Home

Joshuachem Pustok Chapter 10 - Povitr Pustok Revised - 2010

1
Jerikok ani tachea razak kelolem toxench Joshuan Ai xarak ani tachea razak korunk, tem xar aplea tabean korun, tacho bhosm kelo mhonn, ani toxench Gibeonant vosti korpi mon’xam Israelakodde xanti korun, tim thoim ravtat mhonn Jeru-saleachea raza Adoni-Zedekachea kanar poddlem.
2
Gibeon xar sogllea rajdhani xaram poros vhoddlem aslo-lean ani tache soglle nagrik bollixtt monis zal’lean, lokacher bhirant poddli. Kiteak Gibeon Ai xara-von vhodd aslem.
3
Mhonnttôch, Jerusaleachea Raza Adoni-Zedek-an Hebronachea raza Hohamak, Jarmutachea raza Piramak Lakishchea raza Jafiak ani Eglonachea raza Debirak oso nirôp dhaddlo:
4
‘Gi-beon xaran, Joshua ani Israelitam kodde xanti kelea. Haka lagun tumi ieiat ani tacher akromonn korunk, mhaka adar diat.’
5
Amoritanche panchui raza, mhonngê Jerusaleacho raza, Hebron-cho raza, Jarmutacho raza, Lakishacho raza ani Eglonacho raza, êk zale ani ap-lea fouzam borabor Gibeonant vochun tacher ghuri ghalun akromonn kelem.
6
Gibeonachea mon’xamnim, Gilgalant aslolea tombunt Joshuak oso sondêx dhaddlo: ‘Amkam tujea chakrank san-ddi-naka; Dongri vattarant ravpi Amorit raza amchê add ekttovleat: hea khatir vegim hanga ieun amkam vattai ani adar di.’
7
Gilgalant thaun, Joshua sangata, soglle zhuzari ani bollixtt monis asle.
8
Sorvesporan Joshuak mhollem: ‘Hea lokak bhieum naka, Hanvem tankam tujea hatant ghaleat. Tanchê modlo konnuch tujê add ubo ravunk xokcho na.’
9
Gilgal thaun ak’khi rat chol’lea uprant, Joshuan tankam ovchit dhôrle.
10
Gibeonant Israelachea dolleam mukhar Sorvesporan tankam duspo-ttaile ani haroile. Tea fuddem, Beth-Horonachê Denvtê porian tanchi fatt dhôrli ani Azeka toxench Makkeda meren tankam tollmollaile.
11
Ani te Israela mukhavele Beth-Horonachê Denvter pollun gele toxe, Sorvesporan sorgar thaun Azekant korveancho paus dhaddlo ani te mele. Israelkaramnim tolvarin marloleam-von, korveanchea pausa udexim odik mele.
12
Sorvesporan Amoritank Israelitanchê adhin kelea tea disa, Joshua Sorvespora kodde uloilo. Israela mukhar Joshuan mhollem: Suria, Gibeonacher asa thoinch rav, ani tum chondrim Aijalonachea falkear!
13
Porjen aplea dusmanacher sudd ghe porian, suria asa thoinch ravlo ani chondrim thamblo. Hem Nitivontanchea Pustokar boroilo-lem na? Suria mollba modhinch thamb-lo ani ak’kho dis porian poddunk na.
14
Sorvespor Israelachea sangata zhuztalo. Sorvesporan mon’xacho tallo aikol’lo oslo dis, adim vô uprant kednanch mell’llo na.
15
Uprant Joshua ani tachea sangata soglli Israel porza Gilgalant aplea tombunt portoli.
16
Punn Amoritanche panch raza pollun gel’le ani Mak’kedahchê dhôlint lipun ravle.
17
‘ Mak’kedahchê dhôlint panch raza lipun ravleat,’ Hi khobor Joshuak mell’li.
18
‘Dhôlichea thonddar vhodd-leô fatri ghalat ani rak'khonn korunk mon’xank pattoiat.
19
Tumi bekar ravum nakat; dusmanachi fatt dhôrat, tanchi portopachi vatt bond korat, tanchea nogramnim tankam bhitôr sorunk dium nakat, kiteak Sorvespora tumchea Devan tankam tumchê adhin keleant.’
20
Joshuan ani Israelitamnim tankam haroun, marun uddoile tedna, pollapôll kaddloli tãnnim kottamnim asro ghetlo.
21
Soglli porza Mak’kedahnt Joshua-xim tombunt xant’taien porot aili; ani Israela add ulounk konnank dhaddos zalem na.
22
Tedna Joshuan mhollem: ‘Dhôlichem tondd ugddat ani tea panchui razank mhojê-xim haddat.’
23
Tãnnim toxem kelem, Dhôlintlea panchui razank Jeru-saleachea razak, Hebronachea razak, Jarmuthachea razak, Lakishachea razak ani Eglonachea razak, Joshua-xim vhorchê pasot bhair haddle.
24
Jedna hea razank bhair haddle tedna Joshuan sogllea Israelkarank zomoile ani apnna sangata gel’lea zhuzachea fuddariank mhollem, ‘Fuddem sorat ani tumche paim hea razanchê gomter dovrat.’ Te fuddem aile ani aple paim tanchê gomtter dovorle.
25
Joshuan fuddem mhollem: ‘Bhieum nakat, Ghôtt ani thir ravat, kiteak tumi zhuztat titlea dusma-nank Sorvespor oxem kortolo.’
26
Oxem mhonnun Joshuan tankam marle ani panch zhaddancher umkollaile ani sanz zai porian te thoinch umkollun urle.
27
Dis darer poddtôch, Joshuachê adniê pormannem, tankam zhaddam voile denvoile ani te lipun aslolê tê dholint ghale. Dhôlichea tonddar vhoddle fator ghale ani aiz porian te thoim asat.
28
Teach disa Joshuan Mak’kedah aplea tabeant kelem; tolvarin tacho bhosm kelo ani tachem ani thoinsorlea razachem sarkench nisontton kelem. Thoim rav-tololeak ekleak porian tannem jivo dov-runk na. Jerikechea razak kel’lem toxench tannem Mak’kedahchea razak kelem.
29
Joshua Israela sangata Mak’kedah thaun Libnant gelo ani tacher akromonn kelem,
30
ani Sorvesporan hea xarak ani thoinsorle razak Israela adhin kelo. Israe-lan thoim aslolea sogllea jivea mon’xank marun uddoile ani Jerikechea razak kel’lem toxem Libnahchea razak kelem.
31
Libnah thaun Joshua Israela borabor Lakishak gelo ani tacher ghuri ghalun akromonn kelem.
32
Sorvesporan Lakish xar Israelachea adhin kelem ani dusrea disa Israelan tem aplea tabeant ghet-lem. Libnachea lokak kel’lem toxem sogllea mon’xank tolvarin marun uddoile.
33
Tedna Gezercho raza Horam’ Lakishachea adarak ailo, punn Joshuan taka ani konnank jivo dovrinastana sogllea lokak marun uddoile.
34
Joshua ani sogllem Israel Lakish thaun Eglonak gele. Taka veddho ghalo ani tacher zhuz manddlem.
35
Teach disa, tãnnim tem aplea tabeant korun ghetlem. Ani Lakishak kel’lem toxem sogllea jiveank tolvarin marun uddoile.
36
Eglon thaun Joshua ani tachê borabor sogllem Israel Hebronant gelem.
37
Tãnnim tem aplea tabeant kelem ani tolvarin thoinsorlea razachem, xarachem ani sogllea jiveanchem nisontton kelem. Ani Eglonak kel’lem toxench hangasorui konnuch jivo urlona. Tannim soglleacho bhosm kelo.
38
Uprant Joshua ani ak’khem Israel Debirant pavlem ani tacher akromonn kelem.
39
Tannim tem nogor tachea raza ani tachea xaram soit aplea tabeant korun ghetlem ani tolvarin sogllea jiveank marun uddoilim. Ani Hebronak, Libnahak ani tanchea razank kel’lem toxem tannem Debirak ani tachea razak kelem.
40
Oxem Joshuan dongri vattar, dokhinni vatten aslolo vattar, sokoilim mollam, utrann ani tanchea sogllea razancher zoit vhelem. Ekleak porian jivo dovorlo na. Sorvesporan Israela-chea Devan adnia kel’li toxem tannem soglleachem sarkench nisontonn kelem.
41
Kadesh-Barnea tem Gaza porian ani Goxencho ak’kho prant tem Gibeona meren Joshuan tancher akromonn kelem.
42
Sorvespor, Israelacho Dev, Israela borabor zhuztalo dekhun Jo-shuan ekach farak hea sogllea razan-cher ani tanchea prantancher zoit me-lloilem.
43
Tedna sogllea Israela sangata Joshua Gilgalant aplea tombunt gelo.

Golden Verse

Razachem Poilem Pustok 9:3

Sorvesporan taka mhollem: ‘Hanvem tujim magnnim ani Tunvem mhojê mukhar kelolim prartho-nam aikoleant. Tunvem bandlolea hea mondirant Mhojem Nanv sodankal urunk, hanvem tem sonvskarlam. Mhoji nodor ani mhojem mon sodankal thoim astolem.