Home

Stotranchem Pustok Chapter 103 - Povitr Pustok Revised - 2010

1
Otmea mhojea, Sorvesporachi vakhann’nni kôr! sogllea monan, kallzan ani sokten Tachea Povitr Nanvachi vakhann’nni kôr!
2
Otmea mhojea, Sorvesporachi vakhann’nni kôr ani Tache upkar kodinch visrum naka:
3
Toch soglle tuje okman bhôgxita, sogllea vaittak vokod dita.
4
To tujem jivit fonddantlem nivarta, tujea mathear mogacho ani konnvallaiecho mukutt ghalta.
5
To tujem jivit denneamnim bhôrta, gorudda porim tuka novean tornnê piraiecho korta.
6
Sorvesporachim kortutvam neainitichim, zulum’ bhôgtoleank To nit korun dita.
7
Moizesak Tannem Apleô ievzonnô ukteô korun dakhoileô, Israelachea bhurgeanchea dolleam mukhar Aplim vismitam fankoilim.
8
Sorvespor konnvallo ani maiêmogacho, Tacho rag sottkornn pettona, Tachem Kalliz kakluticho tthevo!
9
Tacho krôdh sodam urta toslo nhoi, To sodankal rag dhôrun rauncho na.
10
Amchea patkank favo tea mapan To khast laina, amchea guneanvanchem favo tem farikponn magina.
11
Prithumê poros sôrg jitlo unch-unch asa, titlo vhôdd Tachi bhokti kortoleam thaim Tacho môg!
12
Udent ani Ostomt jitleô ekameka thaun pois-pois asat, titlim pois To amchim patkam kaddun uddoita!
13
Zoso bapui aplea bhurgeank konnvallaien vagoita, tosoch Sorvespor Apli bhokti kortoleanchi doia dhôrta.
14
Amkam kiteachim rochleant tem To bês-boro zanna, ami fokot dhul’l-mati mhonn Taka ugddas asa.
15
Mon’xache dis tonna sarke, xetantlea fula vori to fulta;
16
Varem ailem, ani to babddo ubun gelo; zoim aslo thoim anink dixtti poddona.
17
(ab)Punn Apli bhokti kortoleam thaim Sorvesporacho môg togta sasnna thaun sasnnak;
18
ani Tacho Korar samballtoleam thaim ani Tacheô adnia ugddasan palltoleam thaim (17c)Tachi doiamoia pinddkechê pinddkent.
19
Sorvespor sorgar Aplea thir xinvasonar bosun Aplem raj somestancher choloita.
20
Devacho hukum’ palltoleam, Tachem utor aikotoleam, bollvont ani podvedar dutamnô, soglle tumi Sorvesporachi vakhann’nni korat.
21
Sogllea Tachea dolbharamnô, Tachi khuxi palltolea Tachea sevokamnô, Sorvesporachi vakhann’nni korat.
22
Sogllea tachea rochnnamnô, zoim-zoim tachi razvôtt cholta thoim Sorvesporachi vakhann’nni korat! Otmea mhojea, Sorvesporachi vakhann’nni kôr!

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.