Home

Izaias Chapter 42 - Povitr Pustok Revised - 2010

1
Ho asa sevôk Mhozo, Hanv samballun dhôrtam to, Hanvem venchun kaddlolo, sontôs Mhojea Kallzacho, raxttrank khori nit haddunk Mhojea Atmean bhòrlolo.
2
To bob marina, aroddna, aplo tallo rosteancher konnak aikunk to dina.
3
Futtloli bet môddina, minnminnti vat paloina. Khorê niticho nirnnoi visvaxiponnan dita.
4
Khori nit prithumecher sthapi-sôr halcho na, chepon chidd’ddon urcho na. Tachê somurtichi vatt dip zunve polleit asat.
5
Jea Devan mollob rochlam ani vistar’n dovorlam, Zannem prithum’ akarlea, vonospoti upzoilea, Zannem prithver ravtolea sorv mon’xank jivprann dila, ani ticher firtolea sorv pranniank jive keleat, To Sorvespor Dev sangta:
6
(ab)Hanv Sorvespor! Nitichi, tar’nnachi seva korunk tuka Hanvem apoila, tujea hatak ghôtt dhôrla, tuka Hanvench akarla.
7
Kudd’ddeanche dolle ugddunk, koidi gulamam zal’leank bondkhonnintli suttka diunk, kallkhê khonnint ravtoleank kallokhantlim bhair kaddunk, (6cd)Mhojê porjecho korar ani raxttrancho uzvadd tuka nemun dovorla.
8
Hanv Sorvespor - Hanv to Hanvuch! Dusrê khoinchêch rochnnek Hanv Mhoji mhoima diuncho na, murtink Mhozo man diuncheak kednanch kobul ascho na.
9
Adlim sogllim bhakitam ghoddon ailim, polleiat. Noveô ghòddnniô atam Hanv ugddapeô korun ditam: uzvadda ieunchê fuddench tumkam teô jahir kortam.
10
Sorvesporak novem git rochun gaiat! Prithvechea ximam thaun Tachi stuti gavum doriacher tarvar choltat tim sogllim ani doriant asa tem sogott, kinariô ani zunve ani thoim jietat tim somest.
11
Oronneantlo ani tachea xarantlo tallo choddot vochum-di, toxench Kedar ravta tea tombuntlo. Xela xarantlo sogllo lôk sontosan ul’lasum ani dongranchê tenkxê thaun arddun vakhannum.
12
Tim Sorvesporak mhoima dium ani kinariam-zunveamnim Tachi stuti gazoum.
13
Eka vira sarko Sorvespor zhuz korunk bhair sorla, zhuzaria bhaxen zollta Tachi hurba. To arddota, zhuzak apunn hak marta, Aplea dusmanam add Aplem boll dakhoita.
14
‘Purvim thaun Hanv ogoch ravlom, thôndd aslom, doddpun ravlom Ballonteracheô vennô sôstolê ostoriê bhaxen pinrgotalom, khorxetalom, suskar gheunk dhapetalom.
15
Atam porvotanchi ani dongranchi desvatt kortolom, tancho sogllo zhaddpalo sukoun uddoitolom; nodinchi kortolom suki zomin, tolliô-rebkhonddam sukoitolom.
16
Kudd’ddeank tim vollkhonant tea rostean Hanv choloun vhortolom, onvollkhi vattamnim tankam vhortolom. Tanchê mukhar kallôk asa thoim uzvadd ghaltolom ani khoddpi zomin bodlun sopatt zomin korun ditolom. Oxem kelea xivai Hanv ravchoch na.’
17
Kuddea devancher visvas dovortat tim pattim sortolim, ‘Tumi amche dèv’, oxem murtink mhonnttat tim lojen bhoron tondd pondak ghaltolim.
18
Arê bhereamnô, aikat! Arê kudd’ddeamnô, dolle ugddun polleiat!
19
Mhojea sevoka itlo konn kudd’ddo asa kai? Hanv pattoitam tea sondexkara itlo konn bhero asa kai? Mhojea bhokta sarko konn kudd’ddo asot kai? Sorvesporachea sevoka sarko konn bhero asot kai?
20
Tunvem zaiteô vostu dekhleat, punn tunvem tankam lokx diunk na; tuje kan ukte asat, punn tum mat-ui kanar ghenaim.
21
Aplea doiallaiechea nitivontponna khatir Sorvesporak sontôs bhògta, To Apli Somurt xrêxtt ani mhoimevont korunk veta.
22
Tori hi êk nagoil’li ani luttloli porza, sogllinch dholimnim bond poddlolim, bondkhonnimnim koidi zal’lim. Tankam nagoitat, punn tankam soddovpak konnuch na, tankam lutt’tat, punn ‘Portun diat!’ mhonnpak konn-eklo na.
23
Tumchê modlo konn tori aikotolo? fuddarak tori aikunk konn chit ditolo asa?
24
Konnem mhonn Jakobak nagovnneachê adhin kelo? konnem Israelak luttnnaranchea hatant sôddlo? Sorvesporacher ami patok kelem, Tacheô vattô dhôrunk amkam mon na zalem, Tachi Somurt ami pallunk na, dekhunuch khud Sorvesporan oxem kelem nhoi?
25
Tacher denvoilo Aplea krodhacho zollto uzo ani zhuzache tollmolle. Hea ujean taka veddho ghalo, tori to tem somzunk na, taka ulpailo, tori tannem chit diunk na.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.