Home

Juanv Chapter 10 - Povitr Pustok Revised - 2010

1
Khorench khorem, Hanv tumkam sangtam: zo menddranchea oddpant darantlean nhoi punn dusrê vatten choddun bhitôr sorta, to chôr ani nagovnno;
2
punn zo darantlean bhitôr sorta, to menddrancho gonvlli.
3
Taka dar-rakhnno dar ugôddta; menddram tacho tallo aikotat ani aplea menddrank to ap-aplea nanvan ulo korta ani tankam bhair vhorta.
4
Aplea menddrank bhair haddtôch to tanchê fuddem cholta, ani tacho tallo vollkhotat dekhun, menddram tachê pattlean vetat.
5
Porkea pattlean tim vochonant, punn tachê sorxilim tim pollun vetat, kiteak porkeancho tallo tim vollkhonant.
6
Jezun tankam hi vopar sangli, punn jem To tankam sangtalo, tacho ôrth tankam mell’llo na. Dekhun Jezun anink êk pavtt tankam mhollem: Khorench khorem Hanv tumkam sangtam: Hanv menddranchem dar.
8
Mhojê adim aileat te soglle chor ani nagovnne, punn menddramnim tankam lekhunk na.
9
Hanv dar; Mhojeantlean jim konn bhitôr sortat, tim surokxit astolim: tim bhair-bhitôr sortolim ani tankam chorôv melltolo.
10
Chôr ieta to fokot chorunk, marun uddounk ani ibadd korunk ieta; Hanv ailam to tankam Jivit mellchê khatir, poripunn Jivit mellchê khatir ailam.
11
Hanv boro Gonvlli. Boro gonvlli menddram pasot aplo jiv dita.
12
Êk muxarekar, to khoro gonvlli nhoi mhonn, ani menddram tachim khaxachim nhoi mhonn, landdgo ieta to polleta ani menddrank sôddun dita ani apunn par kaddta; ani landdgo tankam ubarun vhorta ani duspottaita.
13
To muxarekar ani taka menddranchem kãi poddunk na dekhun, to par kaddta.
14
Hanv boro Gonvlli;
toso Hanv Mhojeank vollkhotam ani Mhojim tim Mhaka vollkhotat,
15
ani Mhojea menddram pasot Hanv Mhozo jiv ditam.
Zoso Bap Mhaka vollkhota ani Hanv Bapak vollkhotam,
16
Ani Mhaka anink-ui menddram asat; tim hea oddpantlim nhoi; tankam-i Hanvem haddunk zai. Tim-i Mhozo tallo aikotolim. Ani oso êkuch hindd zatolo ani êkuch Gonvlli.
17
Hanv Mhozo jiv ditam ani uprant to portun ghetam dekhun, Bap Mhozo môg korta.
18
Konn Mhozo jiv zhombun kaddina, punn ap-khuxen Hanv Mhozo jiv ditam. Mhozo jiv diunk Mhaka podvi asa ani to portun gheunk-ui Mhaka podvi asa; hi adnia Mhojea Bapa koddli Hanvem ghetlea.
19
Hea utrank lagun anink êk pavtt Judevam modem veg-vegllim motam zalim.
20
Tanchê modlea zaiteamnim mhollem: Tacher devchar bosla, tachi môt firlea; tachem kiteak aikotat tumi?
21
Dusreamnim mhollem: Devchar laglolo monis oso uloina. Devchar kudd’ddeanche dolle ukte korunk xokta?
22
Hinvalleachea somoiar Jeruzaleant Bhettovnnecho Utsôv choltalo;
23
Jezu Devmondirant Solomonachea Tarangnnant bhonvtalo.
24
Tednam Tachê bhonvtonnim ektthãi zaun, Judevamnim Taka mhollem: Kedna porian Tum amkam dubavant dovortoloi? Tum Krist zalear, amkam sarkem sang.
25
Jezun tankam portipall kelo: Tumkam Hanvem sanglam, tori tumi bhavarth dhôrinant. Mhojea Bapachê nanvim Hanv kortam tim kamam Mhojê vixim govai ditat;
26
punn tumi bhavarth dhôrinant, kiteak tumi Mhojea menddrantlim nhoi.
27
Mhojim menddram tim Mhozo tallo aikotat ani Hanv tankam vollkhotam, ani tim Mhozo patthlav kortat;
28
ani tankam Hanv Sasnnik Jivit ditam, ani tim sasnnak ibadd zaunchim nant, ani tankam Mhojea hatantlim konn zhombun vhorcho na.
29
Mhojea Bapan tim Mhaka dileant, To soglleam-vôn vhôdd, ani Mhojea Bapachea hatantlim tankam konnacheanuch zhombun vhorunk zaina.
30
Hanv ani Bap êk.
31
Tednam Jezuk fatraunk Judevamnim novean fator ukôl’le.
32
Jezun tankam sanglem: Bapachê podven zaiteô boreô kornniô Hanvem tumchea dolleam mukhar korun dakhoileat; tantlê khõichê kornnê pasot tumi Mhaka fatraunk sôdtat?
33
Judevamnim Taka zobab dilo: Borê kornnek lagun ami tuka fatraunk sôdinanv, punn tujê devnindê pasot: kiteak tum monis zaun apnnakuch Dev kortai.
34
Jezun tankam zap dili: ‘Tumi dèv mhonn Hanvem sanglam’, oxem tumchea Xastrant boroil’lem asa ki na?
35
35 Mhonnttôch, zankam Devachem utor pavlam, tankam tumchem Xastr ‘dèv’ mhonntta ani Povitr Pustok moddom nozo.
36
36 Ani atam, Bapan Mhaka sonvskarla ani sonvsarant dhaddla mhonn, ‘Hanv Devacho Put’ oxem Mhojean mhonnunk zaina? Tôr tumchean Mhaka ‘tum devninda kortai’, oxem koxem mhonnum-ieta?
37
37 Hanv Mhojea Bapacheô kornniô korina zalear, tumi Mhojer bhavarth dovrum nakat;
38
38 punn Hanv teô kortam zalear, zori tumi Mhojer bhavarth dovrinant, tea kornniancher tori bhavarth dovrat; ani, oxem, Bap Mhojê sovem asa ani Hanv Bapa sovem asam mhonn tumkam khatren kollon ietolem.
39
39 Tea vellar Taka te novean dhôrunk sôdtale, punn To tanchea hatantlo sutton gelo.
40
40 Juanv poilim Jordana poltoddi snan ditalo thõi Jezu porot vochun ravlo.
41
41 Zaitea zannamnim Tachê-xim ieun mhollem: Juanvan koslich khunna korunk na, punn hea mon’xa vixim tannem sanglam titlem-i khorem zalem.
42
42 Ani thõi zaitea zannamnim Tacher bhavarth tthevlo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.