Home

2Timotak Chapter 1 - Povitr Pustok Revised - 2010

1
Hanv Paulu Devachê khuxê por mannem Jezu Kristacho Dhormdut. Jezu Krista sovem asa ani amkam bhasailam tem Jivit porgôttunk Devan mhaka Dhormdut nemla.
2
Timotak, mhojea opurbaiechea putak, hanv hem potr boroitam. Dev amcho Bap ani Jezu Krist, amcho Somi, Apli doiallai, kaklut ani xanti tuka bhôgunk dium.
3
Mhojea magnneamnim thambonastana rat-dis tuzo ugddas kortam tednam, hanv Devak dhin’vastam; mhojea purvozamnim kelam toxench, hanv-ui nitoll ontoskornnan Tachi seva-bhokti kortam.
4
Tunvem mhozo nirôp ghetlai tednam koso tum roddlai, hacho mhaka boro ugddas asa, ani tuka novean polleun dhadoxi zaunk hanv axetam.
5
Ddhông-naslolo tuzo bhavarth mhojea monant asa. Tujê adim Lois tujê ajek ani Eunike tujê avôik aslo toch bhavarth tuka-i asa mhonn mhaka kosloch dubav na.
6
Dekhunuch, hanvem tujer hat dovorle tednam zo vorgunn Devan tuka dila, tacho uzo odik peroi mhonn tuka ugddas kortam.
7
Kiteak Devan amkam dila to Atmo amkam bhezudd korina, punn Devacho Atmo amkam ghottaien bhôrta, bhavam-bhoinnincho môg amchea kallzamnim vaddoita, ani amcheô vaitt vondovnniô domavunk xokti dita.
8
Mhonnttôch amchea Somiacho govai koso ubo ravunk lojenaka, vô hanv Tachê khatir bondkhonnint poddlam mhonn mhojê-i pasot lojenaka. Portench zalear, Xubhvortomana khatir mhojea vangdda koxtt ani dhumalle sõsun ghe, ani te sõsunk Dev tuka boll ditolo mhonn patieun rav.
9
Kiteak Tannem amchi soddvônn kelea ani amkam Apnnak bhettoil’li porza zaunk apoileant; amchea kornniam pasot nhoi, punn Apli ievzônn xarti pavounk ani Aplo doiall môg amkam dakhounchê pasot, Tannem oxem kelem. Sogllea kallam-iugam adim, Jezu Krista sovem doiallaien Devan amcho môg kelo;
10
punn atam amcho Soddvonnar Jezu Krist sonvsarar dixtti poddlolean Devan to amkam fakoun dakhoilo. Jezun mornnacho bhosm kelo mhonn ani omor Jivit bhôgunk Tannem amkam favo kelam mhonn Xubhvortomana vorvim Devan amkam porgôtt kelem.
11
Hem Xubhvortoman porgôttunk ani xikounk Devan mhaka Dhormdut nemla.
12
Teach pasot hanv he koxtt bhôgtam; tôri hanvem kalliz sôddunk na, kiteak Konnacher hanvem visvas tthevla tem hanv borem zannom, ani mhaka rakhunk dil’lo tthevô to Dis ie porian samballunk Taka tank asa mhonn mhaka dubavuch na.
13
Jezu Kristacher amcho bhavarth asa ani Tachea ekcharant ami ekamekacho môg kortanv mhonn monant dhorun tuka sangtam: mhojê koddsun tum xiklai tench dolleam mukhar dovrun tum-i dusreank xikoi.
14
Tujê adhin kel’lo tthevo amchê sovem jietolea Povitr Atmeachea bollan rakhun dovor.
15
Aziechea prantantle sogllech mhaka sôddun geleat mhonn tum zannoi; tanchê modem Fijel ani Hermojen.
16
Amcho Somi Onesiforachea kuttumbak kaklut dakhoum mhonn magtam, kiteak tannem mhaka zaitê pavtti dhir dila ani mhojea sankllinchi taka loz disunk na.
17
Itlench nhoi, punn to Romak pavlo toso, mhaka mellunk tannem zaito bhar ghetlo ani xekim mhaka sôdun kaddlo.
18
Tea Disa Somiachi doia bhôgunk toch Somi taka favo korum. Efezant tannem mhaka kitlo adar dilo to tum boro zannoi.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.