Home

Samuelachem Dusrem Pustok Chapter 17 - Povitr Pustok Revised - 2010

1
Hea uprant rokddench, Ahithofelan Absalanvak sanglem, ‘Foujentlea bara hozar soinikank mhaka vinchun kaddum di. Aizuch rati hanv Davidachê fattik lagtolom.
2
To thoklolo ani niradari astananch hanv tacher akromon kortolom ani tacher bhirant haddtolom. Tache sangati pollapôll kaddttole. Hanv fokot razacho jiv kaddtolom.
3
Ani hanv sogllea lokak tujê-xim porot haddtolom. Her sogllo lok xantin astolo.’
4
Absalanvak ani Israelachea zannteank hem sangnnem manlem.
5
Absalanvan mhollem, ‘Atam Arkit kullantlea Hushaiak-ui apoiat, ani to kitem mhonntta tem-i ami aikum-ia.’
6
Hushai Absalanva-xim ailo tedna, Absalanvan taka mhollem, ‘Ahithofel amchê kodde hê bhaxen uloila. Tachê sangnnê pormannem ami korchem? Na zalear, ami kitem korchem tem tum sang.’
7
Hushaian zobab dilo, ‘Ahitho-felan hê somoim dil’li budh sarkhi na.
8
Tuzo bapui David ani tache sangati khoddegant zhuzari mhonn tum zannoi. Ani, zoxem eka vansvelachea porak konnem-i chorun vhelem zalear, tem vansvel konnachean addaunk zaina titlem krur zata, toslench krurponn tanchea angamnim asa. Dusrê vatten tuzo bapui êk onubhov aslolo zhuzari. Ani to ratchea vellar porian aplea zhuzareank visôv diupi nhoi.
9
Atam porian to khoincheai dhôlint vô her svatecher liplolo astolo. Akromonnachê survekuch amchê modle harovle zalear, aikotolo oxem mhonnttolo, ‘Absalan-vachea pokxantlea mon’xank marun uddoile.’
10
10 Xinvachea kallza sarko bollvont monis porian sarko koddun vetolo. Tuzo bapui êk bollvont monis, toxench tachê borabor aslole monis-ui kalljidar mhonn sogllo Israel dês zanna.
11
Mhonnttôch mhoji budh hi: Dan tem Beersheba porian vellechê renvê porim, ak'khê Israel porjek tunvem ektthaunchi ani tum porxim tanchê borabor zhuzak vecho.
12
To khoinsor-ui asum, taka sôdun kaddum-ia, zomnir dhôv poddta toso, ami tancher poddtoleanv. Tedna to, nhoi mhonn dusro khoinchoch soinik jivo urchona.
13
Zôr khoincheai nogrant tannem bhôrti kelear, tedna Israelachi porza, dhoramnim bandhun hem nogôr nodint oddtolim. Ani tacho êk porian fatôr urchona.’
14
Absalanvan ani Israelachea mon’xamnim mhollem, ‘Hushaiachi budh Ahithofelachê budhi poros odik bori.’ Absalanvachem nison-tton zaina zauncheak, Sorvesporan Ahithofelachi budh nirfôll keli.
15
Tedna Hushaian Sadok ani Abiatar-hea iadnikank sanglem, ‘Absalanvak ani Israelachea zantteank Ahithofelan oxi-oxi budh dili ani hanvem hi budh dili.’
16
Atam suddsuddaien vochat ani Davidak oxem sangat, Aichi rat oronneachea uktea mollar sarinakat punn thoinsorlo suddsuddaien bhair sorun voch, na zalear raza ani tachê borabor aslolo lok girasun vetolo. ’
17
Jonathan ani Ahimes En-rogel ravle. Êk sevika tanchê-xim vetali ani tankam soglli khobor ditali. Te Davida-xim vochun, taka kollit kortale. Konnench polleunk na toxe, te Jerusaleant provês kortale.
18
Toripunn eka chakran tankam pollele ani Absalanvak kollit kelem. Oxem astam-i tãnnim dogamnim-i pollapôll kaddli ani Bahurimant ravpi eka mon’xachea ghora-xim pavle. Tachea angnnant êk bãi asli. Te tantum bhitôr denvle.
19
Tea mon’xachê bailen ek chador ghetlem. Tem tannem bãichea tonddar patllailem. Ani tacher gonv xinvraile. Ani hachi konnak khobor nasli.
20
Absalanvache sevok, tê ostorechea ghora-xim aile ani tannem vicharlem, ‘Ahimas ani Jonathan khoim asat?’ Ani tê ostoren tankam zobab dilo, ‘Te nhõichê vattên geleat.’ Jedna tãnnim tankam sôdle ani te tankam mell’lle nant, tedna te porot Jerusaleant aile.
21
Te vetôch Ahimas ani Jonathan bãintle bhair sorle ani Davidak kollounk thoinche cholun gele. Tãnnim Davidak mhollem, ‘Utthat ani suddsuddaien nôd par korat kiteak Ahithofelan tumchê add budh dilea.’
22
Tedna David utthlo ani apnna borabor aslolea lokak gheun, Jordan nôd pahr keli. Fantem zata mhollear soglleamnim nôd utrun kaddli.
23
Jedna Ahithofelan apli budh pallunk na mhonn dekhli, aplem gaddum toiar kelem ani utthun aplea ghora, aplea xarant to gelo; magir aplem ghor tharear ghalun gôll gheun melo. Ani taka tachê bapaichê somadhint nikhipilo.
24
Uprant, David Mahanaim’ nogrant ailo. Teach vellar Absalanv ani tachê borabor aslolea Israelkaramnim Jordan nôd pahr keli.
25
Absalanvan Joabachê svater Amasak foujecho fuddari nemlo. Ho Amas Ismael kulliechea Itracho put. To Abigaila lagim logn zal’lo. Hi Abigail Nahashachi dhuv ani Joabachi avoi, Zeruiachi bhoinn, asli.
26
Israel foujen ani Absalanvan Gileadant aplo mandd manddlo.
27
Ani David Mahanaim’ nogrant ailo tedna, Shobi, Amonit kullientlea Raba xarant ravpi, Nahashacho put ani Makir, Lodebar nogrant ravpi Amielacho put ani Barzilai, Rogelim’ ravpi Gileadit he Davida-xim aile.
28
Tãnnim apnna borabor bixannem, kannxe, matiechim aidonam, gonv, zov, pitt, bazlolo orôv, chonne, ollsanne, hullid, mhonv, dohi, menddre ani panir Davidak ani tachê borabor aslolea lokak khaunchê khatir haddlim. Te oxem chint’tale, ‘Ho lôk oronneant bhuken, thokun ani tanen asa.’
29
Tãnnim apnna borabor bixannem, kannxe, matiechim aidonam, gonv, zov, pitt, bazlolo orôv, chonne, ollsanne, hullid, mhonv, dohi, menddre ani panir Davidak ani tachê borabor aslolea lokak khaunchê khatir haddlim. Te oxem chint’tale, ‘Ho lôk oronneant bhuken, thokun ani tanen asa.’

Golden Verse

Samuelachem Dusrem Pustok 17:18

Toripunn eka chakran tankam pollele ani Absalanvak kollit kelem. Oxem astam-i tãnnim dogamnim-i pollapôll kaddli ani Bahurimant ravpi eka mon’xachea ghora-xim pavle. Tachea angnnant êk bãi asli. Te tantum bhitôr denvle.