Home

Hebrevank Chapter 1 - Povitr Pustok Revised - 2010

1
Zaitê pavtti ani veg-vegllê tôren magam provadiam vorvim Dev amchea purvozam kodde uloilo.
2
Punn hea Xevôttachea disamnim, hea amchea kallar, Aplea Puta vôrvim To amchê lagim uloilo. Taka Devan sogllea vostuncho Daiji kela, Tachêch vorvim soglli srixtti rochlea.
3
To Devachê mhoimecho porzôll ani Devacho sopurnn rupkar. Aplea bollixtt hukuman ak’kho sonvsar To samballta; ani, mon’xank patkantli xud’dhi zôddlea uprant, sorgar choddun thôr Devachea uzvea hatak bosla.
4
Jitlem devdutanchea nanvam poros xrextt nanv Devan Taka dilem, titlo To tanchê poros vorto.
5
Khorench Devan kednanch khoincheach dutak mhonnunk na: Tum Mhozo Put, aiz Hanvem Tuka zolm dila. Toxench khoincheach devduta sombondim Devan sangunk na Hanv Tacho Bapui atolom ani To zatolo Mhozo Put.
6
Punn Aplea Malgoddea Putak sonvsarant patthoitana, Tannem mhollem: Soglle devdut Taka saxttangim poddum.
7
Devdutam vixim Devan sanglem: Aplea dutank To varea sarke korta ani Aplea muniariank ujeachea agtteam sarke.
8
Punn Aplea Putak zalear, Dev oxem mhonntta: Tujem xinvason, Deva, iugam-iugamnim togtolem, Promanikponnan Tum razvôtt choloitoloi.
9
Promannikponnacho Tum môg kortai ani khotteponnak vittetai. Dekhun sogllea Tujea vangddiam modlo voir kaddun, Devan, Tujea Devan, anondan bhôrtolea telan Tuka makhlo.
10
Tea bhair Povitr Pustokar oxem boroil’lem asa: Tunvem, Dhonia, prithum’ rochlear kallanche kall zaun gele, sôrg-ui Tujea hatanchem kam;
11
tim sorun vetolim, Tum ekloch urtoloi; pornnea vostram vôri tim kotteun vetolim,
12
ani zhoron gel’lea angavleam vôri Tum tim kaddun uddoitoloi, ani novim vostram ghaltoloi. Punn Tum asai tosoch astoloi, Tujea vorsank ont-par na!
13
Khoincheach devdutak Devan kednanch mhonnunk na: Mhojea uzveak bos. Tujea dusmanank Hanv Tujea pãiam tolla ghaltam.
14
Devdut konn tôr? Te soglle atme; te Devachi chakri kortat, ani taronn gheunchim asat tankam adar diunk Dev tankam patthoita.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.