Home

Juanv Chapter 6 - Povitr Pustok Revised - 2010

1
Magir Jezu Galileiachea vô Tiberiasachea Doriachê poltoddi gelo.
2
Ani lokachi urpônz Tachê pattlean geli, kiteak piddevontam khatir To kortalo teô khunna tãnnim dekhloleô.
3
Jezu dongrar choddlo ani Aplea xisam sangatim thõi boslo.
4
Judevancho Pask-Utsôv lagim pavlolo.
5
Aple dolle uklun ani lokachi vhôdd urpônz Apnna-xim ieta ti polleun, Tannem Filipak mhollem: Hea lokak khaunk diunk khõiche mhonn ami undde gheunche?
6
Tachi porikxa korunk Tannem hem mhollem, kiteak Apunn kitem kortolo aslo tem To boro zanno aslo.
7
Filipan Taka zobab dilo. Ek-ekleak ilo-so kuddko poddtolo zalear, don’xim dinaranche undde tankam pavche nant.
8
Tachea xisam modlea eklean, Andre, Simanv Pedruchea bhavan, Taka mhollem:
9
Hangasôr konn-eklea bhurgea lagim panch undde ani don maslliô asat; punn itlea lokak hem khõi pavta?
10
Jezun mhollem: Lokak bosoiat. Tê svater zaitem tonn aslem; mhonnttôch lôk boslo: dadlech sumar panch hozar asle.
11
Tednam Jezun undde ghetle ani Devak dhin’vasun bosloleank te vanttle; têch porim maslliô-i vanttleô. Tankam zai titlem vanttun dilem.
12
Ani tim dhadoxi zatôch, Tannem Aplea xisank mhollem: Kuddke urleat te ektthãi korat; kãich ibadd zaum noiê.
13
Dekhun, tanchem khaun zatôch, zovachea panch unddeanche urlole kuddke tãnnim ektthãi kele, ani oxeô bara panttliô bhòrleô.
14
Hi Tannem kel’li khunna lokan dekhli Tednam, tãnnim mhollem: Sonvsarant ieuncho asa to Provadi dubava virêt hoch to!
15
Tim ieun Apnnak bollan dhôrun raza korunk sôdtalim mhonn Jezu zanno aslo, dekhun To koddsorun Apunn eklo novean dongrar gelo.
16
Sanz zatôch Tache xis doria-xim denvun gele,
17
eka hoddear choddle, ani Kapernauma vochunk doria utrunk lagle. Jezu tanchê sorxem pavchê adim kallôkh zalo.
18
Zhonnzhonnit varo suttlo ani doria uchambôll zaunk laglo.
19
Sumar tin ki char kilometranchi vatt tanddun kaddtôch, tãnnim Jezuk doriacher cholta ani hoddea lagim pavta to dekhlo. Tankam bhem dislem,
20
punn Tannem tankam mhollem: Hanv to, bhieum nakat!
21
Tednam te Taka hoddeant gheunk kortale, punn, thõichê-thõich, te vetale tê toddik hoddem laglem.
22
Dusrea disa, thõi ekuch hoddem aslem ani Jezu Aplea xisam sangatim tea hoddear choddunk naslo, punn fokot Tache xis gel’le: hem sogllem poltoddi ravlolea lokan pollelem.
23
Somian Devak dhin’vaslea uprant tãnnim undde khel’le tea zagea lagim anink hoddim Tiberiasa thaun pavlolim.
24
Jezu thõi naslo mhonn lokan dekhlem, ani Tache xis-ui thõi nant mhonn polleun, to lôk hoddeamnim choddun Jezuchê sôdik Kapernauma ailo.
25
To tankam toddir mell’llo; Tednam tãnnim Taka mhollem: Guruji, Tum hanga kedna ailoi?
26
Jezun tankam zap diun mhollem:Khorench khorem Hanv tumkam sangtam, tumi khunna dekhleô mhonn nhoi, punn undde khaun dhadoxi zaleant dekhun tumi Mhojê sôdik aileant.
27
Khaun sorta toslea khanna khatir tras gheum nakat, punn Sasnnik Jivitak togta toslea khanna khatir tras gheiat; oslem khann Mon’xacho Put tumkam ditolo; karonn Bapan, khud Devan, Tacher Aplo xik’ko marla.
28
Tednam tãnnim Taka mhollem: Devak zai toslim kamam korunk ami kitem korchem?
29
Jezun tankam mhollem: Zaka Devan dhaddla, Tacher bhavarth dovrat: hench tem Devak zai tem kam’ .
30
Tãnnim Taka mhollem: Toxem zalear, khunna polleun Tujer ami bhavarth dovorchê khatir kosli khunna korun amkam dakhoixi? Kitem kortoloi Tum?
31
Amchea purvozamnim oronneant man’na khelo; ‘Tannem tankam sorgincho unddo khaunk dilo’, oxem Povitr Pustokar boroil’lem asa.
32
Jezun tankam mhollem: Khorench khorem Hanv tumkam sangtam, Moizesan tumkam sorgincho unddo diunk na; Mhozo Bap ki tumkam khoro Sorgincho Unddo dita,
33
Kiteak Zo sorgar thaun denvta ani sonvsarak Jivit dita, Toch Devacho Unddo.
34
Tãnnim Taka mhollem: Saiba, ho unddo amkam sodam di.
35
Jezun tankam mhollem: Hanv Jivitacho Unddo; Mhojê-xim ietat tankam kodinch bhuk lagchi na, ani Mhojer bhavarth dovortat tankam kodinch tan lagchi na.
36
Punn Hanvem tumkam oxem sanglam: tumi Mhaka dekhla, tori Mhojer tumi bhavarth dovrinant.
37
Mhozo Bap Mhaka dita tim sogllim Mhojê-xim ietolim; ani Mhojê-xim ietat tankam Hanv poro ghalcho na.
38
Mhoji khuxi korunk nhoi, punn Mhaka patthoila Tachi korunk Hanv sorgar thaun denvlam;
39
ani Mhaka patthoila Tachi khuxi hi: jim sogllim Tannem Mhaka dileant tantlea konnakuch Hanvem ibaddcho nhoi, punn nimannea disa tankam soglleank Hanvem punorjivont korchim.
40
Hich ti Mhojea Bapachi khuxi: jim konn Putak polletat ani Tacher bhavarth tthevtat, tankam soglleank Sasnnik Jivit mellchem, ani nimannea disa Hanvem tankam punorjivont korchim.
41
‘Hanv sorgar thaun denvlolo Unddo’, oxem Tannem mhollem dekhun, Judev Tachê vixim gunngunnunk lagle.
42
Tim mhonnttalim: Ho Jezu nhoi rê, Juzecho put?! Tachea avoibapaik ami vollkhonanv kitem? ‘Hanv sorgar thaun denvlam’, oxem tachean koxem mhonnum-ieta?
43
Jezun tankam zap diun mhollem: Tumchêch modem gunngunnum nakat.
44
Bapan Mhaka dhaddla, ani, Tannem konnak Mhojê-xim oddun haddlea xivai, konnacheanuch Mhojê-xim ieunk zaina; ani Mhojê-xim ietoleank Hanv nimannea disa punorjivont kortolom.
45
‘Tim sogllim Devan xikoil’lim mon’xam zatolim’, oxem Provadianchea pustokamnim boroil’lem asa. Jim konn Bapachem aikotat ani xiktat, tim sogllim Mhojê-xim ietat.
46
Konnem Bapak dekhla mhonn nhoi, punn Zo Deva thaun aila, Tannem mat Bapak dekhla.
47
Khorench khorem Hanv tumkam sangtam, jim konn bhavarth tthevtat, tankam Sasnnik Jivit mellta.
48
Hanv Jivitacho Unddo.
49
Tumchea purvozamnim oronneant man’na khelo ani tim morun gelim.
50
Punn ho sorgar thaun denvlolo Unddo: to khatit tim morchim nant.
51
Hanv sorgar thaun denvlolo Jivo Unddo; ho Unddo khatat tim sasnnak jivim astolim; ani sonvsarak Jivit mellchê khatir Hanv ditolom to unddo Mhojench mas
52
Tednam tea Judevam modem vad-vivad zalo; tim ekamekak mhonnunk laglim Arê, ho anink amkam aplem mas khaunk koso ditolo rê?
53
Dekhun Jezun tankam mhollem: Khorench khorem Hanv tumkam sangtam, tumi Mon’xachea Putachem mas khelea bogor ani Tachem rogot pielea xivai, tumchê sovem Jivit asum nozo.
54
Jim konn Mhojem mas khatat ani Mhojem rogot pietat, tanchê sovem Sasnnik Jivit asa, ani tankam nimannea disa Hanv punorjivont kortolom.
55
Kiteak Mhojem mas khorem khann ani Mhojem rogot khorem pivonn.
56
Mhojem mas khatat ani Mhojem rogot pietat tim Mhojê sovem jietat ani Hanv tanchê sovem jietam.
57
Jivea Bapan Mhaka dhaddla ani Bapa thaun Hanv Jivit ghetam; toxench Mhaka khatat tim Mhojê thaun Jivit ghetolim.
58
Ho sorgar thaun denvlolo Unddo; tumchea purvozamnim khelo toslo ho Unddo nhoi; tim morun gelim. Ho Unddo khatat tim sasnnak jivim astolim.
59
Hem Tannem Kapernaumachea devsthanant xikovnn ditana mhollem.
60
Hem aikun, Tachea xisantlea zaitea zannamnim mhollem: To sangta tem kotthin lagta; konnachean toslem aikun gheunk zait?
61
Aple xis oxe gunngunntat mhonn Apnna bhitôr zanno zaun, Jezun tankam mhollem: Hem manun gheunk tumkam zodd lagta?
62
Ani Mon’xachea Putak poilo aslo thõi choddtana tumi dekhxat zalear, Tednam kitem mhonnttoleat tumi?
63
Atmo ki Jiv dita, mas kiteakuch upkarona Tumkam hanv uloilam tim utram Atmo ani Jivit.
64
Punn tumchê modem bhavarth dhôrinant toslim kãi zannam asat. Konn-konn bhavarth dhôrchim naslim, ani konn Aplo ghat ghetolo aslo, tem Jezu poilinch thaun zanno aslo.
65
Ani Tannem mhollem: Dekhunuch Hanvem oxem sanglam: Bapan hem dennem favo kelea bogor, konnuch Mhojê-xim ieunk xokona.
66
Hea uprant, Tachea xisantlim zaitim zannam koddsorun gelim, ani Tachea sangata anink bhonvona zalim.
67
Jezun Bara Zannank mhollem: Tumi-i vochunk sôdtat bi?
68
Simanv Pedrun Taka zobab dilo: Saiba, konna-xim mhonn vetoleanv ami? Tujim utram Sasnnik Jivitachim!
69
Ami bhavarth dhôrtanv, ani Tum Devan sonvskarlolo mhonn amkam khatri zalea.
70
Jezun tankam zobab dilo: Tumkam Bara Zannank Hanvem vinchun kaddleat ki na? tori tumchê modlo eklo devchar.
71
Simanv Iskariotacho put Judas, hachê vixim Tannem oxem mhollem, kiteak ho, Barantlo eklo zaun-ui, Tacho ghat ghetolo aslo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.