Home

Galasiekarank Chapter 3 - Povitr Pustok Revised - 2010

1
Ginean-naslolea Galasiekaramnô, tumkam konnem montr bi kelam? Khursar marlolo Krist Jezu tumchea dolleam mukhar nivôll chitarlolo tôr asa!
2
Ek mat tumchê koddchem hanv zanno zaunk sôdtam: tumi ghetla to Povitr Atmo Somurt formaita tim kamam keleant dekhun ghetla, vô tumkam porgôttlam tem Xubhvortoman tumi bhavarthan manun ghetlam dekhun?
3
Devacho Atmo gheun tumi novem jivit suru kel’lem a, tench tumi atam kuddichea kamamnim sompounk sôdtat? Itli tumchi môt uddli?
4
Itlea vortea denneancho tumkam mell’la to onnbhôv sogllo funkôtt gelo kai? To sogllo funkôtt gela zaum nozo.
5
Dev tumkam subham’ponnan Aplo Atmo dita ani tumchê modem vismitam korta: tumi Somurtichim kamam kortat dekhun To oxem korta zait, vô tumkam porgôttlam tem Xubhvortoman tumi bhavarthan manun ghetlam dekhun?
6
Povitr Pustokar oxem boroilolem asa: Abrahaman Devacher bhavarth dovorlo, ani hea tachea bhavarthak lagun taka Devan Apnnak manovlolo kelo.
7
Mhonnttôch bhavarth dhôrla tinch mon’xam Abrahamachi sonsôt mhonn tumi somzunchem.
8
Bhavartha udexim videxiank Dev Apnnak manovlolim kortolo mhonn adinch polleun, Povitr Pustokar Abrahamak ho xubh sondêx oso fuddench porgôttlo: Tujê udexim Dev sogllea raxttrank axirvad ditolo.
9
Mhonnttôch Abraham’ bhavarthacho monis, ani jim konn bhavarth dhôrtat, tim tachê borabôr Devacho axirvad ghetat.
10
Somurtin formailolea kamancher visvas tthevtat titlim-i xirap poddlolim, kiteak Povitr Pustokar oxem boroilolem asa: Jim konn Somurtichea pustokar pallche mhonn boroilole asat te soglle kaide samballinant, tancher xirap poddum.
11
Konnuch Somurti udexim Devak manovlolim zainant mhonn dubavuch na, kiteak Povitr Pustokar oxem boroil’lem asa: Bhavartha udexim Dev Apnnak manovlolim korta tim Jivit zôddtolim.
12
Ani Somurt bhavartha thaun upzona, kiteak, portench zalear, Povitr Pustokar oxem boroilolem asa: Heô soglleô formavnniô palltat tinch tanchê udexim Jivit zôddtolim.
13
Apunnuch amchê khatir xirap poddlolo zaun, Kristan amkam Somurtichea xirapantlim soddoun ghetlim; tôr Povitr Pustokar oxem boroil’lem asa: Lankddar umkollta to monis xirap-poddlolo.
14
Jezu Krista udexim Abrahamak dil’lo axirvad videxiank pavchê khatir ani bhasailolo Atmo bhavartha vorvim amkam mellchê pasot, Devan oxem kelem.
15
Bhavam-bhoinnimnô, chaltea jivitachi vopar ghalun sangtam: mon’xam modem kel’lo korar sôi-xik’ko marun monzur kelo zalear, konnachean to rôd’d korunk zaina, nhoi mhonn tantlem kãich kaddunk vô taka kitench choddounk zaina.
16
Abrahamak ani tachea putak Devan bhasavnniô keleô. Povitr Pustok sobar zannam zal’lê porim putam-dhuvank mhonnona, punn ekleachich khobor korta dekhun oxem mhonntta: ani tujea putak; ho put mhollear Krist.
17
Hanv sangunk sôdtam tem hem: Devan monzur kel’lo korar charxim-tis vorsam uprant ailolê Somurtichean rôd’d korunk zaina ani tichean bhasavnni nirfôll korum nozo.
18
Kiteak, zôr daiz Somurtik lagun pavta, tôr tem bhasavnnek lagun nhoi-xem zalem; punn Devan Aplê bhasavnnek lagun tem dennem Abrahamak favo kelem.
19
Toxem tôr Somurt anink kiteak? Jê sonstik bhasavnni kel’li, ti ie porian, kaide portun-portun moddon ieunchê khatir, Devan uprant Somurt-ui sthapun dili ani ti lokak pavôunchê khatir devdutam vorvim eka modêstachea hatant ghali.
20
Fokot dogam vô choddam modem koslo-i vevhar sompouncho asa zalear, modêstachi goroz asa; punn [Abrahamak bhasavnni kortana] Dev ekloch aslo.
21
Mhonnttôch Devan kel’lê bhasavnnecher Somurt add veta zait? Na ki na. Kiteak Jivit diunk podvi asloli Somurt Devan dil’li zalear, mon’xam Somurt pallun khoreponnim Devak manovlolim zatolim aslim.
22
Jezu Kristacher dovorlolea bhavartha thaun bhasailolem dennem bhavarth dhôrtoleank mellchê khatir, sogllo sonvsar patkachê podvê khal asa, oxem Povitr Pustok sangta.
23
Punn bhavarthacho kall ieunchê adim, Jezucher bhavarth dovorchi goroz mhonn Devan ugddapem kori-sôr, amkam soglleank Somurtin koidi korun dovorlolim.
24
Mhonnttôch, Krist ie-sôr ani amchea bhavarthak lagun amkam Devan Apnnak manovlolim korchê khatir, amkam ballam porim vagoun ti amchim panvlam choloitali.
25
Punn atam bhavarthacho kall pavlo, mhonnttôch ball-xikxokan amchim panvlam cholounchi koslich goroz na.
26
Kiteak Jezu Kristacher bhavarth dovrun tumi sogllim Devachim bhurgim.
27
Kiteak Povitr-Snanachea somoiar Kristan tumkam buddoun kaddleant ani oxem Krist ani tumi êk zaleant.
28
Judêv anink na, Grik na; gulam’ na, svotontr monis na; dadlo na, bail na; tôr Jezu Krista sovem tumi sogllim êk!
29
Ani zôr tumi Kristachim, tôr Abrahamachi sonsôt tumi, ani bhasavnnê pormannem daiji tumi.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.