Home

2Pedru Chapter 1 - Povitr Pustok Revised - 2010

1
Hanv Simanv Pedru, Jezu Kristacho sevôk ani Dhormdut, hem potr boroitam. Zankam amchea bhavartha sarko moladik bhavarth mell’lla, tankam boroitam. Ami bhôztanv tea Devachê, amchea Soddvonnara Jezu Kristachê, taronnik doiallaien tumkam ani amkam toch bhavarth favo zala.
2
Devak ani Jezuk, amchea Somiak, odik-odik vollkhun, tumkam odik ani odik Devachi doiallai ani xanti subham’ponnan bhôgunk mellum.
3
Favo tê   porim ami jieunk ani Tachi bhokti korunk goroz titlem Kristan Aplê divia podven amkam dilam. Apli poripurnn vollokh Tannem amkam dilea ani Aplê mhoiment ani vorteponnant vantto gheunk amkam apoileant.
4
Hea Aplea udar boreponnak lagun unch molachim ani vortim dennim Tannem amkam bhasaileant. Hê porim, sonvsarantlea kusddeponnantlim ani fottkirê axentlim sutton, tumi Devachea jivitachim bhagidaram - zaunk pavtat.
5
Hea khatir, Kristacher bhavarth samballunk ani tumche sugunn vaddounk sogllê humedin tumi vavrunk zai; teach borabôr Devachi khuxi zanno zaunk proitn korat;
6
zagrutaien tumcheô vaitt vondovnniô domauncheô; toxench addkhollim modem thir ravat; teach borabôr tumchi bhokti vaddon vetoli;
7
oxench sogllea bhavam-bhoinninchi opurbai tumi korchi ani sogllea mon’xam lagim pritimogan cholchem.
8
He sugunn tumkam astit ani te tumi vaddoit ascheat zalear, tumchem jivit bexttem ani nirfoll urchem na; punn tanchê vorvim tumi Jezu Kristak, amchea Somiak, odik-odik vollkhunk pavtoleat.
9
Jea mon’xank he sugunn nant, tim kudd’ddim vô mottvê dixttichim; aplim adlim patkam dhuun gelim mhonn tim visorleant.
10
Bhavam-bhoinnimnô, Devan tumkam apoileant ani vinchun kaddleant: hea apovnneachi ani venchnnukechi khatri thir samballunk umedin vavrat.Oxem korxat zalear, tumi koddsorun vexat mhonn bhirantuch na.
11
Oxem korun, Zo amcho Somi ani Soddvonnar Jezu Krist, Tachea rajeant provês korunk rund dar tumkam ugòddtolem.
12
Dekhun, zori tumi heô vostu zannont ani tumkam mell’llam tem sot tumchea jivitant tumi ghott dhôrun asat, tori hanv tumkam tancho ugddas korit ravtolom.
13
Ho sonvsar sôddun vochpacho mhozo vogôt lagim pavlo mhonn hanv zannom ani toxench amchea Somia Jezu Kristan mhaka kolloilam. Mhonnun, hanv jivo aso porian heô vostu tumchea monant haddun tumkam zagrut dovorchim mhonn mhaka dista.
14
Ho sonvsar sôddun vochpacho mhozo vogôt lagim pavlo mhonn hanv zannom ani toxench amchea Somia Jezu Kristan mhaka kolloilam. Mhonnun, hanv jivo aso porian heô vostu tumchea monant haddun tumkam zagrut dovorchim mhonn mhaka dista.
15
Ani hanv morun gelea uprant tumi sodanch hea vostuncho ugddas korcho mhonn hanv humedin vavurtolom.
16
Amcho Somi Jezu Krist podven ietolo mhonn ami tumkam xikoilem tednam, dusreamnim hikmotin ghôddlolim gop’pam-talam ami tumkam sangunk nant. Na; ami Tachi thôr mhoima amchea khaxa dolleamnim dekhlea.
17
Ho Mhozo bhov opurbaiecho Put; Tacher asa Mhojem dhadosponn: jednam hem utor dobajik voibhovantlem Taka pavlem, tednam Tannem Deva Tachea Bapa koddcho ghetlo man ani mhoima.
18
Ami Tachê borabôr povitr dongrar asleanv tednam, sorgar thaun ail’lo ho tallo ami khaxa aikolo.
19
Tea bhair amkam odik ghôtt khatri diunk provadianchem utor asa; taka tumi chit dixat zalear borem kortoleat. Fantem pavo-sôr ani sokallchem noketr tumchea kallzamnim ude porian, kallokhant uzvadd ghaltoli divtti koxi tem utor dhôrat.
20
Sogllea adim hem zanno zaiat: Povitr Pustokantlê koslêch provadianchê sangnnechi zonn-eklean ap-apli khasgi somzonni dium nozo.
21
Provadiancho khõichoch sondêx mon’xanchê khuxentlo upzunk na; punn jednam mon’xamnim Devachea nanvan sondêx dila, tednam Povitr Atmo tankam to sondêx diunk oddun vhortalo.

Golden Verse

Dusri Somurt 21:5

Leviche iadnikui thoim vetole, kiteak zobordos-teche soglle prosn tãnnim tharaun gheunk zai. Sorvesporan tankam aplê sevek, ani aplea nanvan axirvad ghalunk vinchun kaddleat.