Home

Jakob Chapter 5 - Povitr Pustok Revised - 2010

1
Atam tumkam girestank sangtam: tumcher ieunche asat tea hal-upodreank lagun vilap ani rudon korat.
2
Tumcheô girestkaiô kusun geleat ani tumchim vostram sannxen kheleant.
3
Tumchea bhangarak ani rupeak kollom’ laglea ani tanchi kollom’ tumcher add govai ditoli ani tumchem mas khaun uddoitoli. Nimanne dis pavot ietat, ani tumi punzaileat teô girestkaiô tea disank tumkanch girasunk êk uzo.
4
Tumchea xetanchi lunvnni kelea tea vavraddiank tumi mozuri diunk na: tich atam tumcher add bob marta. Tanchea huielincho sad Sorvespora Sorpodvedar Devachea kanar poddla.
5
Hea sonvsarant tumchem jivit sust-sukhachem ani dobajeachem zalam, ani oxem tumi gorvam bhaxen chorbevun geleant, punn tumkam marun uddovpacho Dis lagim asa.
6
Niropradhi mon’xancher formonn marun tankam tumi jivexim marlim; ani tãnnim tumcher add boll korunk na.
7
Mhojea bhavam-bhoinnimnô, Somi ie porian sõsnnikai dhôrat. Xetkamtiacho ugddas korat: zomin utpon kortoli tea moladik pikachi axa dhôrun, to xorod-kallachea ani vôsont-kallachea pausak sõsnnikaien ravta.
8
Toxench tumi-i sõsnnikai dhôrat; thir asum tumcho bhorvanso, kiteak Somi ieuncho zalo.
9
Tumcher khastichem formonn poddona zaunk, bhavam-bhoinnimnô, ekamekacher gunngunnum nakat; ho polle Nitidar tumchea darachea umbrear ubo asa.
10
Mhojea bhavam-bhoinnimnô, Sorvesporachea nanvan uloileat tea provadiancho ugddas korat: tankam khub koxtt-dogd sõsche poddle tednam, tãnnim te vhoddê sõsnnikaien ghetle; tôr tanchi dêkh gheiat.
11
Tanchê sõsnnikaiê pasot tankam ami subhagi mhonnttanv. Jobachê sõsnnikaiechi khobor tumi aikolea, ani koso Sorvesporan xevottak taka subham’ axirvad dilo, tem tumi zannont. Kiteak Sorvespor konnvallo ani maiêmogacho.
12
Choddan-chodd, mhojea bhavam-bhoinnimnô, soput gheum nakat zaum sorgachean, zaum sonvsarachean, zaum dusrê koslê-i vôstuchean. Tumchem ulovop itlench zaum-di: hôi zalear Hôi, ani na vzalear Na. Na tôr, tumi Devachê nitik sampoddtoleat.
13
Tumchê movdem konn trasank sampoddleant? Tãnnim prarthon korchem. Konn khuxal asat? Tãnnim dhin’vasnnechim gitam gavchim.
14
Tumchê modem konn piddêst asat? Tãnnim Povitr-Sobhechea zannteank apounche: hãnnim tanchê khatir magnnem korchem ani Somiachea nanvan tankam telan makhchim.
15
Hem magnnem bhavarthan kelem zalear, piddest mon’xam piddentlim utthtolim ani Somi tankam novean bholaiki ditolo; ani tãnnim patkam keleant zalear, tankam Devachem bhogsonnem melltolem.
16
Mhonnttôch Devan tumkam bholaiki diunchê khatir ekameka mukhar apunn patki mhonn vollkhun gheiat ani ekameka pasot magat. Devak manovlolea mon’xachea khotkhotit magnneak khub boll asa.
17
Elija amchêch bhaxen monis aslo; paus poddona zaunk tannem khotkhotean maglem ani saddê-tin vorsam prithumer paus poddunkuch na.
18
Uprant tannem novean magnnem kelem ani mollban paus ghalo ani zomnin aplim follam dilim.
19
Mhojea bhavam-bhoinnimnô, tumchê modlo konn-konn sota thaun koddsorlim zalear ani dusrim konn tankam portun haddtit zalear,
20
hãnnim hem motint dhôrchem: jim konn khottea rostean choltolea patkiank portun haddtat, tim tankam mornnantlim vattaitolim ani apnnankuch khub patkanchem bhogsonnem zôddtolim.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.