Home

2Timotak Chapter 4 - Povitr Pustok Revised - 2010

1
Deva mukhar ani jiveam ani mel’leancho Nitidar zauncho asa tea Jezu Krista mukhar, To dobajean ietolo ani Aplem raj sompadnnek pavoitolo mhonn ugddas korun, hanv tuka ho hukum’ ghaltam:
2
Tacho sondêx porgôtt kôr; lokak to manom vô na manom, to tum tanchea kanar ghalit rav; khottea xikovnnancher vad korun sotacho uzvadd ghal; khoddi kaddun dakhoi; tanchea gineanak ulo mar, punn sogllê sõsnnikaien ani xikovnn diunchea monan toxem kôr.
3
Mon’xam rôkh-bori xikovnn manun gheunchim nant oslo kall ieuncho asa. Tanche kan khorzon, novlam aikunchê axen apnnankuch man’tat tosle ekar-êk guru tim vinchun kaddtolim.
4
Sotak kan bhere korun, tim gopam-talam aikunk bhonvtolim.
5
Punn tum zalear zagrut rav, ietat title-i koxtt-dogd dhir gheun sõs, Xubhvôrtoman porgôttunk bhar ghe, tujê seveche kaide zotnaien pall.
6
Mhojê vatten, mhojea jivachem bolidan zaunchem zalam, sonvsar sôddun vecho mhozo vêll pavla.
7
Xevôtt porian hanv borem zhuz zhuzlam, dhanvchi asli ti vatt hanvem dhanvun kaddlea, bhavarthant hanv thir ravlam.
8
Ekuch mhaka atam urlam: tem mhollear Devan mhaka dovorlolo, Taka manovlolea jivitacho, zoitacho mukutt. Tea Disa Somi Jezu, Nitivont Mon’subidar, to mukutt mhaka ditolo; mhakach nhoi, punn Tachea dobajik ienneak otrektat titleank-ui.
9
Zata titlê vegim mhojê-xim ie.
10
Kiteak hea sonvsarachê axek lagun Demas mhaka sôddun Tesalonikek gelo; Kresens Galasiek gela ani Tit Dalmasiek.
11
Ekloch Luk mhojê sorxim asa. Markuk tujê borabôr gheun ie, kiteak to mhojea vavrant bhov adaracho.
12
Tikikusak hanvem Efezak dhaddla.
13
Troasant Karpusa kodde mhojem matheachem avoronn dovrun ailam tem ietastana hadd; toxench mhoje kovlle ani bhov-korun mhojim borovpachim barik chamachim potram.
14
Aleksandr kansaran mhaka khub vaitt kelam; tachea kortubank favo ti khast Sorvespor taka laitolo.
15
Tachê sorim tum-i chotur rav, kiteak amchea sondexacher to samko virudh zala.
16
Poilê pavtti mon’subidara mukhar mhaka ubo kelo tednam, mhojê vatten konnuch ulounk na; soglleamnim mhaka sanddlo: Dev tankam hachi khast laina zaum.
17
Punn Somi mhojê vatten ubo ravlo, ani Tannem mhaka boll dilem; oxem mhojê udexim Xubhvortomanachi purnn porgôttnni zali ani sogllea videxiamnim ti aikoli. Mhonnttôch Somian mhaka xinvachea tonddantlo nivarlo.
18
Sogllea noxttantlo-i To mhaka vattaitolo ani Aplea sorginchea Rajeant solamoti pavoun mhaka taronn ditolo. Taka mhoima sasnnachea sasnnak! Amen.
19
Priskek, Akuilek ani Onesiforachea ghorcheank hanvem vicharlam mhonn sang.
20
Erast Korintak ravla. Trofim’ boro na zalo ani Miletant taka pattim dovrun hanv ailom.
21
Hinvallea adim taktin hanga ieunk proitn kôr. Eubul, Pudens, Lin ani Klaudia, hancho ani sogllea bhavam-bhoinnincho tumkam nomoskar.
22
Somi Jezu Krist tujê sovem asum. Tachi doiallai tumi sodam bhôgum.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.