Home

Juanv Chapter 15 - Povitr Pustok Revised - 2010

1
Hanv khori Dak-Vêl ani Mhozo Bap kullvaddi,
2
Mhojê sovem riglolo na zaun follam dina to dôr-êk fantto To katrun uddoita; ani follam dita to dôr-êk fantto, tannem odik follam diunchê khatir, To bhênddta.
3
Hanv tumchê lagim uloilam tea utra vorvim tumi nitoll zaleat.
4
Mhojê sovem rigun ravat ani Hanv-ui tumchê sovem rigun ravtam. Zoxem êk fantto dak-velint rigun ravlea xivai, tachean apnnachêch osttongim follam diunk zainant, toxench tumi Mhojê sovem rigun ravlea xivai, tumchean-ui follam diunk zainant.
5
Hanv Dak-Vêl, tumi fantte. Jim konn Mhojê sovem rigun ravtat ani zanchê sovem Hanv rigun ravtam, tim subham’ follam ditat; kiteak Mhojê virêt tumchean kãich korunk zaina.
6
Mhojê sovem rigun ravonant tim eka katrun uddoil’lea fanttea sarkim suktat; osle fantte zoma kortat ani ujeant uddoitat, ani te lastat.
7
Tumi Mhojê sovem rigun ravxat ani Mhojim utram tumchê sovem rigun ravtit zalear, tumkam zai tem magat ani tumkam tem ghòddtolem.
8
Tumi subham’ follam diunchim, ani Mhoje xis tumi zaunche, hantum Mhojea Bapak mhoima mellta.
9
Zoso Bapan Mhozo môg kela, toso Hanvem-i tumcho kela: Mhojea mogant ravat.
10
Zoxem Hanvem Mhojea Bapacheô adnia samball’leat ani oso Tachea mogant Hanv asam, toxench tumi-i, Mhojeô adnia tumi samballxat zalear, Mhojea mogant ravtoleat.
11
Mhoji khuxalkai tumchê sovem aschê khatir ani tumchi khuxalkai purnn zaunchê pasot Hanvem tumkam heô vostu sangleat.
12
Mhoji adnia hi: zoso Hanvem tumcho môg kela, tosoch tumi-i ekamekacho korat.
13
Konnem zôr aplea ixttam pasot aplo jiv dilo, hachê poros vhôdd môg konnak na !
14
Mhojê adniê pormannem tumi cholxat zalear, tumi Mhoje ixtt.
15
Hea fuddem Hanv tumkam chakor mhonncho na, kiteak aplo dhoni kitem korta tem chakôr nokllo; punn Hanv tumkam ixtt mhonnttam, kiteak Mhojea Bapa koddchem Hanvem aikolam titlem-i Hanvem tumkam kolloilam.
16
Tumi Mhaka vinchun kaddunk na: Hanvem ki tumkam vinchun kaddleat. Ani hea pasot tumkam nemleat ki tumi vechem ani follam diunchim, togtat toslim follam.Oxem Mhojê nanvim Bapa kodde tumi magtat titlem-i To tumkam ditolo.
17
Hi Mhoji adnia tumkam: ekamekacho môg korat.
18
Sonvsar tumkam zollta zalear, tumkam zollchê adim to Mhaka zoll’la mhonn zanno zaiat.
19
Tumi sonvsarache asleat tôr, sonvsar tumkam aple mhonn manun tumcho môg kortolo aslo. Punn tumi sonvsarache nhoi mhonn ani Hanvem tumkam sonvsarantle vinchun kaddleat dekhun, sonvsar tumkam zollta.
20
Chakôr aplea dhonia poros vhôdd nhoi: oxem Hanvem tumkam sanglam tea utracho ugddas dhôrat. Tãnnim Mhaka dhumallo dila zalear, tim tumkam-i dhumallo ditolim; tãnnim Mhojem utor samball’lam zalear, tumchem-i samballtolim.
21
Punn hem sogllem Mhojea nanva pasot tim tumkam kortolim, kiteak Mhaka patthoila Tachi tankam vollokh na.
22
Hanv ieunk naslom ani tankam Mhozo sondêx Hanvem diunk naslo zalear, tankam patok aschem naslem; punn atam tanchem patok tancher thapina zaunk tankam nimituch na.
23
Mhaka zolltat tim Mhojea Bapak-ui zolltat.
24
Dusrea khõicheach mon’xan korunk nant tosleô kornniô Hanvem tanchê modem korunk nasleô zalear, tankam patok aschem naslem; punn atam tãnnim hem sogllem pollelam, tori astam tim Mhaka ani Mhojea Bapak-ui zolltat.
25
‘Karonn nastana Mhozo dvês dhôrtat’, hem tanchea Xastrant boroil’lem utor ghoddonk zai mhonn oxem zalem.
26
Hanv Bapa koddsun tumchê-xim êk Xaroti pattoitolom; To Bapa-sun nipzota ani Deva sombondim sot ugddapem korta to Atmo: To ietolo Tednam, To Mhojê vixim sakxi ditolo;
27
ani survatek thaun tumi Mhojê sangatim asat dekhun, tumi-i Mhoje sakxi zatoleat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.