Home

Izaias Chapter 1 - Povitr Pustok Revised - 2010

1
Uzzias, Jotham’, Ahaz ani Hezekiah, hea Judachea razanchê razvôtte-chea kallar, Judasa ani Jerusalea vixim Amozachea puta Izaiasak mell’lolem dorxon.
2
Aik, mollba; prithumê, kan di! Karonn Sorvespor uloita: ‘Hanvem bhurgeank pôslim, tankam lhan-vhodd kelim, punn tim Mhojer kolpolim.
3
Boil aplea dhoniak vollkhota, ani gaddvak aplea dhoniachê khavnnechi vollokh asa; punn Israelak kiteachich vollokh na, Mhoji porza kãich somzona.’
4
Kitlem mhonn patki raxttr hem, guneanvanchea bharan chêploli porza, noxttea mon’xanchi sonsôt, khottim zal’lim bhurgim! Sorvesporak tãnnim sôddun dilo, Israelachea Povitr Devachi tãnnim beporva keli, Taka patt korun tim koddsorlim.
5
Tumi portun-portun kolpotat mhonnttôch, ozun khoim mhonn tumkam mar ghaltolom? Mathem sogllem ghaiall zalam, kallzachem sogllem boll virun gelem;
6
pãiam tolla thaun toklê porian rokh-borem mhonnpachem kãich uronk na; fokot ghave, zokhmô ani jivim chovonam. Konnuch tim dhuinam, konnuch tim bandinam, tel lavun konn tanchi dukh hollu korina.
7
Tumcho dês osadd poddla, tumchea xarancho ujean bhosm zala, tumcheach dolleam mukhar porko lôk tumchi zomin girasta. Polleunk dista porkeamnim kel’lem ghorttann, sogllench nisontton!
8
Sionachi dhuv zali dakam-molleantlê khompttê sarki, tovxeam-molleantlê zhompddê sarki, veddho ghal’lea xara sarki.
9
Sorvsoktivont Sorvesporan amchê-modlea thoddea zannank rakhun dovrunk naslim zalear, ami Sodoma sarkim zaupachim, Gomorra bhaxen ami zaun vochpachim.
10
Sodomachea razkarbhariamnô, Sorvesporachem utor aikat; Gomorrachea lokamnô, amchea Devachea xastrak kan diat.
11
Sorvespor oxem mhonntta: ‘Tumchea hixôb-naslolea iodnank Mhojê mukhar koslem mol asa?Menddreanche hom’ ani paddkulleanchi chorob Mhaka naka puro zalim. Boilanchea, menddreanchea ani bokddeanchea rogtachi Mhaka vitt ieta.
12
Mhojem dorxon gheunk tumi ietat tedna, tumchea pãiamnim Mhojim angnnam mostunk konnem sanglam tumkam?
13
Tumcheô dhanneacheô nirorthi bhettovnniô anink Mhojê mukhar haddum nakat: tanchea dhumpacho Mhaka kanttallo ieta. Amasô, Son’var, zomatiutsovancho dobazo, ani borabôr khotteponn - hem Mhojean sosum nozo.
14
Tumchea amasancho ani utsovam-zatranchoHanv kallzant thaun kanttallo dhôrtam. Tancho bhar Mhojer poddla: to sosun Mhaka puro zalem.
15
‘Tumi tumche hat ubartat tedna Hanv Mhoje dolle dhamptam. Kitlim-i prarthnam tumi kelim mhonnun, Hanv tumkam kan diuncho na. Tumche hat rogtan bhòrleat.
16
‘Nhaun ieiat, nitoll zaiat. Mhojea dolleam mukhavelem tumchem khotteponn pois kaddat.
17
Anink vaitt korum nakat. Borem korunk xikat, neainit rakhunk vavrat, zulum’ sôstoleank dhir diat, onath bhurgeank rakhat, vidvank samballat.
18
‘Ieiat, uloun polleum-ia’: mhonntta Sorvespor. ‘Zori patkam tumchim lal-tambddim, tori borfa vori zatoleat tumi nitoll-dhovim; zori tim bhirondda sarkim kirmiji-tambddim, tori kapsa vori zatoleat tumi dhovim.
19
Hanv sangtam tem aikunchi tumkam khuxi asot zalear, hea desantleô boreô-boreô vostu tumi khaunk pavtoleat.
20
Punn fituren vaittuch korun ravxat, tôr torsad tumkam girastoli. Khud Sorvespor hem sangta.’
21
Ekdam visvaxi xar, polleiat koxem tem zalam êk xindôll bail! Sion-xar ekdam purnn nitichem aslem! Ekdam promannikponn thoim vostalem, punn atam thoim vostat khuni-ghatki mon’xam!
22
Tujem rupem kitt zalam, tuzo soro udkall zala.
23
Tujê odhikari fitur zaleat, choranche samil-bhagidar! Ek-eklo fokot lônch khaunk axeta, apnnak danam gheunchench ek-eklo chint’ta. Konnuch onath bhurgeak nit korun dina, vidveche hok’k konn rakhina.
24
Hea khatir oso uloita Dhoni, Sorvsoktivont Sorvespor, Israelacho Bollixtt Dev: ‘Puro tumchem! Mhojea dusmanank haroun Hanv somadhan zatolom; Mhojea xotruncho sudd ghetolom.
25
Tujer Hanv Mhozo hat ubarunk vetam, tuka agtteant ghalun sogllem kitt bhair kaddtolom, tujê bhitorlo sogllo mhêll kaddun uddoitolom.
26
Magam porim tuka nitidar nemun ditolom, purvilea kalla porim tuka montri ditolom. Tedna tuka mhonnttolim: Promannikponnachem Xar, Visvaxi Xar.’
27
Sionachem taronn neainitin zatolem, patok roddtoleank doiallaiechea nitivontponnan suttka melltoli.
28
Fiturancho ani patkiancho borabôruch ibadd zatolo, ani Sorvesporak sôddun vetat tanchem nisontton zatolem.
29
Tumchê bhov avddichea terebint rukhanchi tumkam loz distoli; ani jea bagancher tumchem dhean-mon aslem, tanchê pasot tumi lojen bhòrtoleat.
30
Karonn panam sukun gel’lea eka terebinta sarkim, udok naslolê bagê sarkim, tumi zatoleat.
31
Podvedar monis zatolo sukem lankudd, ani tachea hatanchem kam’ êk ujeachi kitt. Don-ui borabôruch zolltolim, ani uzo palounk konnuch ascho na.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.