Home

Matev Chapter 2 - Povitr Pustok Revised - 2010

1
Herod raza razvôtt choloitalo tednam, Judeiachea Bethlehemant Jezu zolmolea uprant ovchituch Udenti thaun kãi vidvan Jeruzaleak aile
2
ani tãnnim oxem vicharlem: Zolmola to Judevancho raza khõi asa? Tachem noketr udetana ami pollelam ani sorpottun taka nomoskar korunk ami aileanv.
3
Hem aikun Herod raza ghaborlo ani tachê borabôr ak’khem Jeruzalem.
4
Somest mukhel iadnikank ani porjechea dhormxastriank zomoun, Krist khõi zolmuncho asa tê vixim tanchê kodde to nimgunk laglo.
5
Tãnnim taka oso zobab dilo: Judeiachea Bethlehemant, kiteak provadia vorvim oxem boroilolem asa:
6
‘Ani tum, Judachea, prantantlea Bethlehema, Judachea mukheliam, modem koxêch bhaxen, soglleam-vôn lhan nhoi tum! Kiteak tujê thaun nipzotolo,êk fuddari, ani toch Mhojê Israel-porjek, chorvak vhortolo.’
7
Tednam Herodin tea vidvanank kuxin apoun vhele ani noketr kedna dixtti poddlolem tê vixim tanchê kodde barkaien nimgun ghetlem,
8
ani tankam Bethlehemak dhaddun mhollem: Vochat, ballkachi sarki khobor gheiat, ani to tumkam melltôch, hanvem-i sorpottun taka nomoskar korunk vechê khatir, mhaka kolloiat.
9
Razachem aikun te vattek lagle; ani tãnnim udetana dekhlolem tem noketr ovchit tanchê mukhar vochunk laglem, ani Ballôk aslo tea zagear pavun thamblem.
10
Noketr polleun te ekdomuch khuxalbhorit zale
11
ani ghorant bhitôr sorun Ballkak Tachê avoi Mariechea sangata tãnnim dekhlo, ani saxttangim poddun tãnnim Taka nomoskar kelo. Uprant, aplim bhanddaram ugddun, Taka him dennim somorpilim: bhangar, dhump ani gondhrôs.
12
Punn Herodi-xim porot vochona zaunk Devan tankam sopnant xiddkaile, ani dusrê vatten aplea desant te portole.
13
Te vochona fuddem, ovchituch êk devdut Juzek sopnant dixtti poddlo; tannem mhollem: Utth, Ballkak ani Tachê avoik ghe ani Ejiptak pollun voch, ani hanv sangi porian thõi rav; tôr Herod Ballkacho jiv kaddunk Tachi sôd korcho asa.
14
Juze utthlo ani, Ballkak ani Tachê avoik gheun, têch rati Ejiptak pollun gelo,
15
ani Herod morosôr thõi ravlo. Ejiptak thaun Mhojea putak Hanvem apoun haddlo , oxem Sorvesporan provadia vorvim sanglolem utor pallon ieunchê khatir hem ghòddlem.
16
Vidvanamnim apnnak fottoilo mhonn polleun, Herod ekdom’ ragabhorit zalo ani aple monis dhaddun Bethlehemant ani tea ak’khea jil’leant, vidvanam kodde nimgun ghetlolea kallachea hixoba pormannem, don vorsanchea vô unnê piraiechea ballkank marun uddoile.
17
Tednam Jeremias provadia udexim sanglolem aslem tem khorem zalem:
18
Ramant êk bob aikunk aili, mottem roddnnem ani vilap. Rakel aplea bhurgeank roddta :tim nant mhonn, na tika buzvônn.
19
Herod mortôch ovchituch devdut Ejiptant Juzek sopnant dixtti poddlo;
20
tannem oxem mhollem: Utth, Ballkak ani Tachê avoik ghe ani Israel desant porto voch, kiteak Ballkacho jiv kaddunk sôdtale te morun gele.
21
To utthlo ani Ballkak ani Tachê avoik gheun Israel desant porot gelo.
22
Punn aplea bapai Herodichê svater Arkelav Judeiant razvôtt choloita mhonn aikun, thõi vochunk to bhielo; ani sopnant apnnak oso xiddkailo mhonnun, Galileia prantant gelo.
23
Thõi Nazaret mhonnttat tea nogrant tannem tthikann kelem. Taka Nazaretkar mhonn nanv poddtolem, oxem provadia udexim sanglolem utor pallon ailem.Mt.

Golden Verse

Samuelachem Dusrem Pustok 17:18

Toripunn eka chakran tankam pollele ani Absalanvak kollit kelem. Oxem astam-i tãnnim dogamnim-i pollapôll kaddli ani Bahurimant ravpi eka mon’xachea ghora-xim pavle. Tachea angnnant êk bãi asli. Te tantum bhitôr denvle.