Home

Obadia Chapter 1 - Povitr Pustok Revised - 2010

1
(a)Hem Edoma vixim Obadiachem dorxon. (1c)Sorvespora koddlo hanvem êk sondêx ghetla, raxttram modem eka sondexkarak dhaddun dila: ‘Utthat! Hea lokacher akromonn korunk vochum-ia. Cholat, zhuz korum-ia!’ (1b)Dhoni Sorvespor oxem mhonntta:
2
Polle, tuka Hanvem soglleam raxttram-vôn lhan kela, tuka tiroskar legun favona.
3
Tujea gorvixtt kallzan tuka fosoilo. Tum khoddpachea khanchimnim jietai, unch zagear tthikann korun asai, tujeach monant mhonnttai: ‘Konnachean mhaka khala zomnir uddounk zata?’
4
Zorui ghonni bhaxen tum unch-unch uddtai, zorui noketram modem tunvem tuzo ghontter kelai, torui thoim thaun Hanv tuka khala haddtolom! uloita to Sorvespor!
5
Tumger chor ailole zalear, vô ratche nagovnne pavlole zalear, tankam zai aslem titlench te lutt’tole asle, nhoi? Vô tumger dakô-punzavpi ailole zalear, thoddeô tori te tuka punzaunk dovorche nasle kai?
6
Punn kitlo mhonn tuka luttla? Kitlo mhonn Ezauk luttlo! tache lipoun dovorlole ttheve sôdun kaddle!
7
Soglle tujê samil desachê ximê porian tujê pattik lagle; koraran tuka bandon aslolea mon’xamnim tuka fosoilo ani tuka jikhun ghetlo; tujeach pavnneamnim tuka fas manddlo, ‘ani tem somzunk tuka budh na zali.’
8
To dis ietolo tedna, uloita to Sorvespor! Edomachea sogllea xanneancho Hanv nas korcho na kai? ani Ezauchea Dongra veleam budhvontanchem ginean Hanv padd korcho na kai?
9
Teman, tuje zhuzari itle niraxi zatole, ki Ezauchea Dongra voilea lokak, marun kobar kortole, konnuch chukchona.
10
Tunvem tujea bhava Jakobak kel’lê zobordosti khatir, tum lojen bhòrtoloi ani sorvkallak tujem nisontton zatolem.
11
Jea disa porkea mon’xamnim tachi girestkai kaddun vheli, ani tachea darvontteantlean bhitôr sorun videxiamnim Jerusalea vixim sorti ghaleô, tea disa tum pois ubo ravloi dekhun tum-i tanchê sarkoch vaittovo zaloi.
12
Tujea bhavachea durdoivachea disa tacher nodor ghalun tuje dolle dhadoxi kori naka. Judachea putam-dhuvanchea nisonttonachea disa tanchê vixim tunvem boddai ulounk favo naslem, hal-upodreanchea disa tunvem suki boddai ulounk favo naslem.
13
Tanchea odruxttachea disa, Mhojê porjechea darvontteantlean tunvem rigunk favo naslem; tachea noxttachea disa, Judachea nisonttonnacher nodor ghalun tuje dolle tunvem dhadoxi korunk favo naslem; tanchê konnixttaiechea disa, tanchea astêmalak tunvem hat lavunk favo naslem.
14
Tanchê modlim pôllapoll kaddun vetalim tancho jiv kaddunk tunvem nakear ravunk favo naslem; tanchea hal-upodreanchea disa, jim tanchê modlim vanchun urlolim, tankam tunvem dusmananchea hatant diunk favo naslem.
15
Karonn sogllea raxttrank Sorvesporacho Dis lagim pavla. Tunvem kelãi toxem tuka kel’lem melltolem; tujim kortubam tujea mathear poddtolim.
16
Zoso tum Mhojea povitr dongrar pielai, toxim sogllim raxttram thambonastana pietolim; tim osvosth zaun pietolim, punn oxem kednanch naslim toxim tim zatolim.
17
Punn pollun geleant tim Sion dongrar ravtolim ani to zatolo êk povitr sthan. Jakobachem Ghorannem hok’kan aplem daiz tem novean aplea hatant ghetolem.
18
Jakobachem Ghorannem zatolem êk uzo, Juzechem Ghorannem ek agttem, ani Ezauchem Ghorannnem sukea tonna sarkem. Tim Ezauchea Ghoranneak uzo laitolim ani tem lasun uddoitolim, ani Ezauchea Ghoranneantlo eklo-i vanch’cho na. Uloita to Sorvespor!
19
Negebantlo lôk Ezaucho Dongôr novean aplo kortolo. Sopatt desantlo lôk Filistevkarancho dês aplea tabeant ghetolo; tim Efraimacho ani Samariecho ganv novean aplo kortolim, ani Benjaminacho lôk Gilead aplea tabeant kortolo.
20
Hê foujentlim nirvaxi zal’lea Israelachea putam-dhuvank Zarepta porian Kanaan’karancho dês poddtolo, ani atam Safarodant aslolea, Jeruzaleachea nirvaxeank Negabachim xaram poddtolim.
21
Ezauchea Porvotacher raj choloupak, zoitivont zaun Sion Porvot choddtolim ani sogtta-sorvancho odhikar Sorvesporacho zatolo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.