Home

Matev Chapter 7 - Povitr Pustok Revised - 2010

1
umi nit korum nakat, ani Dev tumchi nit korcho na;
2
kiteak tumi nit korxat têch toren To tumchi nit kortolo; ani tumi zôkxat teach mapan To tumkam porot zôktolo.
3
Tujea peleachea dolleant asa tem kisor tum kiteak polletai, ani tujea dolleant asa ti patti tuka dixtti poddona?
4
Tujea dolleant êk patti astana, tujea peleak, tujea dolleantlem kisor mhaka kaddum-di’, oxem tujean koxem mhonnunk zata?
5
Arê dhongia, tujea dolleantli patti poili kadd, ani magir tujea peleachea dolleantlem kisor kaddunk tuka nivoll dixtti poddtolem.
6
Povitr vostu kaddun sunneank ghalum nakat; ani tumchim motiam dukranchea fuddeant uddoum nakat, kiteak tim ghoddiek tim pãiam tolla maddoitit ani porot tumchea angar ieun tumche kuddkean’-kuddke kortit.
7
Magat ani tumkam melltolem; sôdat ani tumkam gavtolem; darar marat ani tem tumkam ugòddtolem;
8
kiteak magtat tankam mellta, sôdtat tankam gavta; ani darar martat tankam tem ugòddtolem.
9
Aplea putan unddo maglo zalear taka fatôr kaddun diit toslo konn monis tumchê modem asa zait?
10
Ani maslli magli zalear, to taka sorôp kaddun diit?
11
Tumi vaittovim zaun-ui, tumchea bhurgeank boreô vostu diunk tumi zannont zalear, kitlo odik tumcho sorgincho Bap Apnna lagim magtat tankam boreô vostu diuncho na?
12
Mhonnttôch, dusreamnim tumchê thãi korchem mhonn tumkam zai, toxench tumi-i dusream thãi korat: Somurt ani Provadi xikoitat tem hench.
13
Oxir darvontteantlean bhitôr sorat, kiteak ghorttannak pavoita to darvontto rund ani to marôg viskôll, ani tantlean veta to lôk puskôll.
14
Jivitak pavoita to darvontto kitlo mhonn oxir ani to marôg kitlo mhonn kotthin! Ani bhov thoddeank to mellta.
15
Fottkirea provadiam vixim chotraien ravat; menddreanchem rupnnem gheun tumchê-xim ietat, punn bhitorlean krur landdge te.
16
Tanchim follam polleun tumi tankam vollkhun kaddtoleat. Kanttiancheô konnem dakô kaddleat zait? Ani sorantteanchim konnem anjiram kaddlim-xim asat?
17
Têch bhaxen, borem zhadd borim follam dita ani vaitt zhadd vaitt follam dita.
18
Borea zhaddachean vaitt follam dium nozo, nhoi mhonn vaitt zhaddachean borim follam dium nozo.
19
Borem foll dina toslem zhadd katortat ani ujeant uddoitat.
20
Dekhun tanchim follam polleun tumi tankam vollkhun kaddtoleat.
21
Mhaka ‘Somia, Somia!’ mhonnun konn Sorgarajeant bhitôr sortolim mhonn nant, punn sorgar astea Mhojea Bapachi khuxi kortat tinch Sorgarajeant bhitôr sortolim.
22
To Dis ietôch sobar zanna Mhaka mhonnttolim: ‘Somia, Somia, Tuzo sondêx ami porgôttlo, nhoi? Ani Tujea Nanvan ami devchar kaddle, nhoi? Ani Tujea Nanvan sobar vismitam ami kelim, nhoi?
23
Ani tednam Hanv tanchea tonddar martolom: ‘Khotteponn kortoleamnô, Mhojê sorxilim koddsorat, kiteak Hanvem tumkam kednanch vollkhunk nant.’
24
Dekhun, him Mhojim utram aikotat ani tanchê pormannem choltat tim aplem ghor khoddpar bandlolea eka xannea mon’xa sarkim.
25
Paus poddlo, udkache lott aile, vadoll suttlem ani tea ghorar marlem, tori tem mòddlem na, kiteak tem khoddpar bandlolem.
26
Punn him Mhojim utram aikun, tanchê pormannem cholonant tim aplem ghor renver bandlolea eka pisatt mon’xa sarkim.
27
Paus poddlo, udkache lott aile, vadoll suttlem ani tea ghorar marlem, ani tem mòddlem, ani tachem sarkem ghorttann zalem!
28
Jezun Aplem ulovop sompoilem ani Tachi xikovnn aikun lôk zobôr ojap zatalo,
29
kiteak tanchea xastriam bhaxen nhoi, punn odhikaran To tankam xikovnn ditalo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.