Home

Matev Chapter 22 - Povitr Pustok Revised - 2010

1
Jezu novean tanchê lagim voparimnim ulounk laglo:
2
Sorginchem Raj oxem: eka razan aplea putacho lognacho utsôv kelo.
3
Lognak amontronn dhaddloleank apoun haddunk tannem aplea chakrank dhaddle, punn te iena zale.
4
Aniêk pavtt dusrea chakrank dhaddle ani mhollem: ‘Apoiloleank oxem sangat: Polleiat, Mhojem jevonn toiar asa, mhoje padde ani chorboil’lim zonavoram hanvem marlim, ani sogllem toiar zalam; jevnnak ieiat.’
5
Punn tãnnim kan diunk na, ani eklo aplea bhattant, dusro aplea veapar-dhondeak gelo;
6
heramnim chakrank dhôrle, tankam boddoile ani tancho jiv kaddlo.
7
Hem aikun razacho rag pettlo ani aplim loskoram dhaddun tea khuniancho tannem bhosm kelo ani tanchem nogor lasun uddoilem.
8
Uprant tannem aplea chakrank sanglem: ‘Lognachem jevonn tôr toiar asa, punn apoil’leank tem favona zalem;
9
dekhun tumi rosteanchea nakeanr vochat ani tumkam melltit titleank-ui lognak apoun haddat.’
10
Ani vattam-tintteantlean vochun, apnnank mell’llim titleank-ui, boreank toxem vaittank, chakramnim zomoilim, ani lognacho vosro soireamnim bhòrlo.
11
Jevnnak bosloleank pollounchê khatir raza bhitôr ie zalear, lognachi nhesônn ghalinastana thõi aslolea eka mon’xak tannem dekhlo
12
ani taka vicharlem: ‘Ixtta, lognachem vostr nastana tum hanga koso bhitôr ailoi?’ Punn tannem zap kaddli na.
13
Tednam razan chakrank sanglem: ‘Tache hatpãi bandun taka kallokhant bhair uddoiat; thõi sogllim rudon korun ani dant korkoraun astolim.’
14
Kiteak apoil’lim zaitim, punn vinchun kaddlolim thoddim.
15
Tednam Farizev gele ani Jezuk koso utrak dhôrcho tê vixim tãnnim ektthãi zaun tharav ghetlo.
16
Ani Herodichea pokxvadiam borabôr tãnnim aplea xisank oxem mhonnunk Jezu-xim dhaddle: Guruji, tum sotan choltai ani Devachi vatt sotan xikoitai; ani tuka konnachich bhidda na, kiteak mon’xanchem tondd polleun tum uloinãi: hem ami borem zannonv.
17
Tôr tuka kitem dista? Somrazak dôndd farik korum-ieta ki na?’
18
Punn tanchem noxtteponn vollkhun, Jezun oso portipall kelo: Arê dhongiamnô! Tumi kiteak mhonn Mhaka fas manddunk sôdtat?
19
Mhaka êk donddacho nanno dakhoiat, polleum-ia. Tãnnim Taka êk dinar dakhoilo.
20
Jezun tankam vicharlem: Hem rup konnachem? Ani hem nanv konnachem?
21
Tãnnim zobab dilo: Somrazachem. Tednam Jezun tankam sanglem: Borem tôr, Somrazachem tem Somrazak diat, ani Devachem tem Devak diat.
22
Tacho zobab aikun te thottakle ani Taka sanddun gele.
23
Teach disa Saduki, punorjivontponn na mhonnttat te, Jezu-xim aile ani tãnnim Tachê lagim oxem vicharlem:
24
Guruji, Moizesan mhollam: ‘Sonsôt nastana konn-ui morot zalear, tachea bhavan tachê bailê lagim logn zaunchem ani aplea bhavak bhurgim utpon korchim.’
25
Tôr amchê modem sat bhav asle; poilo logn zalo ani melo; ani sonsôt na zaun, apli potinn aplea bhavak dovrun gelo;
26
têch porim dusro ani tisro ani toxench satvo porian.
27
Ani te soglle mortôch, bail-ui meli.
28
Tôr, punorjivontponnachea somoiar, sat zannam bhitôr konnachi potinn zatoli ti? Kiteak mhollear soglleanchi ti potinn zal’li.
29
Jezun portipallun tankam mhollem: Povitr Pustokanchi, nhoi mhonn Devachê podvechi, tumkam vollokh na dekhun tumi chuktat.
30
Karonn, punorjivontponnachea somoiar dadle logn zainant ani bailank logn korun dinant, punn tim sorgar asteam Devachea dutam sarkim zatat.
31
Punn mel’leanchea punorjivontponna vixim oxem Devan tumkam sanglam tem tumi vachunk na?
32
‘Abrahamacho Dev, Izaakacho Dev, ani Jakobacho Dev Hanv.’ Mhonnttôch mel’leancho nhoi, bogor jivim asloleancho Dev To!
33
Hem aikun lôk Tachê zannvaiê vixim ojap zalo.
34
Punn Sadukink Tannem oge kele mhonn aikun, Farizev ektthãi zaun aile,
35
ani Taka gondhollak ghalunk tanchê bhitorlea eklean vicharlem:
36
Guruji, Somurtichi vhoddli adnia ti khõichi?
37
Jezun portipall kelo: ‘Sogllea tujea kallzan, sogllea tujea jivachea bollan, ani sogllea tujea monan, Sorvespora tujea Devacho môg kôr.’
38
Hi soglleam-vôn vhoddli ani poili adnia.
39
Punn hichêch sarki dusri asa ti hi: ‘Tuzoch kortai toso, tujea peleacho môg kôr.’
40
Hea don adniancher dhòrloli asa soglli Somurt ani Provadianchi xikovnn.
41
Farizev ektthovlole astana, Jezun tanchê kodde ho vichar kelo:
42
Krista vixim tumkam kitem dista? To konnacho put? Tãnnim Taka zobab dilo: Davidacho.
43
Tannem vicharlem: Toxem zalear, Atmeachea preronnan David taka Somi mhonntta tem koxem? Tôr tannem mhollam:
44
‘Sorvesporan mhojea, Somiak mhollem: Tujea dusmanank tujea, pãianchi monnoi Hanvem kori-sôr, tum Mhojea uzvea hatak bos.’
45
Zôr David taka Somi mhonntta, to tacho put koso tôr?
46
Konnachean Taka êk zap diunk zali na, nhoi mhonn to dis meren anink Tachê kodde kitem-i vicharunk konnakuch kalliz zalem na.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.