Home

Matev Chapter 24 - Povitr Pustok Revised - 2010

1
Jezu Devmondirantlo bhair sorun vetastana, Devmondirachê bandavollicher lokx lai mhonn sangunk Tache xis lagim sorle.
2
Tannem zap diun tankam mhollem: Hem sogllem tumi polletat nhoi? Hanv tumkam khorench sangtam: hanga nisontton zaun fatrar fatôr urcho na.
3
To Zoitunanchea dongrar bosun aslo; tednam ekvodde astana xisamnim Tachê kodde vicharlem: Hem kedna ghòddtolem tem, ani Tujea ienneachi ani kallachea xevottachi khunna konn ti, amkam sang.
4
Ani portipallun Jezun tankam sanglem: Tumkam konnem fottoina zaunk chotraien ravat;
5
kiteak sobar zann Mhojem nanv gheun ani apunn Krist mhonnun ietole, ani zaiteank fottoitole.
6
Tumi zhuzancho avaz ani loddaianchi ddag aikotoleat. Akantum nakat; tôr hem sogllem ghoddonk zai, punn xevôtt rokddoch ieuncho na.
7
Kiteak raxttr raxttracher ani raj rajeacher uprastolim. Hanga-thõi bhuk poddtoli ani bhuimkamp zatoli.
8
Punn hem sogllem fokot porsuttvenninchi survat.
9
Tednam piddapidd diunk tumkam dhôrun ditolim ani tumkam jivexim martolim ani Mhojea nanva pasot sogllim raxttram tumkam zolltolim.
10
Tednam sobar zannancho bhavarth haltolo; mon’xam eka-mekak lavun ditolim ani eka-mekak zolltolim.
11
Sobar kudde provadi uprastole ani zaiteank fottoitole;
12
ani khotteponn vaddta tea mapan zaiteancho môg xellmoddo zatolo.
13
Xevottak porian thir ravtit tankam Dev taronn ditolo.
14
Ani sotachi sakxi sogllea porzank mellchê khatir hem Sorginchea Rajeachem Xubhvortoman ak’khea sonvsarant porgôtt zatolem. Ani tea uprant xevôtt ietolo.
15
Daniel provadian sangun dovorlolo to ‘Sotianasacho kanttallo’ povitr zagear ubo aslolo tumi polletôch (vachtat tãnnim hem somzunchem),
16
tednam Judeiant asloleamnim dongracher pollun vechem;
17
pattsar aslolean aplea ghorantlem kitench vhorunk sokla denvchem nhoi;
18
xetant aslolean aplem avoronn vhorunk porot ieunchem nhoi.
19
Te dis ietôch gorbhest bailanchem ani dud ditoleanchem kotta!
20
Tumchi pollapôll hinvalleant vô Son’vara disa zaina zaunk magat;
21
kiteak tednam sonvsarachea orombak thaun tem atam porian zaunk na ani hea fuddem zauncho na toslo êk vhôdd sontap ietolo.
22
Ani te dis unne korunk nasle zalear, konnuch vattavoncho naslo; punn vinchun kaddloleam khatir te dis unne keleat.
23
Tednam, ‘polle, Krist hanga asa’ vô ‘To thõi asa’ mhonn konnuch tumkam sangit zalear, tumi tem sotmanum nakat;
24
kiteak kudde Krist ani kudde provadi upzotole ani, zata zalear, vinchun kaddloleank porian fosounk puro tosleô vhoddleô khunna ani ochoriam korun dakhoitole.
25
Chotrai dhôrat, Hanvem tumkam hem adinch sangun dovorlam.
26
Dekhunuch oxem konn tumkam mhonnttit zalear, ‘ho polle to oronneant asa’, tumi bhair sorum nakat; vô ‘ho polle to ghorant bhitôr asa’, tem tumi sotmanum nakat;
27
kiteak zoxem zhoglannem udentik marta ani ostomtek porian zhogzhogta, toxench Mon’xachea Putachem iennem zatolem.
28
Moddem asa thõi gid-ui ektthovtole.
29
Tea disancho sontap iena fuddem suriacher kallôkh poddtolo, chondrim’ aplo uzvadd diuncho na, noketram mollba velim sokla poddtolim ani ontralla veleô xokti kolkoltoleô.
30
Ani tednam Mon’xachea Putachi khunna mollbar dixtti poddtoli; sonvsarantlim kullam hodd’ddim boddoitolim ani podven ani vhoddê mhoimen mollbachea kupancher ietolea Mon’xachea Putak dekhtolim.
31
Ani mottea avazacho kornno diun To Aplea dutank dhaddtolo, ani sonvsarachea char-ui dixam veleam, ontrallachê êkê ximê thaun dusrê ximê porian aslolea Tachea vinchloleank te zomoitole.
32
Anjirachea zhaddachi vopar somzun gheiat: tacheô khandiô rosbhorit zatat ani tankam kombriô futt’tat tednam, gim’ lagim pavla mhonn tumkam kollon ieta;
33
têch porim tumi hem sogllem pollelea uprant, To lagim pavlo, darachea umbrear asa mhonn zanno zaiat.
34
Hanv tumkam khorench sangtam: hem sogllem ghòddlea bogor hi pinddka ontorchi na.
35
Ontrall ani prithum’ sortolim, punn Mhojim utram kednanch sorchim nant.
36
Punn ekleach Bapak kaddun, anink konnakuch, sorginchea dutank vô Putak legun, tea disachi ani tê ghoddiechi khobor na.
37
Noahchea disamnim zoxem zalem, toxench Mon’xacho Put ieta tednam zatolem.
38
Buddtê adlea disamnim Noah pett-tarvant bhitôr sorlo to dis meren lôk khata-pietalo, logn zaun ani logn korun diun aslo,
39
ani poriallo ieun tancho soglleancho nas zai porian, tankam kãi ek koll’lem na; toxench Mon’xacho Put ietolo tednam zatolem.
40
Tednam xetant aslolea dogam dadleantlea ekleak vhortole, dusreak sanddtole;
41
dantear dollunk aslolea dogam bailantlê eklêk vhortole, dusrêk sanddtole.
42
Mhonnttôch, tumcho Somi khõichea disa ietolo tem tumi nokllot dekhun zagrut ravat.
43
Hem mat monant dhôrat: konn-ui ghorkar ratichea khõichea parar chôr ietolo mhonn zanno aslo zalear, to zagrut ravtolo aslo ani aplem ghor fôddun nagounk diuncho naslo.
44
Mhonnttôch tumi-i toiar ravat, kiteak tumi chintinant tê ghoddier Mon’xacho Put ietolo.
45
Ghorant asloleank vogtar jevonn diunk dhoni visvaxi ani xannea chakrak aplea ghorabeacher odhikar dita: oslo chakôr konn zait?
46
Aplo dhoni ieta tea vellar aplem kam’ korta thõi taka mellot to chakôr subhagi.
47
Hanv tumkam khorench sangtam: to taka sogllê aplê dovloticher odhikar ditolo.
48
Punn baskôll chakôr apnnach bhitôr oxem mhonnot zalear: ‘Mhozo dhoni ieunk kallav korta’,
49
ani aplea boraborchea chakrank marunk ani bebdeam borabôr jevunk ani pieunk lagot zalear,
50
to ravonaslolea disa ani to nokllo aslolê ghoddier tea chakracho dhoni pavtolo
51
ani taka koddok xikxa ditolo, ani tachi gôt ddhongiam sarki zai-xi kortolo. Thõi sogllim rudon korun ani dant korkoraun astolim.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.