Home

Lukas Chapter 2 - Povitr Pustok Revised - 2010

1
Sogllea sonvsarachi lôkgonnti korchi mhonn tea disamnim Bhov Xrêxtt Somrazacho hukum’ bhair sorlo.
2
Hi poilich lôkgonnti Kirin Siriecho razpal astana zali.
3
Ani sogllim ap-aplem nanv lavun diunk ap-aplea ganvak vetalim.
4
Apunn Davidachea Ghoranneantlo ani gotrantlo mhonnttôch, Juze-i Galileiantlea Nazaret nogra thaun Judeiantlea Bethlehem’ mhonnlolea Davidachea nogrant gelo.
5
Apnna lagim lognachem utor zal’lê ani gorbest aslolê Mariê sangatim aplem nanv lavun diunchê khatir tannem toxem kelem.
6
Ani thõi astana tiche porsutt zaunche dis bhòrle
7
ani tinnem aplea malgoddea Putak zolm dilo; ani tankam khannavollint svat nasli dekhun, tinnem taka falliamnim guttlaun khavnnent dovorlo.
8
Teach kheddea ganvant rat-paro korun gonvlli aple hindd rakhtale.
9
Sorvesporacho êk dut tanchê sorxem ubo zalo ani Sorvesporachem tez tanchê bhonvtim porzoll’lem ani te bhieun thorthorle.
10
Devdutan tankam mhollem: Bhieum nakat! Polleiat, vhodda sontosachi khobor hanv tumkam gheun ailam, ani hoch sontôs sogllê porjek bhògtolo;
11
tôr az Davidachea nogrant tumkam êk Soddvonnar zolmola; to Krist Somi.
12
Ani hi tumkam khunna: falleamnim guttlail’lo ani khavnnent dovorlolo tumkam êk ballôk melltolo.
13
Tednam ovchituch tea devduta borabôr devdutanchi êk urpônz sorgar thaun denvloli dixtti poddli;
14
Bhov unchlea sorgar astea Devak mhoima, ani prithver astea mon’xank Tachi doia ani xanti!
15
Ani devdut tanchê sorxile kaddun sorgar vetôch gonvlli ekamekak mhonnunk lagle: Ami Bethlehemak vochum-ia ani jem kitem ghòddlam ani Sorvesporan amkam kollit kelam tem polleun ieum-ia.
16
Ani vegim-vegim voch zalear, Maria, Juze ani khavnnent dovorlolo Ballôk tankam mell’lim.
17
Ballkak polleun, jem kitem Tachê vixim tankam sanglolem, tem tãnnim porgôtt kelem.
18
Ani gonvlliamnim tankam sangloli khobor aikun sogllim ojap zalim.
19
Maria heô soglleô ghòddnniô aplea kallzant gholloun samballtali.
20
Ani apnnank sanglolem toxench sogllem aikolea ani pollelea uprant, Devak mhoima diit ani Tachi vakhann’nni korit gonvlli porot gele.
21
Ballkachi sunôt korunk atth dis bhòrtôch, Jezu mhonn Taka nanv ghalem; hench nanv To Aplê avoichea kusveant sombhovchê adim devdutan Taka ghalchem mhonn sanglolem.
22
(a)Moizesachê Somurti pormannem tanchi xud’dhi korche dis bhòrle; tednam oxem zalem:
23
Kusvo ugôddta to dôr-eklo put Sorvesporak bhettoil’lo zatolo, Sorvesporachê Somurtint boroil’lea hea utracho ugddas korun, Ballkak Sorvespora mukhar dovrunk
24
ani, Sorvesporachê Somurtint sanglolem asa tea pormannem, kovddeanchê zoddiecho, na zalear parveanchea don pileancho iôdn somorpunk, (22b)Ballkak Jeruzaleak vhelo.
25
Tednam Simeianv nanvacho êk promannik ani bhoktivont monis Jeruzaleant aslo; to Israelachê novsornnechi vatt polletalo ani Povitr Atmo tacher aslo.
26
Sorvesporachea Kristak pollelea xivai to morcho na mhonn Povitr Atmean taka kollit kel’lem.
27
Atmeachea preronnan Devmondirant ailo, ani Somurtichê chali pormannem Ballka Jezuk korchem aslem tem korunk, avoi-bapain Taka bhitôr haddlo tednam,
28
tannem-i Taka aplea hatamnim ghetlo ani Devachi tust korun mhollem:
29
Tunvem mhaka sanglãi toxem, Tujea hea sevokak, Dhonia, xantin atam vochunk ditai;
30
kiteak sogllea raxttram mukhar, Tunvem toiar kel’li soddvônn
31
mhojêch nodren hanvem dekhli:
32
porzank uzvaddaito Prokas, Tujê porjê Israel’cho, Tunvench favo kel’lo Protap!
33
Ani Tachê vixim mhonnott tem aikun tachea avoibapaik ojap distalem.
34
Tednam Simeianvan tankam axirvad dilo ani Mariek, Tachê avoik, tannem mhollem: Aik, Israelant zaitim zannam bhuim poddunk, ani zaitim zannam novean utthunk, toxench konn-konn Tacher add vochunk, êk kuru koxi Devan Taka nemla.
35
Hea vorvim zaiteanchim gupit chintnam uktim zatolim. Ani êk torsad tujem kalliz aspas vidhtoli.
36
Asherachea kullachi, Fanuelachi dhuv, An’na nanvachi êk provadin asli; ti utar piraiek pavloli; logn zalea uprant vidva zaisôr ti sat vorsam aplea ghova borabôr jiel’li;
37
ani atam piraiechim tika chouraixim vorsam zal’lim. Dis-rat upas ani magnnim korun, ti Devachi bhokti kortali ani Devmondirantuch astali.
38
Ti-i teach vellar thõi pavun sorun Devak vakhannunk lagli ani Jeruzaleachê soddvonnechi vatt polleun astolea soglleank Ballkachi khobor ti sangunk lagli.
39
Ani Sorvesporachê Somurti pormannem korchem aslem titlem-i kelea uprant, tim Galileiant, aplea Nazaret nogrant, porot gelim.
40
Vorsamnim vaddtam, Bhurgo ghôtt zait vetalo ani zannvaien bhoron ietalo; ani Devacho axirvad Tacher aslo.
41
Tacho avoibapui vorsachea-vorsa Pask-Utsovak Jeruzalea vetalo.
42
Ani To bara vorsancho zalo tednam, tim Utsovak sodanchê bhaxen Jeruzaleak gelim;
43
ani Utsovache dis sorlea uprant, portun ietalim tednam, Tachea avoi-bapaik kollonastana bhurgo Jezu Jeruzaleant fattim ravlo.
44
Punn To vattechea sangatiam borabôr astolo mhonn somzun, tim eka disachi vatt cholun ailim ani soiream-dhaiream ani vollkhichea loka modem tãnnim Taka sôdlo.
45
To mellona zatôch, Taka sôdit-sôdit tim portun Jeruzaleak gelim.
46
Ani tin disam uprant To tankam Devmondirant mell’llo: xastriam modem bosun To tanchem aikotalo ani tankam vichar korit aslo.
47
Tachem aikotolea somestank Tachea gineanachem ani Tachea zobabanchem mottem ojap dislem.
48
Taka thõi polleun tim ojap zalim; ani Tachê avoin Taka mhollem: Puta, Tunvem amkam oxem kiteak mhonn keleim? Polle, khonti-huske kaddun Tuzo bapui ani hanv Tuka sôdtaleanv.
49
Ani Tannem tankam mhollem: Tumi kiteak mhonn mhaka sôdtaleat? Tôr Mhojea Bapachea ghorant Hanvem asunk zai mhonn tumi nokllo asleat?
50
Punn To uloilo tem tankam somzolem na.
51
Ani tanchê borabôr To denvun gelo ani Nazaretak portun ailo; thõi To tankam khalto ravlo. Tachi avoi heô soglleô ghòddnniô aplea kallzant samballun dovortali.
52
Ani Jezu zannvaien, piraien ani kurpen Deva ani mon’xam mukhar vaddot vetalo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.