Home

2Korintkarank Chapter 4 - Povitr Pustok Revised - 2010

1
Devan hi seva amchê adhin kelea dekhun, ami ang kaddinanv.
2
Lojek lagun guptim dovortat tim kortubam ami sôddun ditanv, amchi chal naddbudhi-chi nhoi, Devachem utôr ami borsun porgôtt korinanv; portench zalear, sot tem ami spoxtt porgôtt’tanv ani, Devak amcho govai korun ani somest mon’xanchea ontoskornnank ulo korun, ami amkanch sakxi ditanv.
3
Amchem Xubhvortoman dhamplolem asa zalear, fokot ibadd zaunchê vatter asat tankam tem dhamplolem asa.
4
Mhonngê Krist khoreponnim Devacho rupkar, tôri Tachea mhoimêbhorit Xubhvortomanacho porzôll onbhavarthiank fankona zaunk, hea iugachea devan tanchim monam kudd’ddim keleant.
5
Ami amkanch porgôtt korinanv, punn Jezu Kristak ami porgôtt kortanv: to Somi mhonn ani ami Jezu khatir tumche sevok mhonn ami jahir kortanv.
6
Kallokhantlo bhair sorun uzvadd porzollum, oxem Devan mhollem; tôr Tannench, Kristachea mukhamollar porzollta tê Aplê mhoimechi vollokh amkam mellchê khatir, Aplo uzvadd amchea gineanant fanko-so kelo.
7
Punn ami fokot matiechim aidonamb, ani hem bhanddar oslea aidonamnim ghal’lem asa; mhonnttôch hi amkam dil’li vôrti podvi amchê thaun upzona; ti sogllich Devachi.
8
Sogllea jin’sanchea koxttancho bhar ami sõstanv, punn Dev amkam chepon poddunk dina; ami sogllech ghuspotanv, punn niraxi zainanv;
9
piddapidd bhôgtanv, punn Dev amkam kednanch sanddina: amkam khala uddoitat, punn amcho jiv kaddunk pavonant;
10
hea amchê kuddichea jivitant Jezuchem punorjivit dixtti poddchê khatir, teach amchê kuddichea jivitant sodanch ami Jezuk Tachea mornnant ekvottlole asanv.
11
Jezuchem punorjivit amchê vinaxi kuddint ugddapim dixtti poddchê khatir, jivech astana Jezu pasot ami mornnachea sonkottant bhonvtanv.
12
Hê bhaxen moronn amchê sovem aplem kam’ korit asa, punn tumchê sovem punorjivit aplem kam’ korit asa.
13
Hanvem bhavarth dhôrla dekhun hanv uloilom, oxem Povitr Pustokar boroil’lem mellta tench bhavarthachem mon amkam-i asa, dekhun bhavarth dhôrun ami-i uloitanv.
14
Devan Somia Jezuk punorjivont kela mhonn ami zannonv; toxench To amkam-i Jezu borabôr punorjivont kortolo ani amkam tumchê sangatim Apnna mukhar vhortolo mhonn ami zannonv.
15
Hem sogllem tumchea boreak; hê porim jitli Devachi doiallai odik-odik lokak bhôgunk mellta, titli odik-odik Devak mhoima diunchê khatir loka modem Tachi dhin’vasnni-i vaddot vetoli.
16
Hea pasot ami kednanch ang kaddinanv. Zorui bhailean amchem jivit bigddun veta, tôrui bhitôrlean tem disan’dis novsoron veta.
17
Kiteak heô amcheô lhan ani thoddea kallacheô khonti-dukhi sasnnachê ut’tôm’ mhoimek amkam toiar kortat: hea khontim-dukhim ani hê sasnnachê ut’tom’ mhoimê modem koslich sôr korunkuch zaina.
18
Mhonnttôch dolleank dixtti poddtat toslea vostuncher ami amchem dhean-mon lainanv, punn dixtti poddonant toslea vostuncher; dixtti poddtat teô vôstu thoddoch vêll urtat, punn dixtti poddonant teô sasnnak togtat.

Golden Verse

1Korintkarank 7:38

Mhonnttôch aplê ankvar hoklê lagim logn zata to borem korta; ani logn zaina to odik borem korta.