Home

3Juanv Chapter 1 - Povitr Pustok Revised - 2010

1
Hanv, Vhoddil, Gaiusak, mhojea bhov mogachea ani khorea ixttak, noman kortam.
2
Pritichea ixtta, sogllem tujem borem cholchem mhonn magtam, ani zoxem atmea vatten tum boro asai, toxich tuji kuddichi-i bholaiki bori aschi.
3
Sotak tum visvaxi ravtai ani sota pormannem tum choltai mhonn thõichea kãi bhavam-bhoinnimnim ieun govai dilea; hem aikun mhaka khub anond zalo.
4
Mhojim bhurgim sota pormannem choltat mhonn aikun, hanv itlo sontoxi zatam, ki mhaka iedo vhôdd sontôs ditoli dusri koslich khobor na.
5
Pritichea ixtta, he bhav bhailea ganvche zaun-ui, tum tanchê pasot ghas ghetai mhollear, hem tujem visvaxiponnachem kam’.
6
Ak’khê Povitr-Sobhek te tujea pritimogachi govai ditat. Devak mandta tê bhaxen tankam vattek goroz tem dixi zalear, borem kortoloi.
7
Te vattek lagle fokot Nanva khatir, ani amchea bhavarthachim nhoi tea mon’xam koddsun te kãich ghenant.
8
Oslea mon’xank borê bhaxen gheunk ani sota pasot te vavr kortat tantum tankam sohokar diunk amcho kaido.
9
Tumchê Povitr-Sobhek hanvem ek potr boroilam; punn thõi podvi choloun murgott’ta to Diotrefes amcho odhikar manun gheunk toiar na.
10
Dekhun, hanv ien zalear, to koso cholta tacho soglleank ugddas kortolom, ani amcheô to koxeô chaddiô korta ani amcher koslim boglanttam ghalta, tem-i bhair kaddtolom. Itlench nhoi; punn jim konn amchea bhavam-bhoinnink gheunk toiar asat, tankam to addaita ani Povitr-Sobhentlim bhair ghalta!
11
Pritichea ixtta, osli vaitt dêkh tum dhôrum naka, punn borem tem kôr; jim konn borem kortat, tim Devachim bhurgim; punn jim konn vaitt kortat, tãnnim Devak polleunkuch na.
12
Demetriusa vixim sogllim borem sangun govai ditat; ani khud Sot govai dita. Ami-i tachê vixim govai ditanv, ani amchi govaiki khori mhonn tum zannoi.
13
Anink-ui zaiteô vostu tuka sangpacheô asleô, punn xaien ani likhnnen sangunk mhaka khuxi na.
14
Khorench mhollear, rokddoch hanv tuka polleunk pavtolom mhonn ravtam, ani tednam tondda-tonddim ami uloitoleanv.
15
Xanti tuka! Tuje ixtt ani ixttimnim tuka noman kortat; amchea bhavam-bhoinnink, ek-ekleachem nanv gheun, vicharlam mhonn sang.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.