Home

Makaeusachem Dusrem Pustok Chapter 1 - Povitr Pustok Revised - 2010

1
'Jerusalem ani Judeiant ravpi Judev, Ejiptantlea aplea Judev bhavank hun-hunit porbim patthoitat.
2
‘Sorvespor tumchê sovem aplim bore-ponnam otoum, ani Abraham, Izaak ani Jakob, hea aplea visvaxi sevokam ko-dden kel’lo korar to samballum.
3
Apli bhokti korpachem udhar mon ani aitem kalliz to tumkam dium.
4
Aple nem’ ani somurt somzun gheupachi sokti to tumkam dium, tosoch xantin to tumkam bhôrum.
5
Tumchea magnneancher to aplem lokx voddum tumchim patkam bhogsum, ani tumchea oddchonnichea vellar kodinch tumkam eksurim sôddum naka.
6
Oxem, tumchê khatir amchem magnnem.
7
‘Ekxem ekunnsot’tor (169) vorsa, jedna Raza Demetrius-Dusro, Siriachi rajvôttki choloitalo, tedna ami tumkam boroun kollit kel’lem, koslo avgodd vêll amcher aila ani koslea zulumak ami fuddo korun asanv tem. “Jasonan bondd korun amche odhikar kaddun ghetle ani Povitr Zago aplea odhikara sokla kelo. Hê babtint tedna ami tumkam boroun kollit kel’lem.
8
Jason ani tachea mon’xamnim Mondirachea darvontteank uzo ghatlo ani niropradi mon’xanche jiv kaddle. Tea vellar ami Deva lagim maglem, ani Tannem amchim magnnim aikolim. Mhonnttôch, tea upkaram khatir, ami mon’zatinchim bolidanam bhettoilim, orov-dhaneacheô bhettô keleô, Mondirantleô divlleô pettoileô ani Povitr Unddo môddlo.”
9
‘Taka lagun, ami tumchê koddem magtanv, zoxem tumi Mattvanchi porob somarombhtat tech porim tumi hea ugddasa khatir Kislevachea mhoineant somarombh korcho. Hem boroup ekxem otth’ttheamxim (188) vorsa boroilam.’
10
‘Jerusaleantle ani Judeiantlea Judev-sobha ani Judas, hanchê koddsun iadnikanchea kuttumbantlean denvon ail’lea ani Raza Tolemichea xikoupeak, Aristobulus, haka, ani Ejiptantlea Judev lokak porbim ani bori bholaiki.
11
‘Ami Devak argam ditanv, kiteak Tannem amkam vhoddantlea vhodd sonkoxttantlim vattailim. Khoinchea-i vellar ami zhogddonk toiar asanv mhonnttat tê bhaxen, ami raza add zhuzak ube ravunk toiar asleanv.
12
Ki-teak tannem raza add amchi bazu ghetli. Povitr Xara add zhuz korit, tankam pois dhanvddaun dile.
13
Jedna Raza Antiokus Persient pavlo, tedna tachê foujê kodden zoit vhorunk sompem nhoi koxem distalem. Punn, devi Nanaea hichea mondirant, tichea iadnikamnim kel’lea visvas-ghatachea soungank lagun, tanche kuddkean-kuddke zaun gele.
14
Apunn devi kodden logn zato-lom ani lognacheô bhettô koxeô mondirachea bhanddarant jem kitem asa, tem gheun vattek lagtolom mhonn chintun, Antiokus raza, aplea chodd visvaxi budh divpeank gheun mondi-rant gelo.
15
Nanaeachea iadnikamnim bhanddar bhair haddlea uprant, to ani tache thodde monis, aplim lutt marpa-chim chintnam gheun mondirant gele. Punn, Antiokus bhitôr gelea uprant, iadnikamnim tanchea fattlean mondira-chim daram bond kelim.
16
Ani apunn mallear lipun tacher ani tachea mon’xan-cher fator xevttile. Uprant tãnnim tachi gomtti katorli ani bhair ube aslolea mon’xam mukhar ti xevttun uddoili. 17 Odhormiponnan vaglolea mon’xank Devan khast laili. Tea Devak vakhann’nni!
18
‘Kislev mhoineachê ponchvis tarker ami Devmondirachea xud’dhikoro-nnachi porob palltanv. Tumi Mattvan-chi Porob ani Ujeachi Porob soma-rombhchi mhonn ami tumkam ko-lloilolem. Mondir ani vedi bandtolea Nehemiasan ho uzo hom’-orponn porgôtt korchea vellar zalo.
19
Tea kallar, jedna amchea purvozank koidi korun Persient dhôrun vhele tedna thoddea bhokti iadnikamnim thoddo uzo kaddlo ani to ekê poklli sarkê suklolê baint lipoun dovorlo. Konna-cheanuch to sôdun kaddunk zaun-chona toso, tãnnim to uzo ekdom’ borê bhaxen lipoun dovorlo.
20
Zaitea vorsamnim, Devak zai zalem, tea por-mannem Persiechea razan Nehemiasak porot Jerusaleak dhaddlo. Ami Nehe-miasan mondirant iadnikanchi konn ghorchim aslim tankam uzo haddat mhonn sanglem. Tãnnim amkam ko-lloilem; hanga uzo khoinch disona, punn thoddem attlolem tel zalear asa. Tench kitem asa tem haddat mhunnon Nehemiasan tankam sanglem.
21
Bolidana khatir vedicher sogllem toiar dovorlem. Tem tel lakddancher ani bolidanak manddloli tê boliecher votoiat mhonn tannem iadnikank sanglem.
22
Tannem sanglam toxem kelea uprant, thoddea vellan kupamnim suria disti poddlo. Ani okosmat, vedicher aslem titlem-i ujean zôllunk laglem. Soglle zann hem ojap polleunkuch urle.
23
Bolidan ujean hulpota astana, Mha-Iadnik Jonathanan loka borabor prarthon korunk suru kelem. Ani Nehemiasan ani sogllea lokan magnneant vantto ghetlo.
24
Hea por-mannem tem magnnem zalem: “Sorves-pora, Sorvespora Deva, sogllea vostun-chea Rochnnara, Tum kalljidar, toso podvedar. Tosoch kaklutsar. Ekloch Tum raza, anink dusro konnuch na, bogor tunch.
25
Tum ekloch doiall, mogall, gunnest, Tum Sorvespor ani sasnnacho. Israel porjek koslea-i sonkoxttantli nivarunk Tum kedea-i vellar toiar. Tuji kherit porza zaunk, amchea purvozank Tunvem vinchun kaddle-i.
26
Israel porjechea nanvan kelolem hem bolidan Tum mandun ghe. Tujê vinchun kaddlolê porjechi rakhonn kôr, ani amkam povitrponnan bhôr.
27
Porkea ganvant asloleanchi suttka kôr, ani amchê ximpoddlolê porjek ektthaim hadd. Amchê vaitt-vagnnuk bhogtolê ani unnak lekhtolê porjê thaim tuji kaklut dakhoi, hê porim sogllim dusrim raxttram Tum amcho Sorvespor Dev mhonn kollum-di.
28
Amkam piddapidd ditoleank khast lai ani urmottponnan amchi uzot kaddtoleank tras di.
29
Ani Moizesan sanglolea pormannem, Tujea povitr xarant tujê porjek aplem biradd korum-di.”
30
‘Uprant vennu vazoun, iadnikamnim gaionam gailim.
31
Bolidana uprant, urlam tem tel thoinchea vhoddlea khoddpancher votoiat mhonn Nehe-miasan formailem.
32
Toxem kelea uprant, uzo khub motto zalo. Vedi-voilo uzo odik bokboklo ani tea ujeak giraslo.
33
Kitem ghoddlem ti khobor soglleak ximpoddli. Tankam (Judevank) porde-sant vhorchê adim, iadnikamnim povitr uzo vedint lipoun dovorlo, punn thoim tankam tel mell’llem ani tem boli bhe-ttounk aslolea boliancher xinvraitôch, tacho uzo zalo ani bolidan hulpolem mhonnon, Persiechea Razachea kanan-cher poddlem.
34
Razan, tê khobrechi chovkoxi keli ani to zago aplea tabeant ghetlo ani ‘povitr zago’ mhonn porgôtt kelem.
35
Jea lokancher razacho visvas aslo, tea lokank tannem bhorpur denngeô dileô.
36
Nehemias ani tachea sangateamnim haka “neftar” mhonngê “xud’dhikoronn” oxem mhollem punn choddso lôk taka “nafta” mhonnttat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.