Home

2Thesalonikarank Chapter 1 - Povitr Pustok Revised - 2010

1
Paulu, Silvan ani Timot Deva amchea Bapachea ani Somia Jezu Kristachea ekvottant aslolê Tesalonikaranchê Povitr-Sobhek noman kortat.
2
Deva amchea Bapachi ani Jezu Kristachi, amchea Somiachi, doiallai ani xanti tumchê sovem asum.
3
Bhavam-bhoinnimnô, tumchê khatir sodam ami Devacho upkar attounk zai. Ani oxem ami korunk favo kiteak tumcho bhavarth ekdom’ vaddot gela, ani ekameka thaim tumcho pritimôg choddot veta.
4
Tumi sõstat tea dhumalleam ani koxttam-dogdam modem tumi thir ravleant ani tumcho bhavarth halonk na; hea pasot, Devachea Povitr-Sobhamnim uloun, ami tumchi vhoddvik sangtanv.
5
Hea sogttantlean Devacho nirnnoi nitivontponnacho mhonn dokhol zatolem: kiteak mhollear Devachea Rajea pasot tumi atam koxtt sõstat khorem, tôr heach koxttam vorvim tem Raj bhôgunk Dev tumkam purtim kortolo.
6
Ani jim konn tumkam atam dogdaitat, tankam Dev Aplê niti pormannem dogdaitolo,
7
ani Somi Jezu Aplea bollixtt devdutam borabor sorgar thaun ieta to dixtti poddtolo tednam, tumkam, atam koxtt-dogd bhôgtoleank, toxench amkam-i Dev ilaz ditolo.
8
Kiteak Somi Jezu ujeachea agttea modem denvun ietolo ani Devak vollkhun ghenant ani amchea Somia Jezuchem Xubhvortoman manun gheunk kobul nant tankam To xikxa laitolo
9
Sasnnachea ghorttannachê khastik tim sampoddtolim, Somiachem mukhamoll ani Tachê podvechi mhoima bhôgunk tankam mellchem na.
10
Tea Disa Aplea bhoktam modem mhoima bhôgunk To ietolo ani Taka polleun Tacher bhavarth dovorla tanche dolle thottaktole; hanchê modem tumi-i astoleat, kiteak ami dil’li govaiki tumi manun ghetli.
11
Hench monant dhôrun ami sodanch tumchê pasot magtanv: tumchea apovnneak sobta toslem tumchem jivit zaum mhonn amchea Deva lagim ami magtanv. Tumche soglle bore otrek Aplê podven To bhorten bhagaum ani tumchea bhavartha pormannem jieunk tumi kortat te proitn To purnntaien sufoll korum.
12
Hê bhaxen, amchea Devachem ani Somia Jezu Kristachem hem funkeachem dennem tumkam favo zatolem: mhonngê, amchea Somia Jezu Kristachea nanvak tumchê sovem mhoima melltoli, ani toxench tumkam-i Tachê sovem.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.