kaide koxe pallche te mhaka dakhoi, ani Tujim ochoriam monant gholloun nialltolom.
28
Khontin mhozo otmo sukun veta, Tujea utra pormannem mhaka ubar.
29
Fottkirea margavelo mhaka pois kaddun vhor, upkar korun Tuji Somurt mhaka xikoi.
30
Visvaxiponnachi vatt hanvem vinchun kaddlea: Tujeach nivaddeank axeta mhojem kalliz.
31
Tujê khuxek hanv chikttun ravtam: mhozo visvas môddum naka, Sorvespora!
32
Tujea kaideanchea margan hanv suddsuddit vetolom, kiteak Tunvem mhojea kallzak suttka dileai.
33
Tujea kaideanchi vatt mhaka dakhoi, Sorvespora: hanv te sodanch khuxen mandtolom. (c)
34
Tuji Somurt samballunk mhaka xikoi, ani sogllea kallzan hanv ti palltolom.
35
Tujea adnianchea margan mhaka choloun vhor: tancher asa mhozo sontôs!
36
Mhojem kalliz Tujê khuxechê chakrek lai, duddvanchê axek mhaka lobhdunk dium naka.
37
Polkea vostuncher mhoji nodor poddunk dium naka, Tujeach utran mhaka jivit di.
38
Tuji bhokti kortoleank Tunvem utor dilãi tem Tujea chakratthaim samball.
39
Tuje nivadde amkam borem kortat dekhun, mhaka bhirant haddtolea khebaddantlo mhaka nivar.
40
Hanv, polle, Tujea adniam bhair kãich axena, Tujea promannikponnan mhaka jivit di.
41
Tuzo môg mhojer denvum, Sorvespora, Tujea utra pormannem Tuji soddvonn mhaka mellum.
42
Mhaka okman kortoleank hanv porti zap ditolom, kiteak Tujea utracher hanv visvas dovortam.
43
Mhaka dil’lem visvaxiponnachem utor kaddum naka, kiteak Tujea nivaddeancher hanv patieun ravlam.
44
Tuji Somurt visvaxiponnan samballtolom sodankal, nitekallim!
45
Tuje kaide pallunk mhoji khuxi dekhun, mukt kallzan hanv choltolom.
46
Tujê khuxechi khobor raiam mukhar kortolom ani kodinch lojek sampoddcho na.
47
Tujeô adnia mhollear mhozo sontôs, tancho hanv sodam môg korun ailam.
48
Tujea hukumam mukhar hat zôddtam, tancho môg kortam, Tuje nem’ monant gholloit asam.
49
Tujea chakrak dil’lea utracho ugddas kôr: tachê vorvim Tunvem mhaka bhorvanso diloi.
50
Tujea utra vorvim mhaka jivit mellta mhonnun, mhojea dolldirponnant mhaka buzvonn mell’lli.
51
Gorvixtt mon’xamnim mhaka kenddniamnim samkoch ôddchilo, punn Tujê Somurtichea margavelo hanv koddsorunk na.
52
Tunvem magam dil’lea nivaddeancho ugddas dhôrtam: tantum mhaka buzvonn mellta, Sorvespora.
53
Patki monis Tuji Somurt sôddun ditat dekhun, mhaka kanttallo bhògta.
54
Hea pordesant hanv dis kaddtam zalear-ui, Tuje nem’ mhaka zatat buzvonnechim gitam.
55
Ratchem legun Tujem Nanv monant ieta, Sorvespora, ani Tuji Somurt hanv samballtam.
56
Tujeô adnia hanvem samball’leat: hench mhojem sukh.
57
Tujem utor pallchem mhollear mhozo daizacho vantto: oxem hanvem mhollam, Sorvespora!
58
Sogllea kallzan Tuzo upkar magtam: Tujê bhasavnnê pormannem mhoji doia kôr!
59
Mhoji chal kosli ti hanvem barkaien pollelea ani Tujê khuxechea margar hanv portun ailam.
60
Tujea hukumank pallo diunk kallav korinastana suddsuddaien ietam.
61
Patki monis mhojê bhonvtonnim fas manddtat, tori astana hanv Tuji Somurt visrona.
62
Tujea promannikponnachea nivaddeam pasot ratcho modianir utthun Tuka argam ditam.
63
Tuji bhokti kortat ani Tuje kaide samballtat tea soglleancho hanv ixtt.
64
Tujea mogan, Sorvespora, prithum’ upott bhòrlea; Tuje nem mhaka xikoi.
65
Tujea utra pormannem, Sorvespora, Tujea chakrak Tunvem Tujem boreponn dakhoilãi.
66
Ginean ani zannvai mhaka di, kiteak hanv Tujea adniancher patietam.
67
Mhojer koxtt-upodre poddchê adim hanv chuklom, punn atam hanv Tujem utor samballtam.
68
Tum khorench boro, Tum kortai tem sogllem borem, Tuje nem’ mhaka xikoi.
69
Gorvi monis mhojer boglanttam-bodlamam ghaltat, tori astana sogllea kallzan Tuje kaide hanv palltam.
70
Tanchem kalliz chorbê vori dattlam, punn mhozo sontôs asa Tujê Somurticher.
71
Mhojer koxtt-upodre aile te boreak aile; oso hanv Tuje nem’ xikunk pavlom.
72
Sonvsarantlea rupea- bhangara poros mhaka odik unch molachi Tunvench xikoil’li Somurt!
73
Tujea hatamnim mhaka rochla ani mhaka akarla: Tujeô adnia xikunk mhaka ginean di.
74
Tujea utracher hanv visvas dovortam dekhun, mhaka polleun Tujea bhoktank sontôs bhògtolo.
75
Tuje kaide promannikponnache: hem hanv zanna, Sorvespora; mhojer tollmolle dhaddlea te-i visvaxiponnan dhaddleai.
76
Punn Tujea chakrak bhasailãi tea pormannem, Tujea mogan mhaka buzoi ani dhir di.
77
Konvallaien mhaka vagoi ani mhozo jiv vanchtolo, kiteak Tujê somurticher asa mhozo sontôs.
78
Boglanttam ghalun mhaka piddapidd ditat tea gorvi mon’xank lojek ghal, punn hanv Tuje kaide niallit ravtolom.
79
Tujea bhoktank, Tuji khuxi mandun ghetoleank, mhojê bhonvtonnim ektthaim zaum-di.
80
Tujea nemam pormannem cholun, kalliz mhojem patkavinn zaum-di; tedna mhaka loz bhògchi na.
81
Tujê soddvonnek hanv axetam, otrektam; Tujea utracher patieun ravtam.
82
Axeun axeun mhoje dolle Tujê bhasavnnechi vatt polletat: kedna mhaka buzvonn ditoloi?
83
Dhunvra voir dovorlolea dabea vori hanv sukun gelam, punn Tuje nem’ mhojea monant asatuch!
84
Anink kitle dis vanchot Tuzo sevôk? mhaka piddapidd ditoleanchi kedna zhôddti kortoloi?
85
Tujê Somurtichi beporva korun, gorvi monis mhaka fôndd khonntat.
86
Tuje hukum’ soglle visvaxiponnache: fottkire monis mhojea pallank lagtat tedna Tunch mhojea adarak ie.
87
Mhaka prithumêvelo nanch korunk lagim pavleat, tori astana Tujeô adnia hanvem sôddunk nant.
88
Tujea moga khatir mhozo jiv vattai, ani Tum kôr mhonn sangtai titlem-i hanv kortolom.
89
Tujem utor sasnnak togta, Sorvespora, sorgar tem sodanch thir!
90
Pinddkechê pinddkent togta Tujem visvaxiponn; Tunvem prithum’ rochleai ti-i togunkuch rochleai.
91
Tujea formonnam pormannem soglli rochnna togta, kiteak soglleôch vostu Tuji chakri kortat.
92
Tuji Somurt mhozo sontôs zaunk nasli zalear, mhojea dolldirponnantuch hanv morun vetolom aslom.
93
Tujeô adnia hanv kodinch visorcho na, kiteak tanchê vorvim Tum mhozo jiv samballtai.
94
Hanv Tuzoch: tôr mhaka nivar; Tujeô adnia hanv pallunk sôdtam.
95
Noxtte monis mhoji vatt lavunk dodde manddtat, tori astana mhojem dhean-mon Tujê khuxecher asa.
96
Sopurnn mhonnttat teô soglleô vostu opurnn mhonn mhaka tthavem zalam. Sopurnn mhonnchem ekuch: Tujem oprimit utor!
97
Tujê Somurticho hanv môg kortam kitlo! dis-bhôr ti mhojea monantuch asa.
98
Tujeô adnia sodanch mhojem jivit choloitat: tanchê vorvim Tunvem mhaka mhojea dusmanam poros xanno kelai.
99
Tuji khuxi hanv niallit asam dekhun, sogllea mhojea gurum poros hanv xanno zalam.
100
Tuje kaide samballtam dekhun, zannteanchê zannvaiê poros odik vhôdd mhoji zannvai!
101
Tujea utrak pallo diunchê khatir patkachea margar hanv pãi dovrina.
102
Tujea kaideank patt korun hanv cholona, kiteak Tunch mhaka tanchi somzonni ditai.
103
Tonddant godd-godd mhonva poros odik ruchik Tujea utrachi goddsann mhojea kallzak!
104
Tujea kaideam vorvim mhaka zannvai mell’lea, dekhun fottkirê chalicho mhaka kanttallo dista.
105
Mhojea panvlank Tujem utor ubarlolo divo, uzvadd mhojê vattecho!
106
Tujea promannikponnachea kaideank pallo ditolom: oso hanvem soput dila to hanv môddcho na.
107
Soglloch akantak sampoddlam, Sorvespora; Tujea utran mhozo jiv samball.
108
Tuka vôptam tem stuti-dan Tuka manom, Sorvespora, Tujea kaideanchi mhaka somzonni di.
109
Sogllo vêll jiv hatant dhôrun bhonvtam, tori astana Tuji Somurt hanv sôddun dina. (e)
110
Noxtte monis mhaka fas manddtat, punn Tujea kaideam-sorxilo hanv koddsorna.
111
Tuji khuxi mhollear mhojem sasnnachem daiz, tich mhojea kallzacho sontôs!
112
Dhean-mon lavun Tuje nem’ hanv palltam: hench mhojem inam’ sodankal!
113
Doskea kallzachea mon’xank hanv kanttalltam: punn mhojem kalliz sogllench Tujê Somurtik lobhdolam!
114
Tujea gopant mhozo asro, Tunch mhozo Rakhnno! Tujea utracher asa mhozo bhorvanso!
115
Noxttea mon’xamnô, mhaka sôddun pois vochat! hanv mhojea Devachea adniank pallo ditam.
116
Tunvem dil’lea utra pormannem mhaka samball, ani mhozo jiv vanchtolo: mhozo bhorvanso varear vochunk dium naka.
117
Dhôr mhaka ani hanv vattavtolom, ani Tuje nem’ sodankal mhojea dolleam mukhar astole. (f)
118
Tujea nemanchi porva korinant tea soglleanchi Tum beporva kortai; Tanchi naddbudh tankanch fottoita.
119
Prithumêvelea patkiank Tum likitta vori lêkhtai, hea pasot Tujea adniancho hanv môg kortam.
120
Tujê mukhar hanv sogllo bhieun koddkoddtam, Tujea kaideanchi mhaka bhirant dista.
121
Nitichea ani xegunnanchea margar hanv chol’lam: piddapidd ditoleanchea hatant mhaka sôddum naka.
122
Tujea chakrak borem tem kortoloi mhonn mhaka khatri di, gorvi mon’xank mhojer zobordosti korunk dium naka.
123
Axeun axeun mhoje dolle Tujê soddvonnechi vatt polletat, Tunvem bhasailolea promannikponnak otrekun ravtat.
124
Mhaka, Tujea chakrak, maiêmogan vagoi ani Tuje nem’ mhaka xikoi.
125
Hanv tôr Tuzo chakôr, mhaka ginean di, tedna Tuji khuxi mhaka somzotoli.
126
Tuji podvi dakhouncho vêll pavla, Sorvespora, kiteak Tuji Somurt tãnnim môddlea: hem mhojean sosunk nozo.
127
Kiteak oputt nirbhel bhangara poros Tujea adniancho hanv chôdd môg kortam.
128
Hôi, Tujea kaideam pormannem hanv choltam, sogllê torechê fottkirê chalicho mhaka kanttallo ieta.
129
Khorench vichitr Tunvem ghal’le kaide, dekhun hanv te manun ghetam.
130
Ugddapem zaun Tujem utor uzvadd ghalta, ani sadhea kallzachea mon’xank somzonni mellta.
131
Tujea adniank axeun axeun khorxeta mhojem horddem, tondd zata uktem.
132
Tujea Nanvacho môg kortoleank Tum kortai toxem, mhojer nodor ghal, mhoji kaklut kôr.
133
Tujê bhasavnnê pormannem mhojim panvlam samball, vaittak mhojer zoit vhorunk dium naka.
134
Mon’xanchê zobordostentlo mhaka soddoi, ani Tuje kaide hanv palltolom.
135
Tujea mukhamollacho porzôll Tujea chakracher fankoi ani Tujeô adnia mhaka xikoi.
136
Tuji Somurt samballinant dekhun, mhojea dolleantleô vhanvtat dukancheô zhori.
137
Tum khoreponnim nitivont, Sorvespora, ani konnank fottoinant tosle Tuje nirnnoi.
138
Niti pormannem Tum kaide ghaltai, toripunn sotacher te tthoraileai.
139
Mhaka piddapidd ditat te Tujem utor visortat; hem polleun hanv soglloch zolltam.
140
Tuji bhasavnni borich kosak laun kaddlea, Tujea chakrak ti chôdd opurbaiechi.
141
Hanv kirkôll khoro ani tiroskarlolo, tori Tujeô adnia hanv visrona.
142
Tuji nit sasnnachi nit, Tuji Somurt mhollear Sotuch!
143
Akantak ani tollmolleank hanv sampoddlam, tori astana Tujea adniancher asa mhozo sontôs.
144
Sasnnachê niti pormannem Tuje kaide; tanchi mhaka somzonni di ani mhozo jiv vanchtolo.
145
Sogllea kallzan Tuka ulo martam; mhaka zap di, Sorvespora! Tuje kaide hanv samballtolom.
146
Tuka ulo martam, mhaka vattai, ani hanv Tuji khuxi palltolom.
147
Fantea adim utthun adar magtam, Tujea utracher patieun ravtam.
148
Tuji bhasavnni niallunk soglli rat mhoje dolle uktech asat.
149
Tum konvallo, Sorvespora: tôr mhojê vinovnnek kan di, Tujea adniam vorvim mhozo jiv samball.
150
Mhaka dogd ditat te noxtte lagim sortat, Tuji Somurt tãnnim sanddlea.
151
Tum, tori, Sorvespora, laginch asai, Tujeô adnia sotuch!
152
Sasnnak tôgunk Tuje kaide tthoraileai mhonn adim thaun hanv zanna.
153
Mhojem dolldirponn polle, mhaka nivar, kiteak hanv Tuji Somurt visorna.
154
Mhaka favo ti nit korun di ani mhaka sodddoi, Tujea utra pormannem mhozo jvi samball.
155
Tuje nem’ mandun ghenant dekhun, patkiank soddvonn mellona.
156
Lêkh-naslole, Sorvespora, Tujea bholeponnache upkar; Tujea adniam vorvim mhozo jiv samball.
157
Kitle zann mhojea angar poddtat, mhaka piddapidd ditat! Tori astana tujea adniam-velo hanv koddsorunk na.
158
Somurt môddtat tankam polleun mhaka kanttallo ieta, Tujem utor te pallinant.
159
Tujea adniancho kitlo mhaka môg polle, Sorvespora! Tum konnvallo dekhun, mhozo jiv rakh.
160
Tujem utor sogllem sotuch, Tuje nitiche kaide soglle sasnnak togpache.
161
Razkunvor bexttech mhojea angar poddtat, punn mhojem kalliz Tujeach utrachem bhem dhôrta.
162
Omolik dhirvem melltôch zoso mon’xak sontôs bhògta, tosoch Tujê bhasavnnent hanv sontostam.
163
Lottikponnacho mhaka kanttallo bhògta, sontap ieta; punn hanv Tujê Somurtichea mogant poddlam.
164
Tujea nitichea kaideam pasot, disak sat pavtti hanv Tuka vakhanntam.
165
Tujê Somurticho môg kortat tim vhôdd xanti bhôgta; tim kiteakuch adllun poddchim nant.
166
Tuji vatt polleun asa, Sorvespora, mhojea Taroka, Tujeô adnia hanv samballtam.
167
Tunvem dil’le kaide hanv man’tam, tancho sogllea kallzan môg kortam.
168
Tuje kaide ani Tujeô adnia hanv palltam; soglleô mhojeô kornniô Tujea dolleam mukhar ukteô.
169
Mhozo ulo Tujê mukhar pavum, Sorvespora, Tujea utran mhaka zannvai mellum.
170
Mhojem magnnem Tujê mukhar pavum, Tujê bhasavnnê pormannem mhaka sôddoi.
171
Tum mhaka Tuje nem’ xikoitai dekhun, mhojea tonddantlim gollum vakhann’nnechim utram.
172
Soglle Tuje hukum’ nitiche dekhun, mhoji jib gavum Tunvem dil’lem utor.
173
Tujea adnianchi vatt hanvem vinchun kaddlea dekhun, Tujea hatacho adar mhaka sodam mellum.
174
Tuji vatt polleun asam, Sorvespora, mhojea Taroka; Tujê Somurtint asa sogllo mhozo sontôs.
175
Mhozo jiv samball ani hanv Tuka vakhanntolom, Tujea kaideam vorvim mhaka adar mellum.
176
Sanddlolê xelliê porim hanv bhonvtam: Tujea chakrak sôdunk ie. Tujeô adnia hanv kodinch visrunk na.

Golden Verse

Ezekiel 22:17

Sorvesporachem utor mhaka pavlem; Tannem mhollem: