Home

Matev Chapter 9 - Povitr Pustok Revised - 2010

1
To dusrim hoddear choddlo ani poltôdd marun Aplea nogrant ailo.
2
Ani ovchit antrunnar poddlolea eka arkarak Jezu-xim haddlo; tancho bhavarth polleun, Jezun arkarak mhollem: Dhir dhôr, puta, tujim patkam bhògsolim. Hem aikun thoddea xastriamnim apnnam bhitôr mhollem: Devninda korta!
4
Tanchim chintna vollkhun, Jezun mhollem: Tumchea monant vaitt kiteak chint’tat tumi?
5
Tôr hea donantlem khõichem mhonnunk odik sompem: ‘Tujim patkam bhògsolim!’, oxem mhonnunk, vô ‘utth ani chol!’, oxem mhonnunk?
6
Punn Mon’xachea Putak sonvsarant patkam bhogsunchi podvi asa mhonn tumkam kollon ieunchê khatir Tannem arkarak mhollem: Utth, tujem antrunn ukôl ani ghora voch.
7
Ani to utthlo ani aplea ghora gelo.
8
Hem polleun lôk bhielo ani mon’xank osli podvi dilea dekhun Devak tãnnim vakhannlo.
9
Ani thõicho cholot vetana Jezun manddvir boslolea, Matêv nanvachea a, eka mon’xak dekhlo, ani taka mhollem: Mhojê pattlean ie. Ani to utthun Tachê pattlean gelo.
10
To ghorant jevnnak boslolo astana, sobar dônddvosuldar ani vaitt chaliche monis aile ani Jezuchea ani Tachea xisanchea sangata jevnnak bosle.
11
Hem polleun Farizevamnim Tachea xisank mhollem: Dônddvosuldaram ani vaittoveam sangatim tumcho Guru jevnnak bosta tem kitem?
12
Hem aikun Jezun zobab dilo: Borim asat tankam nhoi, punn vaittakarank ki voizachi goroz.
13
Vochat ani hea utrancho ôrth konn to xikat: ‘Iôdn naka Mhaka, doia zai.’ Khorench sangtam, tumi promannik mhonn dhôrtat tankam nhoi, punn patki mhonn lêkhtat tankam apounk Hanv ailam.
14
Juanvache xis Jezu sorxem aile ani tãnnim vicharlem: Ami ani Farizev upas kortanv, punn tuje xis upas korinant tem koxem?
15
Ani Jezun tankam sanglem: Apnnam borabôr novro asosôr, novreache pavnne dukhant asunk zata zait? Punn novreak tanchê sorxilo kaddun vhorcho vêll pavtolo ani tednam te upas kortole.
16
Pornnea vostrak konnuch anvllonk naslolea novea lugttacho kopo marina, kiteak to vostra thaun oddon bhair sorta ani fallo odik vhoddlo zata.
17
Nhoi mhonn novo soro pornnea dabeamnim bhôrinant; bhôrlo zalear, dabe futt’tat, soro vhanvun veta ani dabeancho-i ibadd zata. Na, novo soro novea dabeamnim b bhôrtat ani don-ui bore urtat.
18
Oxem To tanchê kodde uloita thõich astana, ovchit êk odhikari ailo ani Tachea pãiam poddun tannem mhollem: Saiba, mhoji dhuv atanch melea; punn Tum ie ani ticher Tuzo hat dovor ani ti porot jivi zatoli.
19
Jezu utthlo ani Aplea xisank gheun tachê fattlean gelo.
20
Okosmat bara vorsam rogtpat zal’li êk bail Tachê fattlean aili ani Tachea avoronnachê degek tinnem hat lailo;
21
kiteak ti apleach monant mhonnttali: Tachea avoronnak tori hanv hat lain zalear, hanv borim zatolim.
22
Fattim vollon ani ticher nodor marun Jezun mhollem: Dhir dhôr, dhuvê, tujea bhavarthan tuka bori keli. Ani têch ghoddiê thaun ti bail bori zali.
23
Tea odhikariachea ghora pavlea uprant, vennu vazoitale ani lôk goddbôdd kortalo tem polleun Jezun mhollem:
24
Bhair sorat; cheddum morunk na, tem nhidlam. Ani tim Taka kenddtalim.
25
Punn lokak bhair ghaltôch, bhitôr vochun Tannem cheddvachea hatak dhôrlo, ani tem utthun ubem ravlem.
26
Hi khobor tea ak’khea prantant gazli.
27
Thõisorlo Jezu fuddem vetana dog kudd’dde Tachê pattlean oxi bob marit aile: Davidachea Puta c, amchi kaklut kôr!
28
Ani To ghora pavtôch, te kudd’dde Tachê sorxim aile ani Jezun tankam mhollem: Hem Mhojean tumkam korunk zata mhonn tumkam bhavarth asa? Tãnnim mhollem: Hôi, Saiba.
29
Tednam tanchea dolleank Tannem hat lailo ani mhollem: Tumchea bhavartha pormannem tumkam zaum-di.
30
Ani tanche dolle ugòddle. Ani Tannem tankam khoraien sanglem: Khoborddar, hem konnakuch gomchem nhoi.
31
Punn vochun tea ak’khea prantant tãnnim Tachem nanv gazoilem.
32
Te vochona fuddem ovchit devchar boslolea eka moneak Tachê sorxem gheun ailim;
33
ani devchar kaddtôch mono uloilo, ani lokan ojap zaun mhollem: Israelant oslem kednanch konnench polleunk na.
34
Punn Farizev mhonnunk lagle: Ho monis devcharanchea pordhana udexim devchar kaddta.
35
Sogllea nogram-ganvamnim bhonvun, Jezu tanchea devsthanamnim xikovnn ditalo, Rajeachem Xubhvortoman porgôtt’talo, ani sorv jin’sancho pidda-rôg boro kortalo.
36
Ani lokacheô urponji polleun tanchê vixim To churchurtalo kiteak gonvlli naslolea menddram bhaxen teô dogdovtaleô ani niradari zal’leô asleô.
37
Tednam xisank Tannem mhollem: Pik khorench khub, punn vavraddi thodde;
38
dekhun pikachea Dhonia lagim lunvnnê-môllnnek vavraddi dhadd mhonn magat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.