Home

Samuelachem Dusrem Pustok Chapter 22 - Povitr Pustok Revised - 2010

1
Jedna Davidak Saul ani tachea dusrea dusmanantlea hatantlo vattailo, tedna tannem Sorvesporak hem git gailem. Tannem mhollem:
2
Sorvespor mhojem khoddop, Mhozo kil’lo ani soddvonnar.
3
Mhozo Sorvespor mhojem khoddop To mhozo ddhall, To mhozo bolixtt adari Mhozo kil’lo, mhozo asro Mhozo Soddvonnar, Tum mhaka hinvsentlo rakhta.
4
Hanv Sorvesporak ulo martam, Mhojea dusmanachea hatantlo To mhaka nivarta.
5
Mornnachim lharam sorvbhonvtim Mhojer upraslim Nisonttonachea lottan Mhojer kampero haddlo.
6
Norkachea sanklleamnim mhaka bandlo Mornnachea bandpasamnim mhaka dhôrlo
7
Akantachea vellar hanvem Sorvesporak ulo marlo Aplea mondirant sun Tannem mhozo tallo aikolo Mhojem prarthon Tachea kanar poddlem.
8
Tedna prithum’ hal’li ani thorthorli, Buneadi soit dongor kolkol’le
9
Tachea nakachea puddantlean dhunvor bhair sorlo Ani tachea tonddantlean girastolo uzo, Tachea dogan kollxeank pettlo uzo
10
Mollob bagaun, To denvun ailo Tachea paiam tolla Kallem-kitt kup
11
To kerubincher bosun, uddlo. To ubun ailo.
12
Tannem apnnakuch kallokan pangurlo Aplo tombu kelo
13
Tachê mukhar loklokit porzôll
14
Mollba thaun Sorvespor ghodd-ghoddlo
15
Aple bann sôddun tankam duspottaile Viz dhaddun, tancho nas kelo.
16
Sorvesporachê dhomkavnnecho avaz ghonnghonnlo Tachea nakachea puddantlean Ragacho dhunvor suttlo Doriachi bhatti dixtti poddli Prithumechi buniad ukti zali.
17
Unch thaun voddôv ghalun, Tannem mhojea hatak dhôrlo, Anvorachea lottantlo mhaka voir kaddlo.
18
Mhojea bollixtt xotruchea chopkeantlo Tannem mhaka soddoilo.
19
Mhojea sonkoxttachea disa, Punn Sorvespor mhozo dhir-adar zalo.
20
Tannem mhaka sôddoilo Ani mekllea mollar haddlo. Mhozo mog korta mhonn Tannem mhaka nivarlo.
21
Sorvesporan mhojea promannikponnachem Mhoje hat nitoll mhonnun Tannem mhojer axirvad ghalo.
22
Kiteak hanv Sorvesporachê vatter chol’lam Vaitt korun, Tachê sorxilo koddsorunk na.
23
Tache nivadde soglle mhojê mukhar asat. Tachea hukumachi hanvem beporva keli na.
24
Tachê mukhar hanv promannikponnan chol’lam Vaitta sorlom hanv pois ravlam.
25
Promannikponnan hanv chol’lam dekhun Ani mhojeô kornneô Tachea dolleam mukhar nitôll dekhun Sorvespor mhaka inam’ dita
26
Visvaxiponnan cholta tanchê thaim, tumi-i visvaxi
27
Nirmoll mon’xam thaim, Tum-i nirmoll Naddbudhi kortoleam thaim, Tum odik budhvont
28
Tum khaltiank samballtai, Punn podvedarank khala apttitai.
29
Sorvespora, Tum mhoji divtti Mhojea Deva, mhojea kallokhant Tum uzvadd ditai.
30
Tujea sangata, hanv khoinchei foujecher zoit vhortolom Khoincheai kottachim durgam hanv choddtolom.
31
Sorvesporachi vat nitt-soroll Apnnacher visvas thevtoleank, To ddhal.
32
Sorvespora bhair anink Dev asa?
33
Sorvespor mhojem boll ani ghottai
34
Merva porim mhoje pãi suddsuddit korta, Porvotancher To mhaka thir ubo korta
35
Mhoje hat tannem zhuzak toiar kele Kannxeache dhonu bhagaunk, Mhoje bavle ghottaile.
36
Tujê rakhnnecho ddhall, Tujea boreponnan mhaka vaddoilai
37
Mhoje pãi nisrun poddona zaunk, Mhojea panvlank Tunvem rund marog korun dileai,
38
Mhojea dusmanachê pattik lagun, Hanvem tancho nas kelo. Ani tancho nas kelea bogor, Hanv kodinch portunk na.
39
Hanvem tancho nas kelo Ani tanchean uttunk nozo toso, Hanvem tankam mar dilo. Te mhojea paiam tolla poddle.
40
Bollacho komorbond bandunk Tunvem mhaka zhuzak toiar keloi. Ani mhojea virodhiank, mhoje khal damun dhôrle.
41
Mhojea dusmanank Tunvem dhanvddaile
42
Tãnnim mozôt sôdli Punn tankam vattaitolo konn na zalo. Sorvesporak ulo marlo punn tannem zap dili na.
43
Tedna prithumevelê dhul’li sarki, Hanvem tanchi pudd keli. Rosteavelea chikla bhaxen, Tankam paiam tolla mostile
44
Mhojê porjechea zhogddeantlo Ani raxttram voir mhaka odhikar diloi Hanv vollkhonaslolom ti porza, Mhoji chakri korunk pavli.
45
Vilaiti raxttram mhozo hukum’ mandun ghetat
46
Videxi raxttram ang kaddtat Ani aplea kil’leantlim kampun bhair sortat.
47
Sorvespor jivo asa, To mhojem khoddop, Tachem Nanv vhodd zaum. Dev mhozo Soddvonnar Taka vakhann’nni favo zaum
48
Sorvespor mhojea dusmanancho sudd gheta
49
Mhojea dusmanachea hatantlo tum mhaka vattaitai Mhojea angar ietoleanchea mathear mhaka bosoitai, Zobordosti kortoleanchea chopkeantlo mhaka nivartai.
50
Hea pasot Sorvespora, raxttram modem Tuka nanvaddtolom Tujea Nanvachea manak, gitam gaitolom.
51
To aplea razak vhodd zoit dita Davidak ani tachê sonstik Sodam-sodankal.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.