Home

Matev Chapter 13 - Povitr Pustok Revised - 2010

1
Teach disa Jezu ghorantlo bhair sorun doriachê dhodder vochun boslo;
2
punn lokache itle vhodd zome Tachê sorxem aile, ki To eka hoddear choddun boslo.
3
Sogllo lôk dhodder ravlo, ani Tannem tankam voparimnim sobar vostu sangleô. Tannem mhollem: Polleiat, konn-eklo vomp’pi vompunk gelo.
4
Vomptana thoddem bim vatter poddlem ani suknnim ailim ani tãnnim tem khelem.
5
Ani dusrem khoddpi zomnir poddlem; thõi chôdd-xi mati nasli; ani matiechi kholainasli dekhun, tem rokddench kirlolem khorem,
6
punn vot ietôch korpolem, ani pallam na zaun suklem.
7
Her kantteam modem poddlem, ani kantte vaddle ani kantteamnim taka chepun dhôrlem.
8
Her borê zomnir poddlem ani pik zalem: ekak xembôr, dusreak satth, ani tisreak tis.
9
Kan asloleamnim aikunchem.
10
Tednam xisamnim lagim sorun Taka vicharlem: Voparimnim tanchê kodde kiteak uloitai?
11
Tannem portipall kelo: Kiteak Sorginchea Rajeache gutt vollkhunchem dennem tumkam dil’lem asa; tankam herank na.
12
Asa tankam Dev anink-ui ditolo ani tanchem map bhoron òt’tolem; punn na tankam, asa tem porian tanchê koddlem Dev kaddun ghetolo.
13
Dekhun Hanv voparimnim tanchê kodde uloitam, kiteak polleun-ui tankam disona, ani aikun-ui tankam aikona ani somzo-i na.
14
Izaiasan oxem adinch sanglolem tem tanchê sovem pallon ieta:‘Aikun-aikun tumkam kãi, somzochem na; polleun-polleun tumkam kãi dischem na.
15
Kiteak hea lokachem kalliz zodd-nibor zalam,tanche kan bhere zaleat, tanche dolle dhamplole asat; na tôr dolleamnim tankam disunk lagtolem, kanamnim tankam sarkem aikunk melltolem, monan tankam somzotolem, ani, tim Mhojê-xim portun ieun, Hanv tankam borim korin .’
16
Punn nitt polletole tumche dolle ani sarkem aikotole tumche kan bhagi!
17
Hanv tumkam khorench sangtam: tumi polletat tem polleunk zaite provadi ani dhormvont mon’xam axelim, punn tankam polleunk mell’lem na; ani tumi aikotat tem aikunk-ui tim axelim, punn tankam aikunk mell’lem na.
18
Vomp’piachi vopar tumi tôr aikolea.
19
Rajeachem Utor aikotat ani tem somzonant tim vatter vomplolea bia sarkim; devchar ieun tanchea kallzant vomplolem tem kaddun vhorta.
20
Khoddpi zomnir poddlolem bim Utor aikotat ani rokddinch tem hurben manun ghetat tim mon’xam;
21
punn tankam apnnam bhitôr pallam nant; ani tim thoddoch vêll thir urtat; tea Utrak lagun upodre ani dhumallo iena fuddem tancho bhavarth rokddoch halta.
22
Kantteamnim vomplolem bim Utor aikotat tim mon’xam, punn hea sonvsaracheô dhasti ani girestkaiechi bhul Utor damun dhôrtat ani taka pik zaina.
23
Borê zomnir vomplam tem, Utor aikotat ani somzotat tim mon’xam; him pik ditat, ekak xembôr, dusreak satth, tisreak tis.
24
Aniêk vopar tankam ghalun Tannem mhollem: Sorginchem Raj koslem tem aikat: konneklea mon’xan aplea xetant borem bim vomplem.
25
Sogllim nhidlolim astana, tacho dusman ailo ani gonva modem nêr vompun gelo.
26
Xet vaddon konnsam ietôch, nêr-ui dixtti poddlo.
27
Ghorkarachea vavraddiamnim tachê sorxem ieun mhollem: ‘Dhonia, tujea xetant tunvem borem bim vomplolem nhoi? Tôr nêr khõicho ailo?’
28
Tannem oxi tankam zap dili: ‘Hem dusmanan kel’lem kam’. ‘Chakramnim taka vicharlem: ‘Ami vochun xet nôddlolem tuka zai?’
29
Tannem zobab dilo: ‘Naka; nêr umttitana, ghoddiek tumi tea borabôr gonv-ui umttixat.
30
Lunvnni ie-sôr don-ui borabôr vaddom-di; ani lunvnnechea vellar, poilo nêr ektthãi korun ujeak lavchê khatir, tachim penddkulam bandat; magir gonv mhojea koddeant bhôrat mhonn hanv lunvtoleank sangtolom.’
31
Dusri êk vopar ghalun Tannem tankam mhollem: Sorginchem Raj oxem: eka mon’xan sansvachem bim gheun tem aplea porsant roilem.
32
Tem khorench sogllea biam-vôn lhan; punn vaddtôch, sogllea zhaddpalea-vôn unch zaun, tachem zhadd zata, ani varea velim suknnim ieun tachea khandiancher vosti kortat.
33
Tannem anink êk vopar tankam sangli: Êkê bailen khomir ghetlo ani môll’lolea pittachim tin vhoddlim mapam dhôrun tantum to purlo ani sogllench pitt fuglem; hachê sarkem Sorginchem Raj.
34
Jezun voparimnim soglleô heô vostu porjek sangleô ani voparim bogor To tanchê kodde uloinaslo.
35
Voparimnim uloitolom, sonvsar rochloleak gupit asloleô vostu ukteô kortolom, hem provadiachem utor oxem khorem zalem.
36
Tednam, lokak dhaddtôch, Jezu ghorant bhitôr gelo, ani Tachea xisamnim Tachê sorxem ieun mhollem: Xetantlea nerachê voparichi somzonni amkam di.
37
Tannem portipallun tankam sanglem: Borem bim vompta to Mon’xacho Put.
38
Xet mhonngê sonvsar. Borem bim mhollear Rajeachim bhurgim. Nêr, Noxtteachim bhurgim.
39
Nêr vomplo to dusman, devchar. Lunvnnecho vêll, kallachi sompadnni. Lunvpi, devdut.
40
Zoxem nêr ektthãi korun ujeant lastat, toxem kallachê sompadnnek zatolem.
41
Mon’xacho Put Aplea dutank dhaddtolo ani he dusreank patok korunk oddun vhortat tea soglleank ani odhormi mon’xank Tachea Rajeantlim zomoun
42
ujeachea agtteant uddoitole. Thõi sogllim rudon korun ani dant korkoraun astolim.
43
Tednam Devak manovlolim mon’xam aplea Bapachea Rajeant suria vori porzolltolim. Aikunk kan asloleamnim aikunchem.
44
Oxem-i Sorginchem Raj mhonn somzat: eka xetant êk tthevo liplolo aslo; konn-eklea mon’xak to mell’lo; hannem novean to lipoun dovorlo, ani khuxal zaun to gelo, magir apnna kodde aslem titlem-i tannem viklem ani tem xet viktem ghetlem.
45
Têch bhaxen Sorginchem Raj koslem tem sangtam: konn-êk veapari nazuk motiam sôdunk bhonvtalo.
46
Ek unch molachem motim taka melltôch, to gelo, apnna kodde aslem titlem-i tannem viklem ani tem motim viktem ghetlem.
47
Toxench Sorginchem Raj oxem mhonnum-ieta: êk rampônn doriant marlea uprant ti sogllea jin’sachi maslli dhôrta.
48
Ti bhòrlea uprant, ti ôddun haddtat ani, veller bosun, bori maslli panttliamnim ghaltat ani upkarona ti bhair uddoitat.
49
Kallachê sompadnnek toxench zatolem: devdut bhair sortole ani borea mon’xam modlim noxtteank kuxin kaddtole
50
ani tankam ujeachea agtteant uddoitole: thõi tim rudon korun ani dant korkoraun astolim.
51
Tumi hem sogllem somzoleat? Tãnnim mhollem: Hôi.
52
Ani Tannem tankam sanglem: Mhonnttôch, Sorginchea Rajeacho xis zalolo dôr-eklo dhormxastri aplea bhanddarantleô noveô ani pornneô vostu bhair kaddtolea eka ghorkara sarko.
53
Heô vopari sangun sompoitôch, Jezu thõicho bhair sorun gelo.
54
Ani Aplea khaxa ganvant vochun To tanchea devsthanant oxi xikovnn ditalo, ki lôk ojap zaun mhonnttalo: Hi zannvai ani vismitam korchi podvi haka khõichi?
55
Ho thovoiacho put nhoi? Maria mhonnttat ti tachi avoi nhoi? Ani Jakob, Juze, Simanv ani Judas tache bhav nhoi?
56
Ani tacheô bhoinni soglleô amchêch modem asat nhoi? Tôr hem sogllem taka khõichem ailem?
57
Ani Taka manun gheunk tanchean zainaslem. Punn Jezun tankam mhollem: Eka provadiak fokot aplea khaxa desant ani aplea ghorant man na.
58
Ani tankam bhavarth naslo dekhun Jezun thõi choddxim vismitam kelim nant.

Golden Verse

Samuelachem Dusrem Pustok 17:18

Toripunn eka chakran tankam pollele ani Absalanvak kollit kelem. Oxem astam-i tãnnim dogamnim-i pollapôll kaddli ani Bahurimant ravpi eka mon’xachea ghora-xim pavle. Tachea angnnant êk bãi asli. Te tantum bhitôr denvle.