Home

Daniel Chapter 1 - Povitr Pustok Revised - 2010

1
udachea raza Jehoiakimachê razvôttkechea tisrea vorsa, Nebu-kadnezzaran, Babiloniechea razan, Jerusaleak akromonn kelem ani taka veddho ghalo.
2
Sorvesporan Juda-chea raza Jehoiakimak tachea hatant poddo-so kelo; toxinch Devachea Mondirantlim thoddim aidonam-i bi. Tannem tim aidonam Shinar desant vhelim ani aplea devanchea bhan-ddarant dovorlim.
3
Israeli unch kulliechea thoddea cheddeank vinchun kaddunk aplea mukhel izddea Ashpenazak razan hukum’ ghalo;
4
te kuddin dhodd, ru-pest, zannvaiechea sogllea vixoiamnim gholl’lole, soglli khobor aslole, sotfott vollkhopi ani razvaddeachê sevek favo sarke asunk zai aslole. Ashpenazan tankam kaldeikaranchi bhas ulounk ani borounk xikounk zai aslem.
5
Tanchea dispottea udorposonnak aplea razki meza voilem jevonn ani soro diunchim mhonn razan tharailem. Tin vorsam tãnnim xikxonn gheunchem aslem; tea uprant tãnnim razachê sevek bhitôr sorchem aslem.
6
Tanchê modem Judeikar Daniel, Hanania, Mishael ani Azaria asle.
7
Mukhêl izddean tankam dusrim nanvam dilim. Danielak Belte-shazar nanv dilem, Hananiak Shadrak, Mishaelak Meshak, ani Azariak Abed-nego nanv dovorlem.
8
Razachem jevonn khaun ani soro pieun apunn bhoxttona zaunk Danielan thir nixchoi kel’lo, dekhun apnnak hea vignantlo vattai mhonn tannem mukhêl izddea kodde maglem.
9
Ani Devachea bholeponnan mukhêl izddean Danielak moipasan vagoilo ani tacheô bhavna ani gorzô somzun ghetleô.
10
Punn tannem Danielak xiddkailo: ‘Hanv mhojea dho-nia razak bhietam: tannem tumkam jevonn ani soro tharaileant, ani tumchê piraiechea dusrea bhurgeam poros tumchim tonddam taka bhaglolim disot, tôr, tumkam lagun raza fuddean mhozo jiv sonkoxttant poddtolo.’
11
Hem ai-kun, jea rakhonndarachea hatant mukhêl izddean Danielak, Hananiak, Mishaelak ani Azariak kel’le, taka Danielan mhollem:
12
‘Dha dis tujea sevokanchi tum porikxa korun ghe ani hea dha disank amkam fokot torkari khaunk ani udok pieunk di.
13
Uprant, amchim ton-ddam polle, ani toxench razachea meza voilem jevtolea bhurgeanchim tonddam polle; tanchea ani amchea tonddam modem sôr kôr; magir tuka kitem dista tem polle ani tea pormannem amchê sorim kôr.’
14
Tãnnim sanglolem tem tannem manun ghetlem ani dha dis tanchi porikxa keli.
15
Dha dis bhòrlea uprant, te razachea meza voilem jevlolea bhur-geam poros rupan ani jivan odik bore disle;
16
mhonnttôch rakhonndaran tanchem nemlolem jevonn ani soro kaddun, tankam torkari dili.
17
Sogllê torechê sahitient ani vidient hea chovgam tornnatteank Devan zannvai hikmôt dili; Danielak tea bhair koslea-i jin’sachea dorxonancho ani sopnancho ôrth sangun diunchem dennem aslem.
18
Razan xikxonn diunk nemlolo kall bhòrtoch, mukhêl izddean tankam Nebu-kadnezzara fuddean haddun dakhoile.
19
Razak tanchê sarko sogllea tornnatteam modem anink konnuch mellunk na.
20
Mhonnttôch te razvaddeache vangddi zale ani koslê-i zannvaiê ani budhichê barkaiê vixim razan tankam prosn kelo zalear, tachea ak’khea rajeantlea jaduka-ram ani noxib-parkiam poros te dha pavtti odik huxar asle. Sirus razachea poilea vorsa porian Daniel thoim ravlo.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.