Home

Juanv Chapter 1 - Povitr Pustok Revised - 2010

1
Orombak sogllê rochnnê adim, Sôbd aslo, ani Sôbd Deva sovem aslo, ani Sôbd Dev aslo.
2
Orombak To Deva sovem aslo;
3
Tachê vorvim sorv vostu rochleat, ani rochlolea vostum modem. Tachê vinnem rochun, ail’lem kãich na.
4
Tachê sovem jivit aslem, ani tem jivit zaun aslem, mon’xancho uzvadd.
5
Uzvadd kallokhant porzollta, ani kallokhan uzvaddak, jikhunk zalem na.
6
Devan dhaddlolo êk monis, dixtti poddlo: tachem nanv Juanv.
7
Tachê vorvim soglleamnim, bhavarth dhôrchê khatir, uzvadda vixim govaiki, diunk mhonn, to govai koso ailo.
8
To apunnuch uzvadd nhoi aslo, punn Uzvadda vixim govaiki, diunk to ail’lo.
9
Khoro Uzvadd mhollear Sôbd: sonvsarant ietolea somest mon’xank, Toch uzvadd dita:
10
To sonvsarant aslo, ani sonvsar Tannench rochlolo, tori sonvsaran. Taka vollkhun gheunk na.
11
Apleanch modem To ailo, ani jim Tachim aslim, tãnnim Taka manun ghetlo na.
12
Punn Taka manun ghetloleank, Tacher bhavarth tthevtoleank, Devachim bhurgim zaunchem. Tannem dennem kelem.
13
Hankam rogtan nhoi, mon’xasoimbachê, vondovnnen nhoi, mon’xachê khuxen-ui nhoi, punn Devan zolm dila.
14
Sôbd monis zaun dixtti poddlo: ani oxem Tannem amchê, modem tthikann kelem. Tachi mhoima ami dekhlea: hi Bapachea ekleach, Putachi khaxa mhoima, maiêmogan ani, visvaxiponnan bhòrlolo, To dixtti poddlo.
15
Tachê vixim govai diun, Juanvan arddun mhollem: To mhojê uprant ieta khorem, tori, mhojê adim aslo dekhun, To mhojê-von vhôdd, oxi hanvem tumkam zachi, khobor sanglea to Hoch.
16
Ani Tachê bhortentlem, ami soglleamnim ghetlam, dennea pattlean dennem.
17
Kiteak Somurt Devan, Moizesa vorvim dil’li, maiêmôg ani visvaxiponn, Jezu Krista vorvim aileant.
18
Devak konnem kodinch polleunk na; punn Zo Bapachea gopant asa, tea ekleach Putan Tachi vollokh dilea.
19
Juanvachi govaiki hi: tum konn kai mhonn tachê lagim vicharunk Jednam Judevamnim iadnikank ani Levitank Jeruzalea thaun pattoile,
20
Tednam tannem ukteponnim sanglem: Hanv Krist nhoi.
21
Ani tãnnim taka mhollem: Kitem tôr? Tum Elija? Tannem tankam mhollem: Hanv Elija nhoi. Tum ami ravtanv to Provadi bi? Ani tannem mhollem: Na.
22
Tednam tãnnim taka mhollem: Tum konn tôr? Amkam pattoileat tankam ami kitem sangchem? Tujêch vixim tum kitem mhonnttai?
23
Juanvan mhollem: Izaias provadian sangun dovorlam: ‘Sorvesporachi vatt nitt korat, oso oronneant êk tallo bob marta’, ho tallo hanv.
24
Tankam Farizevamnim pattoil’le.
25
Tãnnim tachê lagim anink-ui vicharlem: Tum Krist nhoi, Elija nhoi ani Provadi-i nhoi zalear, snan koxem ditai?
26
Juanvan portipall kelo: Hanv udkan snan ditam, hem khorem; punn tumi vollkhonaslolo Eklo tumchê modem asa.
27
To mhojê uprant ietolo, ani Tachea vhannanchi vadi sôddunk mhaka favo na.
28
Hem Betanient, Jordanachê poltoddi, Juanv snan ditalo thõi, ghòddlem.
29
Dusrea disa, Juanvan Jezuk apnna-xim ieta to dekhlo ani mhollem: Polleiat, ho Devacho Menddro, sonvsarachem pap kaddta to!
30
Hachich khobor sangun hanvem tumkam oxem mhollem: Mhojê uprant konn-eklo ieta, punn, mhojê adim To aslo dekhun, To mhojê-von vhôdd.
31
Hanvuch Taka vollkho-naslom, punn Tachi vollokh Israelak diunchê khatir, hanv udkan snan diit ailam.
32
Ani Juanvan oxi-i govai dili: Parvea sarko sorgar thaun Atmo denvlo ani Tacher tharlo To hanvem dekhlo.
33
Hanvuch Taka vollkhonaslom, punn Zannem mhaka udkan snan diunk dhaddla, Tannem mhaka mhollem: ‘Zacher tum Atmo denvlolo ani tharlolo dekh-xi, Toch Povitr Atmean snan ditolo.’
34
Hem hanvem dekhlem, ani ho Devacho Put j mhonn hanv govai ditam.
35
Dusrea disa Juanv aplea dogam xisam sangatim novean thõi aslo;
36
ani Jezuk cholun vetalo to tannem dekhlo ani mhollem: Ho polleiat, Devacho Menddro!
37
Him tachim utram aikun, te dog xis Jezu pattlean gele.
38
Tednam vollon ani Apnna pattlean ietale te polleun Jezun tankam mhollem: Tumkam kitem zai? Tãnnim Taka zobab dilo: Rab’bi (mhonngê ‘Guruji’), Tum khõi ravtai?
39
Tannem tankam mhollem: Ieiat ani polleiat. Te gele ani To ravtalo ti svat tãnnim dekhli; ani to dis te Tachê-xim ravle. Sanjechim sumar char zal’lim.
40
Juanvachim utram aikun, Jezu pattlean gel’le tea dogam bhitorlo eklo, Andre nanvacho, Simanv Pedrucho bhav aslo.
41
Rokddoch Andre aplea bhava Simanvak mellunk gelo; tannem taka mhollem: Amkam Mesias (mhonngê Krist) mell’la.
42
Ani tannem Simanvak Jezu-xim vhelo. Tacher barik nodor ghalun Jezun mhollem: Tum Simanv, Juanvacho put; tuka nanv atam Kefas (mhonngê Khoddop).
43
Dusrea disa, Jezun Galileiak vochunk ievjilem; Tednam Taka Filip mell’lo; ani Jezun taka mhollem: Mhojê pattlean ie.
44
Filip Bethsaidecho aslo; Andre ani Pedru he-i teach nograntle asle.
45
Filipak Natanael mell’llo, ani tannem haka mhollem: Moizesachê Somurtint ani Provadianchea Pustokamnim zachi khobor asa, to amkam mell’lla: to Nazaretcho Jezu, Juzecho put.
46
Natanaelan taka mhollem: Nazaretantlem kitem-i tori borem ieunk xokta? Filipan Taka mhollem: Ie ani polle.
47
Jezun Natanaelak Apnna-xim ieta to dekhlo ani tachê vixim mhollem: Polleiat, koslench baskollponn-naslolo khoro Israelkar ho!
48
Natanaelan Taka mhollem: Tum mhaka khõi vollkhotai? Jezun taka zobab dilo: Filipan tuka apounchê adim, tum anjirachea zhadda tolla asloi Tednam, Hanvem tuka dekhlo.
49
Natanaelan Taka portipall kelo: Rab’bi (mhonngê ‘Guruji’), Devacho Put l Tum, Tum Israelacho Raza!
50
Jezun taka mhollem: Tuka anjirachea zhadda tolla Hanvem dekhlo, itlench tuka Hanvem mhollem dekhun, tum bhavarth dhôrtai? Hea-vôn odik vhoddleô vostu tum dekhtoloi.
51
Ani taka mhollem: Khorench Hanv tumkam sangtam, sôrg ukto zal’lo tumi dekhtoleat, ani Devache dut Mon’xachea Putacher choddtana ani denvtana tumi polletoleat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.