Home

Jakob Chapter 1 - Povitr Pustok Revised - 2010

1
Hanv Jakob, Devacho ani Somia Jezu Kristacho sevôk, zollim-mollim ximpoddlolê Devachê ak’khê porjek noman kortam.
2
Mhojea bhavam-bhoinnimnô, tumcher jin’nosvar koxtt-dogd ietat tednam, tankam lagun ekdom’ khuxal zaunk tumkam borem karonn asa.
3
Kiteak mhollear, oslê bhavarthachê porikxent Jezucher tumcho bhavarth halona zait zalear, bhavartha pasot koslê-i pidda-piddê modem tumi odik thir astoleat;
4
oslea thirponnan tumi soglleanch vattamnim Tache poripurnn xis zaunk pavtoleat, kosloch sugunn tumkam unno ascho na.
5
Dev dita ti zannvai tumchê modlea konnank-ui na zalear, tãnnim ti Deva lagim magchi; To ti tankam ditolo, kiteak To soglleank udarponnan borê khuxen dita.
6
Punn bhavarthan ti magunk zai, kosloch dubav dhôrinastana; dubav dhôrtat tim varean halta-dolta toslea doriachea lhara sarkim.
7
Doxim-i oddon, sodam othir panvlamnim cholun, oslea mon’xamnim apunn magtat tem Sorvespora koddchem apunn ghetolim mhonn chintunk favo na.
8
Doxim-i oddon, sodam othir panvlamnim cholun, oslea mon’xamnim apunn magtat tem Sorvespora koddchem apunn ghetolim mhonn chintunk favo na.
9
Eklo amcho bhav vô ekli amchi bhoinn gorib zalear, Dev apnnak voir kaddtolo mhonn visvas dhôrun sontôs bhogum;
10
toxench konn bhav vô bhoinn girest zalear, Dev tankam khala poddunk dita tednam tim-i sontôs bhôgum. Kiteak tonnachea fula bhaxen girest mon’xam nanch zatolim.
11
Suria mollbar voir choddtam-choddtam, tachi koddok unêt tonn sukoita, tonnachem ful poddta ani fulachi surupai ubun veta. Oxench, aplo veapar-dhondo korit astana, girest mon’xam bavun-sukun vetolim.
12
Koxttam-dogdam modem thir ravtat tim subhagi: oslê porikxent iesesvi zaun, Sorvesporan Aplo môg kortoleank bhasail’lo jivitacho mukutt tim ghetolim.
13
Vaitt korunk apnnacher tallnni ieta tednam, konnench oxem mhonnche nhoi: Dev mhaka hê tallnnent ghalta; kiteak vaitt korchi tallnni Devak lagoch na, nhoi mhonn Dev-ui konnakuch vaitt korchê tallnnent ghalina.
14
Punn zonn-ekleak ap-apli vôndovnni vaittachê vatten ôddta ani bhuloita.
15
Zoxi êk bail gorbhest zaun bhurgeak zolm dita, toxi amchi vôndovnni vaittacho gôrb dhôrun patkak zolm dita, ani magir patka thaun upzota tem sasnnachem moronn.
16
Mhojea bhov mogachea bhavam-bhoinnimnô, tumi tumkanch fottoum nakat.
17
Borem asa titlem, ek-ek sopurnn vordan, voir thaun amkam ieta, Deva thaun amcher denvun ieta. Tannench Suria, chondrim’ ani noketram, he soglle uzvadd mollbar rochun ghaleat; punn tanchê bhaxen To Apunnuch kodinch bodòlna ani oxem amchim monam kednanch kallokhant sanddina.
18
Prothom’ follam vori sogllea Aplea rochnnam modem ami poilim zaunchê khatir, Aplêch khuxechê ievzonnen, sotachea utra vorvim Tannem amkam novo zolm dilo.
19
Mhojea pritichea bhavam-bhoinnimnô, hacho tumi ugddas dhôrat: ami sogllim aikunk suddsuddit zaunchim, punn ulovpant ani rag dakhovpant amkam uttavollai aschi nhoi.
20
Kiteak ami mon’xam ragan kitem-i kortanv tednam, Devachi mogachi manddavôll ami pallunk pavonanv.
21
Hea khatir sogllem mhelleponn ani sogllê tôrechem khotteponn sôddun diat. Devan tumchea kallzamnim Aplem utor vômplam, ani hem utor tumkam taronn diunk xokta: tôr hem Utor khaltikaien manun gheiat.
22
Devachem utor fokot aikun tumkanch fottoum nakat, punn Devachea utra pormannem cholat.
23
Jim konn Utor aikotat punn tem pallinant, tim aplench tondd eka arxeant polletolea mon’xam sarkim:
24
Tãnnim apnnankuch borê bhaxen pollelim, magir tim gelim ani apnnanchem sarkem koslem aslem tem visorlim.
25
Punn sot’techi sompurnn somurt niallta ani tika thir marta ani aikun visôr ghalinastana, aplea kornniamnim ti pallta to apunn korta tea vorvim bhagevont zatolo.
26
Konn apunn bhoktivont mon’xam mhonn chint’tat? Apli jib tim damun dhôrinant zalear, tanchi bhokti polki; tim apnnankuch fosoitat.
27
Onathanchi ani vidvanchi tanchea trasamnim ani gorzamnim kallji ghevop ani patkak lobhdol’lea sonvsara thaun mekllim ravop, hem ki Deva amchea Bapa mukhar xud’dh ani nixkollonk bhoktiponn.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.