Home

Lukas Chapter 15 - Povitr Pustok Revised - 2010

1
Dônddvosuldar ani sogllê to rechim patki mon’xam Jezuk aikunk Tachê-xim ietalim;
2
ani Farizev toxe dhormxastri gunngunnun oxem mhonnttale: Ho monis patkiank borê bhaxen gheta ani tanchê borabôr jevta-khata.
3
Dekhun Tannem tankam oxi êk vopar sangli:
4
Tumchê modem xembôr menddram aslolo konn-êk monis asa mhonn somzat; tantlem ek menddrum sanddlem mhonnum-ia; nnoian’nnoi oronneant sôddun, sanddlam tem mello-sôr taka sôdunk vochonastam to ravot kai?
5
Ani tem mell’llea uprant, to khuxal zaun taka khandar ghalta
6
ani, ghora pavtôch, ixttank ani xezariank apoun to mhonntta: ‘Mhojem sanddlolem menddrum mell’llem mhonn mhojea vangdda khuxal zaiat.’
7
Têch bhaxen, Hanv tumkam sangtam, êk patki monis jivit bôdlit zalear, tachê pasot sorgar kedo vhoddlo sontôs zatolo! Jivit bodôlpachi apnnank goroz na mhonn chint’tolim nnoian’nnoi promannik mon’xam astit tôr, hanchê pasot sorgar iedo sontôs na mhonn Hanv tumkam sangtam!
8
Vô rupeache dha nanne asloli konn-êk bail asa mhonn somzat; tantlo êk sanddot zalear, ponntti pettoun, ghorak sarônn marun, to nanno mello-sôr mhenotin to sôdinastana ti ravot kai?
9
Ani to mell’llea uprant, ti aplea ixttinnink ani xezarnink apoun mhonntta: ‘Mhozo sanddlolo nanno mhaka mell’llo mhonn mhojea vangdda khuxal zaiat.’
10
Têch porim, Hanv tumkam sangtam, êk patki monis jivit bôdlit zalear, Devache dut sontosbhorit zatole.
11
Anink-ui Tannem sanglem: Konn-eklea mon’xak dog put asle
12
ani tanchê modlea dhakttean bapaik oxem mhollem: ‘Bapa, mhaka poddta to daizacho vantto mhaka kaddun di.’ Ani tannem tankam daiz vanttun dilem.
13
Ani thoddea disam bhitôr dhakttea putan apnnachem aslem titlem-i ektthãi kelem ani ghorantlo bhair sorun to eka poixilea ganvant gelo; ani thõi mostem jivit jieun tannem aplê girestkaiechi vatt laili.
14
Ani tannem sogllem hogddaun uddoitôch, tea ganvant êk khôr bhuk poddli ani to-i oddchonnik sampoddlo.
15
Tednam vochun to tea ganvantlea konn-ekleager chakrek ravlo; ani tannem taka aplea xetant dukram chorounk dhaddlo;
16
ani dukram khatat teô sangô tori khaun aplem pott bhôrunk taka khuxi ietali, kiteak konn taka jevnnak kãich dinaslo.
17
Xekim, soirannar ieun, tannem mhollem: ‘Kitle disvoddeache manai mhojea bapaichea ghorant naka-puro zai-sôr jevun-khaun asat, ani hanv hanga bhuken mortam!
18
Tôr hanv utthun mhojea bapai-xim vetolom ani taka mhonnttolom: ‘Bapa, hanvem sorgacher ani tujer add patok kelam;
19
mhaka tuzo put mhonnunk anink mhaka favo na; tujea manaiantlo eklo koso mhaka dhôr.’
20
Ani utthun to aplea bapai-xim gelo. Poisuch astana tachea bapain taka dekhlo ani tachem kalliz churchurlem; ani dhanvun vochun tannem taka veng marli ani tache ume gheit ravlo.
21
Putan taka mhollem: ‘Bapa, hanvem sorgacher ani tujer add patok kelam; mhaka tuzo put mhonnunk anink mhaka favo na.’
22
Tednam bapain aplea chakrank sanglem: ‘Boreantlem borem ek vostr veginchê-vegim haddun taka nhesoiat; tachea bottak mudi ani pãiank vhannô ghalat;
23
gulgulit paddkulo haddun marat; jevonn korum-ia ani borem-borem khaun-pieun khuxal zaum-ia.
24
Kiteak ho mhozo put mel’llo, to novean jivont zala; sanddlolo, to porot mell’lla.’ Ani tãnnim jevunk suru kelem.
25
Tednam tacho vhoddlo put xetant aslo ani ieun ghora lagim pavtam-pavtam tannem songit ani nach zatat tim aikolim
26
ani, eka chakrak apoun, kitem zalam kai mhonn tannem vicharlem.
27
Chakran zap dili: ‘Tuzo bhav aila, ani to solamoti pavlo mhonn tujea bapain gulgulit paddkulo marla.’
28
Punn to zobôr ragar zalo ani portipallun tannem bapaik oxem mhollem:
29
‘Polle, itlim vorsam zalim hanv tuji seva-chakri kortam ani tujem utor hanvem kednanch môddunk na, tori mhojea ixttam borabôr jevunk-pieunk tunvem mhaka kednanch êk bokddo legun dilo nãi;
30
punn xindoll bailam borabôr aplem daiz khaun-hogddaun ho tuzo put iena fuddem tunvem tachê pasot datto-motto paddkulo marloi!’
31
Punn tannem taka sanglem: ‘Puta mhojea, tum sodanch mhojea sangata asai ani jem kitem mhojê lagim asa tem sogllem tujench.
32
Punn borem jevonn korunk ani khuxal zaunk purtem karonn aslem: tôr ho tuzo bhav mel’lo, to novean jivont zala; sanddlolo, to porot mell’lla.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.